បញ្ហាឈឺស្មាធ្វើឱ្យប៉ះពាល់ដល់ជីវិតរស់នៅដ៏សៅហ្មងមួយ ដែលទាមទារឱ្យលោកអ្នកជួបពិភាក្សាជាមួយគ្រូពេទ្យធ្វើរោគវិនិច្ឆ័យឱ្យបានទាន់ពេលវេលា បន្ទាប់ពីសាកល្បងព្យាបាលដោយខ្លួនឯងក្នុងរយៈពេលខ្លី ហើយនៅតែមិនទទួលបានជោគជ័យនោះ ។
បញ្ហាឈឺស្មាធ្វើឱ្យប៉ះពាល់ដល់ជីវិតរស់នៅដ៏សៅហ្មងមួយ ដែលទាមទារឱ្យលោកអ្នកជួបពិភាក្សាជាមួយគ្រូពេទ្យធ្វើរោគវិនិច្ឆ័យឱ្យបានទាន់ពេលវេលា បន្ទាប់ពីសាកល្បងព្យាបាលដោយខ្លួនឯងក្នុងរយៈពេលខ្លី ហើយនៅតែមិនទទួលបានជោគជ័យនោះ ។
លោកសាស្ត្រាចារ្យវេជ្ជបណ្ឌិត ស៊ិក ធីរៈ ឯកទេសជំងឺសន្លាក់និងវះកាត់ឆ្អឹងបាក់បែក នៃគ្លីនិកឯកទេសឆ្អឹងសំណង់១២ បានប្រាប់កោះសន្តិភាពឱ្យដឹងថា ដូចដែលលោកអ្នកបានជ្រាបរួចមកហើយបញ្ហាឈឺស្មាអាចបណ្តាលមកពីមូលហេតុជាច្រើនដូចជា រលាកថង់ទឹកសន្លាក់នៅក្នុងស្រទាប់ឆ្អឹង រលាកស្រោមសន្លាក់ និងការប៉ះទង្គិចជាមួយស្មាដូចជាពេលដួលយកដៃច្រត់ ឬអ្នកដែលធ្វើការដោយប្រើកម្លាំងដៃខ្លាំង ឬក៏ធ្លាប់ជួបនូវគ្រោះថ្នាក់មួយចំនួនដែលធ្វើឱ្យប៉ះទង្គិចនឹងដៃឬស្មាជាដើម ។ ដូច្នេះការព្យាបាលឈឺស្មាភាគច្រើន គឺផ្តោតសំខាន់លើមូលហេតុទាំងនេះ ដើម្បីឱ្យការព្យាបាលទទួលបានភាពជោគជ័យ ។ លោកសាស្ត្រាចារ្យវេជ្ជបណ្ឌិត បានប្រាប់បន្តថា បន្ទាប់ពីសួរនាំជាមួយអ្នកជំងឺរកមូលហេតុដែលបណ្តាលឱ្យមានការឈឺចាប់នោះរួចហើយគ្រូពេទ្យនឹងពិនិត្យស្រាវជ្រាវរកប្រភពនៃការឈឺចាប់បន្តទៀត ។ ចំពោះវិធីស្រាស្តក្នុងការរកមូលហេតុមានច្រើនយ៉ាងដូចជា៖
-ថតកាំរស្មីអិុច ក្នុងករណីមានការប៉ះទង្គិច
-ការធ្វើស៊ីឌីស្កែន
-បើសិនជាចង់ដឹងបន្ថែមទៅលើសរសៃពួរ ឆ្អឹងខ្ចី នៅក្នុងតំបន់ស្មា គេអាចនឹងធ្វើ MRI ដើម្បីឱ្យរូបភាពកាន់តែច្បាស់ជាងកាំរស្មីអិុចនិងស៊ីឌីស្កែន ។
-ក្រៅពីនេះក៏មានវិធីដ៏ទំនើបមួយទៀត ជាវិធីដែលអាចកំណត់រោគវិនិច្ឆ័យផង និងជាវិធីសាស្ត្រដើម្បីជួយសម្រួលដល់ការព្យាបាលផងដែរ គឺវិធីឆ្លុះសន្លាក់ឆ្អឹង ។
លោកសាស្ត្រាចារ្យវេជ្ជបណ្ឌិត បានបន្តទៀតថា បញ្ហាឈឺស្មាខ្លះ ក៏អាចដោះស្រាយព្យាបាលនៅផ្ទះដោយខ្លួនឯងបានដែរ បើសិនជាលោកអ្នកឈឺស្មាដោយសារតែការលេងកីទ្បា ឬដួលបន្តិចបន្តួច មិនប៉ះពាល់ធ្ងន់ធ្ងរនោះ គឺលោកអ្នកអាចប្រើវិធីបន្ទាប់បន្សំមួយចំនួនដូចជា អាចសម្រាកដោយកុំឱ្យស្មាធ្វើចលនា, ស្ពាយដៃមួយរយៈពេល, ស្អំទឹកកក ឬទឹកក្តៅ នៅពេលការឈឺចាប់ផ្តើម ។
គួរចងចាំថា កាលណានៅពេលការឈឺចាប់ចុះថយហើយ លោកអ្នកមិនព្រមធ្វើចលនាទេនោះ អាចធ្វើឱ្យគាំងសន្លាក់ ដូច្នេះដើម្បីឱ្យសាច់ដុំសាកកម្រើកឬដំណើរការទ្បើងវិញ គួរធ្វើលំហាត់ប្រាណឬបញ្ចេញចលនាតាមតែអាចប្រព្រឹត្តទៅបាន ។
ចំពោះការព្យាបាលខ្លះក៏អាចមានការប្រើប្រាស់ថ្នាំបំបាត់ការឈឺចាប់បន្ថយការរលាកផងដែរ តែអ្វីដែលជាការប្រសើរបំផុតនោះ នៅពេលដែលលោកអ្នកមានការប៉ះទង្គិចជាមួយនឹងស្មា បណ្តាលឱ្យឈឺចុកចាប់ហើយព្យាបាលដោយខ្លួនឯងមួយរយៈមិនទទួលបានជោគជ័យ គួរតែប្រញាប់មកជួបពិភាក្សាជាមួយគ្រូពេទ្យឯកទេសសន្លាក់ឱ្យបានទាន់ពេលវេលាចៀសវាងការឈានដល់ដំណាក់កាលធ្ងន់ធ្ងរដែលពិបាកក្នុងការព្យាបាល ៕
ចែករំលែកព័តមាននេះ