ទឹកដក់ក្នុងភ្នែក គឺជាជំងឺម្យ៉ាងរមែងកើតមានលើភ្នែកទាំងសងខាង តែអ្នកអាចការពារបានតាមរយៈការបន្តក់ថ្នាំ ការបាញ់កាំរស្មី ឬវះកាត់ ព្រោះប្រសិនបើទុកចោលរហូតកើតជាជំងឺទឹកដក់ហើយ ទើបមកព្យាបាលភ្នែកដែលខូចនោះ មិនអាចត្រទ្បប់មករកភាពដើមវិញទេ ការព្យាបាលគឺគ្រាន់តែមិនឱ្យបន្តខូចកញ្ចក់ភ្នែកតទៅទៀតប៉ុណ្ណោះ ។
លោកវេជ្ជបណ្ឌិត ងី ម៉េង ប្រធានកម្មវិធីជាតិសុខភាពភ្នែកបានប្រាប់កោះសន្តិភាពឱ្យដឹងថា ភាគច្រើនជំងឺទឹកដក់ក្នុងភ្នែកអាចកើតមានចំពោះអ្នកដែលមានអាយុលើសពី៤០ឆ្នាំទ្បើងទៅ ។ ជំងឺនេះរមែងកើតលើភ្នែកទាំងសងខាង ដូច្នេះហើយនៅពេលព្យាបាលគ្រូពេទ្យតែងណែនាំឱ្យអ្នកជំងឺការពារ ដើម្បីកុំឱ្យឆ្លងពីម្ខាងទៅម្ខាងទៀត ។ ជំងឺទឹកដក់ក្នុងភ្នែកត្រូវបានបែងចែកជាបីប្រភេទ ៖
១-ទឹកដក់ប្រភេទបន្ទាន់ធ្ងន់ធ្ងរ(AACG)ៈ កើតមានពីសម្ពាធទឹកក្នុងភ្នែកដែលទ្បើងខ្ពស់មួយរំពេច ធ្វើឱ្យអ្នកជំងឺមានអាការឈឺភ្នែកខ្លាំង ឈឺក្បាល ភ្នែកស្រវាំងយ៉ាងលឿន អាចមានអាការចង់ក្អួតចង្អោរផងដែរ ។ ប្រសិនបើមិនបានទទួលការព្យាបាលភ្លាមៗទេ អាការនេះនឹងមានកម្លាំងខ្លាំងទ្បើងជាលំដាប់ ។ ភាគច្រើនកើតចំពោះក្រុមមនុស្សមានអាយុចាប់ពី៤៥ឆ្នាំទ្បើងទៅ ។
២-ជំងឺទឹកដក់ប្រភេទមុំបិទ (CACG) ៈ ជំងឺទឹកដក់ប្រភេទនេះ មិនមានអាការអ្វីសម្រាប់កត់សម្គាល់ទេ ជំងឺនេះវិវិឌ្ឍទៅម្តងបន្តិចៗ រហូតបិទមុំប្រស្រីភ្នែក ខណៈសម្ពាធទឹកក្នុងភ្នែកទ្បើងខ្ពស់ទៅៗ បើគេពិនិត្យលើទងសរសៃប្រសាទភ្នែកឃើញថា មានសណ្ឋានខូង ។
៣-ជំងឺទឹកដក់ប្រភេទមុំបើក (POAG) ៈ ជំងឺនឹងវិវិឌ្ឍយឺតៗ រីឯសម្ពាធទឹកក្នុងភ្នែកក៏ទ្បើងម្តងបន្តិចៗ ទើបមិនមានអាការឈឺចាប់ ហើយជំងឺប្រភេទនេះ វាតែងតែកើតមានចំពោះភ្នែកទាំងសងខាង ។ ដំបូងមិនមានលេចចេញអាការអ្វីគួរឱ្យកត់សម្គាល់ទេ តែនៅពេលជំងឺវិវឌ្ឍន៍ខ្លាំងទៅសរសៃប្រសាទភ្នែកត្រូវបំផ្លាញបន្តិចម្តងៗ ធ្វើឱ្យគំហើញកាន់តែរួមតូច ពេលនោះទើបអ្នកជំងឺចាប់ផ្តើមដឹង ។ ក្នុងស្ថានភាពបែបនេះ បើសិនមកជួបគ្រូពេទ្យយឺតពេល ភ្នែកអាចនឹងឈានទៅរកពិការ ។
ចំពោះការព្យាបាលជំងឺទឹកដក់ក្នុងភ្នែកមាន ការប្រើប្រាស់ថ្នាំ ការបាញ់កាំរស្មី និងការវះកាត់ ។ ការជ្រើសរើសវិធីព្យាបាលណាមួយ វាអាស្រ័យទៅនឹងភាពធ្ងន់ធ្ងរនៃជំងឺ ដោយគ្រូពេទ្យជាអ្នកសម្រេចថាតើគួរប្រើវិធីណា ទើបអាចបានផលល្អសម្រាប់អ្នកជំងឺ ។ ការព្យាបាលគ្រាន់តែអាចគ្រប់គ្រងសម្ពាធទឹកក្នុងភ្នែកឱ្យស្ថិតនៅធម្មតា និងជួយធ្វើឱ្យភ្នែកមិនបន្តខូចតទៅទៀតប៉ុណ្ណោះ ។ ការប្រើប្រាស់ថ្នាំនៅក្នុងការព្យាបាលជំងឺទឹកដក់ ជាវិធីដែលទទួលផលនិងនិយមខ្លាំងជាងគេ ។ ដូច្នេះដើម្បីការពារជំងឺទឹកដក់ក្នុងភ្នែកលោកអ្នកគួរតែអនុវត្តតាមវិធីខាងក្រោម៖
-អ្នកដែលមានអាយុលើសពី៤០ឆ្នាំទ្បើងទៅ គួរមកទទួលការពិនិត្យភ្នែក និងវាស់សម្ពាធទឹកក្នុងភ្នែកពីគ្រូពេទ្យជំនាញ មុនពេលវិវឌ្ឍន៍ទៅរកភាពធ្ងន់ធ្ងរ ។
-ចំពោះសមាជិកគ្រួសារណាម្នាក់ធ្លាប់កើតមានជំងឺទឹកដក់ក្នុងភ្នែក សមាជិកក្រៅពីនោះក៏គួរមកទទួលការពិនិត្យផងដែរ ព្រោះពួកគាត់អាចនឹងមានឱកាសកើតជំងឺនេះច្រើនជាងមនុស្សទូទៅ ព្រោះវាមានចំណែកទាក់ទងផ្នែកជំងឺតំណពូជ ។
-ទឹកដក់ភាគច្រើនជាជំងឺដែលកើតទ្បើងដោយឯកឯង តែមានជំងឺទឹកដក់ខ្លះ កើតមកពីអ្នកជំងឺទិញថ្នាំបន្តក់ភ្នែកប្រភេទខ្លះ យកមកប្រើប្រាស់ដោយខ្លួនឯង ។ ដូច្នេះដើម្បីចៀសវាងការកើតជំងឺនេះ លោកអ្នកមិនគួរទិញថ្នាំបន្តក់ភ្នែកប្រើដោយខ្លួនឯងទេ គួរប្រើថ្នាំណាដែលគ្រូពេទ្យបញ្ជាឱ្យប្រើប្រាស់ទើបប្រសើរជាង ៕
ចែករំលែកព័តមាននេះ