ការស្រាវជ្រាវថ្មីមួយដែលពិសោធលើមនុស្ស១៨០០នាក់បានរកឃើញថា ដើរ៦ពាន់ជំហានឬរយៈពេល១ម៉ោងក្នុងមួយថ្ងៃ អាចជួយធ្វើឱ្យល្អប្រសើរដល់សន្លាក់ក្បាលជង្គង់ និងទប់ស្កាត់បានការពិការភាព ។ មនុស្សវ័យចំណាស់ជាច្រើនដែលមានបញ្ហាសន្លាក់ជង្គង់តែងជួបការលំបាកនៅពេលឡើងជណ្តើរឬក្រោកពីកៅអី ប៉ុន្តែការរកឃើញលើកនេះហាក់ដូចជាចម្លែកបន្តិច ខណៈវាបង្ហាញថា ការដើរកាន់តែច្រើនធ្វើឱ្យល្អប្រសើរដល់មុខងារប្រចាំថ្ងៃ ។
Daniel White អ្នកដឹកនាំការសិក្សានិងជាសាស្ត្រាចារ្យជំនួយសាកលវិទ្យាល័យ Boston University សហរដ្ឋអាមេរិកបានថ្លែងថា៖«បុគ្គលដែលកំពុងប្រឈមឬក៏មានបញ្ហាសន្លាក់ជង្គង់រួចជាស្រេចហើយនោះ គួរតែដើរឱ្យបាន៦ពាន់ជំហានក្នុងមួយថ្ងៃ ។ ការដើរកាន់តែច្រើន ហានិភ័យកើតមានពិការភាពមុខងារប្រចាំថ្ងៃកាន់តែថយចុះផងដែរ »។ លោកបានបន្តថា គ្រប់ជំហានដែលបានដើរពេញមួយថ្ងៃគឺត្រូវបានរាប់បញ្ចូលទាំងអស់ ។
សាស្ត្រាចារ្យរូបនេះបានបន្ថែមថា ៖«ជាធម្មតា ក្នុងមួយនាទី មនុស្សអាចដើរបានជាមធ្យមប្រមាណជា១០០ជំហាន ។ ដូច្នេះដើម្បីឱ្យបាន៦ពាន់ជំហាន គេត្រូវចំណាយពេល១ម៉ោងក្នុងមួយថ្ងៃ ។ វាហាក់មិនខុសគ្នាចំពោះទីកន្លែងដែលបោះជំហានដើរពីឆ្វេងឬស្តាំឡើយ »។
ការសិក្សាដែលបានចុះផ្សាយក្នុងព្រឹត្តិបត្រ Arthritis Care & Research បានសរសេរថា ដើរ មិនត្រឹមតែជួយបង្កើនកម្លាំងសាច់ដុំនិងភាពបត់បែនប៉ុណ្ណោះទេ ប៉ុន្តែវាថែមទាំងអាចជួយកាត់បន្ថយការឈឺចាប់សន្លាក់បានទៀតផង ។ រៀងរាល់ការដើរ១០០០ជំហានគឺអាចកាត់បន្ថយការពិការភាពមុខងារផ្សេងៗបានពី១៦-១៨ភាគរយ ៕
ចែករំលែកព័តមាននេះ