រាជធានីភ្នំពេញ ៖ ការប្រកួតប្រដាល់កាលពីថ្ងៃអាទិត្យ ទី២៣ វិច្ឆិកា កីឡាករហ៊ឹម សារ៉ាន់ បានក្លាយជាអ្នកចាញ់យ៉ាងអាម៉ាស់នៅលើរេញ ខណៈដែលកីឡាករគង់ សំបូរ បានក្លាយជាកីឡាករមិនធម្មតា ព្រោះតែអាចផ្ដួលគូប្រកួតឱ្យសន្លប់ ។ ការប្រកួតរបស់កីឡាករទាំងពីរគូទទួលបានការចាប់អារម្មណ៍យ៉ាងខ្លាំង នៅលើសង្វៀនទូរទស្សន៍អាស៊ីអាគ្នេយ៍ ។
រាជធានីភ្នំពេញ ៖ ការប្រកួតប្រដាល់កាលពីថ្ងៃអាទិត្យ ទី២៣ វិច្ឆិកា កីឡាករហ៊ឹម សារ៉ាន់ បានក្លាយជាអ្នកចាញ់យ៉ាងអាម៉ាស់នៅលើរេញ ខណៈដែលកីឡាករគង់ សំបូរ បានក្លាយជាកីឡាករមិនធម្មតា ព្រោះតែអាចផ្ដួលគូប្រកួតឱ្យសន្លប់ ។ ការប្រកួតរបស់កីឡាករទាំងពីរគូទទួលបានការចាប់អារម្មណ៍យ៉ាងខ្លាំង នៅលើសង្វៀនទូរទស្សន៍អាស៊ីអាគ្នេយ៍ ។ កីឡាករហ៊ឹម សារ៉ាន់ មកពីក្លិបក្រសួងការពារជាតិ ត្រូវគេផ្គូផ្គងឱ្យប៉ះ អ៊ុំ ចំរើន មកពីក្លិបតាឡីដំរីមានរិទ្ធជាលើកដំបូង ខណៈដែលការប្រកួតរបស់អ្នកទាំងពីរ គឺហ៊ឹម សារ៉ាន់ ត្រូវគេជឿស្ទើរ១០០% ថា ឈ្នះ អ៊ុំ ចំរើន ដោយមិនពិបាក ព្រោះសំអាងថា លោកជាកីឡាកររៀមច្បងផង និងជាជើងខ្លាំងដែលមិនទាន់ស្រុតស្រកថាមពលផង ។
ការប៉ះគ្នារបស់ពួកគេ ជាចំណុចរសើបមួយនៅក្នុងពិភពកីឡាប្រដាល់ បន្ទាប់ពីអ្នកទាំង២ឈានដល់កំពូលដូចគ្នា ក្នុងប្រភេទទម្ងន់៦៣,៥គីឡូក្រាម ។ ជំនួបរបស់អ្នកទាំង២កក្រើករេញតែម្ដងនៅក្នុងព្រឹត្តិការណ៍ Ganzburge Top Fighters ដែលបានធ្វើឡើងនៅព្រឹកថ្ងៃអាទិត្យម្សិលម្ង៉ៃ ។ កីឡាករហ៊ឹម សារ៉ាន់ ដែលមានប្រវត្តិប្រកួតច្រើនជាង នៅតែទទួលជោគជ័យក្នុងការវាយបំបុកទៅលើ អ៊ុំ ចំរើន ដែលជាសិស្សប្អូននៅក្នុងសង្វៀន ។ ប៉ុន្តែលោកក៏ត្រូវថ្មោងផងដែរពីកណ្ដាប់ដៃ និងរន្ទះជើងរបស់គូបដិបក្ខ ។ ទោះជាការប្រកួតទាំងមូលអាចបន្តដល់ចប់ទឹកទី៥ ប៉ុន្តែអ្នកណាក៏ឃើញដែរថា កីឡាករហ៊ឹម សារ៉ាន់ ទ្រមខ្លួនយ៉ាងខ្លាំងជាមួយនឹងកណ្ដាប់ដៃ និងកែងដ៏មុតស្រួចរបស់ អ៊ុំ ចំរើន ។ មិនត្រឹមតែត្រូវ អ៊ុំ ចំរើន វាយឱ្យរយះលើខ្ទង់ច្រមុះហូរឈាមដូចគេវះប៉ុណ្ណោះទេ ហ៊ឹម សារ៉ាន់ ក៏ត្រូវកណ្ដាប់ដៃពេញទំហឹងរបស់គូប្រកួត ធ្វើឱ្យលោកបាក់ធ្មេញមុខដល់ទៅ២ ក្រោយចប់ការប្រកួតផងដែរ ។
