ការសិក្សាមួយដែលធ្វើទៅលើបុរសបានចង្អុលបង្ហាញថា ការរួមភេទមិនត្រឹមតែផ្តល់នូវក្តីសប្បាយរីករាយបំបាត់អស់ភាពតានតឹងក្នុងចិត្តប៉ុណ្ណោះទេ ប៉ុន្តែថែមទាំងផ្តល់ផលល្អដល់សុខភាពបេះដូងផងដែរ ។
ចុះផ្សាយក្នុងព្រឹត្តិបត្រ American Journal of Cardiology ក្រុមអ្នកស្រាវជ្រាវបាននិយាយថា ខ្លួនបានរកឃើញពីការជាប់ពាក់ព័ន្ធគ្នារវាងហ្វ្រេកង់នៃសកម្មភាពផ្លូវភេទទាបនិងហានិភ័យជំងឺបេះដូង ។
Susan A. Hall សមាជិកក្រុមស្រាវជ្រាវមកពីវិទ្យាស្ថានស្រាវជ្រាវ New Englandបានសរសេរថា ក្រុមបុរសដែលរាយការណ៍ថា រួមភេទម្តងក្នុងមួយខែឬគ្មានសោះប្រឈមយ៉ាងខ្ពស់នឹងជំងឺបេះដូងធៀបទៅនឹងក្រុមបុរសដែលនិយាយថា ខ្លួនរួមភេទ២ឬច្រើនដងក្នុងមួយ
សប្តាហ៍ ។
ក្រុមអ្នកស្រាវជ្រាវបានបន្តថា ការសិក្សាពីលើកមុនៗគឺពិនិត្យតែលើទំនាក់ទំនងរវាងការងាប់លិង្គនិងជំងឺបេះដូងប៉ុណ្ណោះ ។ ប៉ុន្តែការសិក្សាថ្មីលើកនេះគឺបានពិនិត្យមើលជាសំខាន់ ជាអាទិភាពទៅលើហ្វ្រេកង់សកម្មភាពផ្លូវភេទនិងជំងឺបេះដូង ។ នៅក្នុងការពិសោធតាមដានលើបុរសវ័យខ្ទង់៥០ឆ្នាំ ចំនួន១ពាន់១៦៥នាក់ដោយប្រើពេល១៦ឆ្នាំ ពួកគេបានរកឃើញពីការកើនឡើងនូវហានិភ័យជំងឺបេះដូងចំពោះក្រុមបុរសដែលហ្វ្រេកង់សកម្មភាពរួមភេទរបស់ពួកគេធ្លាក់ចុះ ។ ប្រៀបធៀបជាមួយបុរសដែលនិយាយថា ខ្លួនបានរួមភេទយ៉ាងហោចណាស់២-៣ដងក្នុងមួយសប្តាហ៍ បុរសដែលរួមភេទត្រឹមម្តងឬគ្មានសោះក្នុងមួយខែ ជួបប្រទះនូវកំណើនហានិភ័យពីជំងឺបេះដូងដល់៤៥ភាគរយអំឡុងរយៈពេលពិសោធន៍ ។ សូមបញ្ជាក់ថា ហានិភ័យនេះគឺបានរាប់បញ្ចូលទាំងកត្តាអាយុនិងកត្តាលិង្គមិនងើបរឹងផងដែរ ។
ក្រុមអ្នកស្រាវជ្រាវដដែលបានបន្ថែមថា៖
«លទ្ធផលនៃការរកឃើញរបស់យើងគឺបានបង្ហាញជាអនុសាសន៍ថា កម្រិតហ្វ្រេកង់នៃសកម្មភាពរួមភេទទាប អាចទស្សទាយបានពីជំងឺបេះដូងខណៈមួយផ្នែកតូចទាក់ទិននឹងលិង្គមិនងើបរឹង ហើយថា ការស្វែងរកការពិនិត្យនិងព្យាបាលទាន់ពេលគឺជាដំណោះស្រាយដ៏មានប្រយោជន៍» ។
សាស្ត្រាចារ្យHallបានបញ្ជាក់ថា បណ្តាបុរសដែលសកម្មនឹងការរួមភេទទំនងមានថាមពលផ្លូវភេទក៏ដូចជាសមត្ថភាពរាងកាយខ្លាំង។ ដូចនេះ សមត្ថភាពរួមភេទអាចជាក្រិតវាស់នូវសុខភាពទូទៅ ។ លោកបន្តថា បុរសដែលរួមភេទបានទៀងទាត់អាចនឹងមានទំនាក់ទំនងកាន់តែស៊ីជម្រៅជាមួយដៃគូតែម្នាក់ ។ ចំណុចនេះគឺផ្តល់ផលល្អដល់សុខភាព ដោយវាធ្វើឱ្យកម្រិតStressថយចុះ ហើយជាងនេះទៅទៀតគឺការគាំទ្រពីសង្គម ៕
ចែករំលែកព័តមាននេះ