ខេត្តកំពង់ធំ ៖ មន្ត្រីនគរបាលសោធននិវត្តនិងក្រុមគ្រួសារមន្ត្រីដែលទទួលមរណៈភាពនៃស្នងការដ្ឋាននគរបាលខេត្តកំពង់ធំ ចំនួន៣១នាក់ត្រូវបានទទួលថវិកាគោលនយោបាយរបស់រាជរដ្ឋាភិបាលកាលពីរសៀលថ្ងៃទី២៤ ខែវិច្ឆិកា ឆ្នាំ២០១៤ ក្រោមអធិបតីភាព លោក ឧត្តមសេនីយ៍ត្រី ជូ សំអាន ស្នងការនៃស្នងការដ្ឋាននគរបាលខេត្តកំពង់ធំ។
លោក វរៈសេនីយ៍ឯក សេង ជា ប្រធានការិយាល័យគោលនយោបាយ និងសោធននិវត្តនៃនាយកដ្ឋានបុគ្គលិក បានអានរបាយការណ៍សង្ខេបថាថវិកាដែលបាននាំយកមកចែកជូនបងប្អូននៅរសៀលថ្ងៃនេះសរុបទាំងអស់មានចំនួន១៥៥.៤៧៧.៧៦០រៀល គឺជាថវិការគោលនយោបាយរបស់រាជរដ្ឋាភិបាល សម្រាប់ចែកជូនដល់មន្ត្រីនគរបាលនៃស្នងការដ្ឋានខេត្តកំពង់ធំចំនួន៣១នាក់ ក្នុងនោះមានមន្ត្រីសោធននិវត្តចំនួន១៨នាក់ និង ក្រុមគ្រួសាររបស់មន្ត្រីដែលបានទទួលមរណៈភាពចំនួន១៣នាក់។
លោកឧត្តមសេនីយ៍ត្រី ជូ សំអាន ស្នងការនគរបាលខេត្តកំពង់ធំមានប្រសាសន៍ថា ទាំងអស់នេះគឺជាការគិតគូរយ៉ាងម៉ត់ចត់ពីប្រមុខរាជរដ្ឋាភិបាលនៃព្រះរាជាណាចក្រកម្ពុជាទោះបីជាបងប្អូនដែលជាមន្ត្រីនគរបាល១ចំនួនបានចូលនិវត្ត និង១ចំនួនទៀតបានទទួលមរណៈភាពទៅហើយក្តី ដើម្បីបុព្វហេតុជាតិមាតុភូមិ ប្រមុខរាជរដ្ឋាភិបាលតែងតែគិតគូរដល់ពួកគាត់ និងក្រុមគ្រួសាររបស់គាត់ជានិច្ច ។ ជាក់ស្តែងដូចជាថ្ងៃនេះជាដើម សូមបងប្អូនកុំយល់ច្រឡំថារាជរដ្ឋាភិបាលទុកពួកលោកចោលដោយមិនគិតគូរឲ្យសោះ យ៉ាងណាម៉ិញលោកសូមផ្តាំផ្ញើរដល់បងប្អូនថា បន្ទាប់ពីបានទទួលនូវប្រាក់គោលនយោបាយទាំងអស់នេះហើយនោះត្រូវយកទៅចាយវាយឲ្យចំគោលដៅសម្រាប់គ្រួសារ។
ចែករំលែកព័តមាននេះ