ទីភ្នាក់ងារព័ត៌មានផ្លូវការកូរ៉េខាងជើង KCNA រាយការណ៍កាលពីថ្ងៃទី២៣ វិច្ឆិកា ថា មេដឹកនាំកំពូលប្រទេសនេះ លោក គីម ជុងអ៊ុន បានរៀបចំ បន្ទាប់មកត្រួតពិនិត្យមើលសមយុទ្ធយោធាមួយរបស់កងទ័ពប្រជាជនកូរ៉េ ។
KCNA បញ្ជាក់ថា លោក គីម បានពិនិត្យការប្រព្រឹត្តទៅនៃសមយុទ្ធនេះ ដែលសំដៅបំពេញការចន្លោះប្រហោង ហើយឱ្យកងទ័ពអាចមានសមត្ថភាពកាន់តែខ្ពស់ក្នុងការបំពេញបេសកកម្ម ។ លោកបានចេញបញ្ជាដល់គ្រប់កងឯកភាពយោធា ឱ្យធ្វើការហ្វឹកហាត់ក្នុងរបៀបធ្វើត្រាប់ ដូចសង្គ្រាមពិតប្រាកដ ហើយឱ្យត្រៀមប្រយុទ្ធគ្រប់ពេល ។ លោក គីម ជុងអ៊ុន គូសបញ្ជាក់ថា ដើម្បីឱ្យស្របនឹងប្រភេទនៃសង្គ្រាមសម័យទំនើប ហើយអាចឆ្លើយតបចំពោះបណ្តាវិធីសាស្ត្រនៃសង្គ្រាម តាមគោលការណ៍ Juche ចាំបាច់ត្រូវធ្វើសមយុទ្ធយោធារបស់កងកម្លាំងចម្រុះប្រភេទនេះ ឱ្យបានញឹកញាប់ ។
លោក គីម អំពាវនាវផងដែរឱ្យចាត់វិធានការមុឺងម៉ាត់នានា លុបបំបាត់ចោលបណ្តាភាពអសកម្មក្នុងកងទ័ព ហើយលោកគូសបញ្ជាក់ពីភាពចាំបាច់របស់បណ្តានាយទាហាននៃទីបញ្ជាការយោធាឱ្យសិក្សាដោយសុីជម្រៅ ហើយកែលម្អវិធីសាស្ត្រនៃការហ្វឹកហ្វឺន ៕
ចែករំលែកព័តមាននេះ