លោកនៅតែស៊ូដល់ចប់ការប្រកួត និងបានទាំងវាយសម្រុកលើ អ៊ុំ ចំរើន វិញជាច្រើនលើក ដោយប៊ិះនឹងធ្វើឱ្យ អ៊ុំ ចំរើន ផ្ងារជើង ត្រដរខ្យល់ដោយអន្លើទៀតផង ។ ឆាកប្រយុទ្ធរបស់អ្នកទាំងពីរពោរពេញដោយសំឡេងហ៊ោកញ្ជ្រៀវយ៉ាងកងរំពង ពិសេសក្នុងពេល អ៊ុំ ចំរើន ក៏លែងខ្លាំងដាក់ ហ៊ឹម សារ៉ាន់ ហើយហ៊ឹម សារ៉ាន់ ទោះជារបួសធ្ងន់ ក៏ប្រឹងបង្កើនកម្លាំងដៃ។ ទាំងបង្គោលក្រហម និងបង្គោលខៀវ មិនខុសពីបើកឆាកប្រយុទ្ធស៊ីសាច់ហុតឈាមនោះទេ បើទោះជាក្រោយបញ្ចប់ការប្រកួតអ្នកទាំងពីសុំទោសគ្នា និងឱបរឹតគ្នា ក្នុងនាមជាកីឡាករដែលមិនប្រកាន់គ្នា ព្រោះតែការប្រកួតនោះក្តី ។ អ៊ុំ ចំរើន ត្រូវប្រកាសថាឈ្នះពិន្ទុ ខណៈដែលលទ្ធផលនេះបានបង្ហាញយ៉ាងច្បាស់ថា ហ៊ឹម សារ៉ាន់ ខាតទាំងដើមទាំងការតែម្ដង ដ្បិតលោកជាកីឡាករល្បីជាងទទួលការគាំទ្រខ្លាំងជាង ប៉ុន្តែបែរជារងរបួសទ្រមខ្លួនក្រោមកណ្ដាប់ដៃរបស់ អ៊ុំ ចំរើន ហើយថែមទាំងជាប់ក្នុងបញ្ជីខ្មៅថាចាញ់សិស្សប្អូនក្នុងជំនួបបើកឆាកទៀត។ ហ៊ឹម សារ៉ាន់ ទទួលការឧបត្ថម្ភច្រើនគួរសមក្រោយពីរងរបួសបាក់ធ្មេញ២ និងរយះដេរនៅចន្លោះប្រជុំចិញ្ចើម ។
លោកទំនងត្រូវផ្អាកការប្រកួតមួយរយៈខ្លី រហូតអាចដាក់ធ្មេញដែលបាក់ទាំងពីរឱ្យជាសះស្បើយ ។ នៅក្នុងព្រឹត្តិការណ៍ជើងខ្លាំងរបស់ស្រាបៀរកម្ពុជានៅលើសង្វៀនទូរទស្សន៍អាស៊ីអាគ្នេយ៍នៅថ្ងៃនោះដែរ ប៉ុន្តែពេលរសៀលកីឡាករគង់ សំបូរ មកពីក្លិបបុរីរាជសីហ៍មានឫទ្ធិ ក៏រំលេចឱ្យឃើញនូវការចាប់អារម្មណ៍ផងដែរជាមួយកីឡាករម៉ន គឹមសុង ដែលជាជើងខ្លាំងប្រចាំក្លិបការិយាល័យទី៥ កងទ័ពជើងគោក ។ មុនការប្រកួតឈានដល់រកឃើញចាញ់ឈ្នះ កីឡាករគង់ សំបូរ ទទួលការវាយលុកយ៉ាងខ្លាំងពីកីឡាករបង្គោលខៀវ ។ ជាក់ស្ដែងក្នុងទឹកទី២ ទោះជាគង់ សំបូរ ស្ទុះវាយបានល្អ ក៏បង្គោលខៀវនៅតែក្ដោបក្ដាប់ការវាយបកនេះបានល្អជាង ។ ទោះបីយ៉ាងណា កណ្ដាប់ដៃ និងរន្ទះជើងមួយស្នៀតៗរបស់កីឡាករគង់ សំបូរ ក៏ធ្វើឱ្យ ម៉ន គឹមសុង ផ្ងារជើងម្ដងៗផងដែរ ដ្បិតតែតួលេខនៃការវាយលុកមានចំនួនតិចជាងគូប្រកួត។ ទំនងជាអាងអំនួតក្នុងការយកប្រៀបនេះ ទើបធ្វើឱ្យ ម៉ន គឹមសុង ស្ទុះវាយដោយកំរោល ហើយភ្លាត់ស្នៀតត្រូវមួយជង្គង់ពេញទំហឹងរបស់ គង់ សំបូរ បណ្ដាលឱ្យរមួលឆ្អឹងដៃខាងស្តាំ ប្រកាច់ភ្លាមៗប្រកួតមិនកើតក្នុងទឹកទី៣ ។
អ្នកទស្សនាភាគច្រើននិយាយថា ឱកាសរបស់ គង់ សំបូរ បានជួយឱ្យលោកស៊ីដាច់តែម្ដង ដោយមិនចាំបាច់ប្រើកម្លាំងច្រើនទៀតក្នុងការប្រកួត។ ប៉ុន្តែឱកាសដែល គង់ សំបូរ ទទួលបាន ក៏កើតចេញពីសមត្ថភាព និងពីការវាយលុកដ៏ខ្លាំងក្លារបស់លោកផងដែរ ទើបបណ្ដាលឱ្យសភាពនៃការស្ទុះវាយដោយកំរោលរបស់ម៉ន គឹមសុង ក្លាយជាភ្លាត់ងាយៗ ។ គង់ សំបូរ ត្រូវប្រកាសថា ផ្ដួលគូប្រកួតឱ្យសន្លប់ក្នុងទឹកទី៣ ដែលលទ្ធផលនេះ ត្រូវបានអ្នកទស្សនាភាគច្រើនកោតសរសើរជាថ្មី បន្ទាប់ពីការប្រកួតមុនៗ ក៏ទទួលបានលទ្ធផលវិជ្ជមានច្រើនគួរសមដែរនោះ ៕
ចែករំលែកព័តមាននេះ