អង្គការលើកលែងទោសអន្តរជាតិ បានអំពាវនាវកាលពីថ្ងៃទី២១ វិច្ឆិកា ២០១៤ ឱ្យប្រធានាធិបតីថ្មីនៃប្រទេសឥណ្ឌូណេស៊ី គួរលុបចោលច្បាប់មើលងាយលើសាសនាដ៏តឹងរុឹងរបស់ប្រទេសនេះ រួមទាំងបញ្ជាក់ឱ្យឃើញពីចំនួនអ្នកទោសនៅក្នុងពន្ធនាគារដែលកើនខ្ពស់ក្នុងរយៈពេលប៉ុន្មានឆ្នាំកន្លងទៅ ។
ក្រុមអង្គការសិទ្ធិមនុស្សដែលមានស្នាក់ការនៅចក្រភពអង់គ្លេសបញ្ជាក់ថា ការឃុំឃាំងបុគ្គលក្រោមច្បាប់មើលស្រាលលើសាសនាមានកំណើនខ្ពស់ក្នុងអំឡុងពេល១០ឆ្នាំ ដែលអតីតមេដឹកនាំលោកស៊ូស៊ីឡូ បាមបាង យុតដូយ៉ូណូ នៅកាន់អំណាច ធ្វើឱ្យពន្ធនាគារឥណ្ឌូណេស៊ីមានអ្នកទោសក្នុងរឿងក្តីនេះច្រើនជាង១០០នាក់ ។ លោករូភើត អេបបុត នាយករងនៃគម្រោងការអាស៊ីប៉ាស៊ីហ្វិក របស់អង្គការលើកលែងទោសអន្តរជាតិ ថ្លែងថា «យើងមានភស្តុតាងបញ្ជាក់ថា មានបុគ្គលជាង១០០នាក់បានជាប់ពន្ធនាគារដោយសារគ្រាន់តែបង្ហាញពីជំនឿរបស់ពួកគេដោយសន្តិវិធី ។ រដ្ឋាភិបាលថ្មីរបស់លោកប្រធានាធិបតី Joko Widodo គួរលុបចោលរឿងរា៉វដ៏ស្មុគស្មាញនេះ និងមានយុទ្ធសាស្ត្រដើម្បីគោរពសិទ្ធិមនុស្ស» ។
ឥណ្ឌូណេស៊ី ជាប្រទេសដែលមានពលរដ្ឋមូស្ល៊ីមច្រើនបំផុតនៅលើពិភពលោក ។ អង្គការលើកលែងទោសអន្តរជាតិបានសង្កេតឃើញថា អ្នកដែលស៊ូទ្រាំក្រោមច្បាប់មើលស្រាលលើសាសនាបំផុត គឺបណ្តាក្រុមជនជាតិភាគតិច ។ ជាក់ស្តែងដូចជាករណីរបស់លោកថាជុល មូលុក មេដឹកនាំមូស្ល៊ីមនិកាយ «ស៊ីអាហ៍» កំពុងជាប់ពន្ធនាគារ៤ឆ្នាំពីបទមើលស្រាលលើសាសនា និងធ្វើឱ្យកើតមាន «ក្តីបារម្ភនៅក្នុងសង្គម» ។
លោកថាជុល មូលុក បានបើកសាលាបង្រៀនសាសនានៅភាគខាងកើតខេត្តជ្វា រហូតធ្វើឱ្យមេដឹកនាំមូស្ល៊ីមនិកាយ «សាសូ៊នី» ប្រឆាំងនឹងការបង្រៀននេះ ហើយចោទថាជា «ការបោកប្រាស់» និងត្រូវបានប៉ូលិសចាប់ខ្លួននៅឆ្នាំ២០១២ ពីបទមើលងាយលើសាសនា ។
ដោយសារមានគំនាបពីក្រុមប្រឆាំងចំពោះជន «ស៊ីអាហ៍» ពលរដ្ឋនៅក្នុងភូមិរបស់គេត្រូវបានបង្ខំឱ្យចាកចេញពីលំនៅឋាន ។ ករណីមួយផ្សេងទៀត គឺលោកអាឡិច សាន់ឌ័រ អានវ៉ាយ អាយុ៣០ឆ្នាំ ត្រូវបានចាប់ដាក់ពន្ធនាគាររយៈពេល២ឆ្នាំកន្លះ នៅក្នុងឆ្នាំ២០១២ពីបទផ្សព្វផ្សាយការយល់ឃើញតាមប្រព័ន្ធហ្វេសប៊ុក និងទទួលការគំរាមកំហែងពីក្រុមប្រឆាំងនោះ ។
លោករូភើត អេបប៊ុត បានបញ្ជាក់ទៀតថា «សិទ្ធិសេរីភាពផ្នែកសាសនាកំពុងធ្លាក់ចុះនៅឥណ្ឌូណេស៊ីក្នុងរយៈពេលជាច្រើនឆ្នាំកន្លងមកនេះ ដែលជារឿងគួរឱ្យបារម្ភបំផុត ។
បច្ចុប្បន្នរដ្ឋាភិបាលថ្មី ក្រោមការដឹកនាំរបស់លោកប្រធានាធិបតី Joko Widodo គឺមានឱកាសយកបញ្ហានេះមកដោះស្រាយឱ្យបានឆាប់» ៕
ចែករំលែកព័តមាននេះ