រាជធានីភ្នំពេញ ៖ សៀវ ង៉ុយ មកពីសមាគមកីឡាប្រដាល់ក្រសួងការពារជាតិ ដែលពីមុនមានឈ្មោះថា ឈិត ងុ៉យ បានធ្វើឱ្យ ហ៊ុល ដារ៉ា មកពីក្លិបសាលវ័ន្តកីឡា ចាញ់ការប្រកួតដោយពិន្ទុទាំងមិនអស់ចិត្ត ខណៈ លាស់ យីន មកពីក្លិបសម្រែករាជសីហ៍បង្ក្រាបគ្រឿងញៀន ដែលពីមុនមានឈ្មោះថា រាជសីហ៍ បាបា បានយកឈ្នះពិន្ទុ ជ័យ ប៊ុនសុង មកពីក្លិបខេមរិន្ទមានឫទ្ធិដោយពិន្ទុដូចគ្នា ។ ការប្រកួតរវាងអ្នកប្រដាល់ជើងខ្លាំងទាំង២គូខាងលើនេះ ធ្វើឡើងក្នុងឋានៈជាគូកិត្តិយសរបស់ក្រុមហ៊ុនស្រាបៀរលីអូ នៅលើសង្វៀនទូរទស្សន៍ CTN កាលពីថ្ងៃសៅរ៍ ទី២២ វិច្ឆិកា ។
ហ៊ុល ដារ៉ា ជាអ្នកប្រដាល់ចាស់វស្សា ប៉ុន្តែពេលមកប៉ះអ្នកប្រដាល់ស្រករក្រោយ សៀវ ង៉ុយ រាងយ៉ាប់បន្តិច ។ នៅក្នុងទឹកទី១ និងទី២ ហ៊ុល ដារ៉ា បានបើកការវាយសម្រុកទៅលើ ឈិត ង៉ុយ ប្រៀបបាននឹងខ្លាកំណាចឃើញកូនឈ្លូសអីុចឹង ។ ប៉ុន្តែរាល់ការដើរចូលវាយដោយខ្វះការប្រុងប្រយ័ត្នរបស់គេ ត្រូវឈិត ង៉ុយ បុកជង្គង់សងវិញយ៉ាងចាស់ដៃ ។ ទោះបីជាយ៉ាងណា ហ៊ុល ដារ៉ា នៅតែបង្ខំចិត្តដើរចូលវាយទៅលើ ឈិត ង៉ុយ វិញហាក់គ្មានកោតញញើតបន្តិចណាឡើយ ។ ចាប់ពីទឹកទី៣ ដល់ទឹកទី៥ ហ៊ុល ដារ៉ា នៅតែដើរចូលវាយទៅលើ ឈិត ង៉ុយ ដដែល និងកាន់តែសាហាវជាងមុនទៅទៀត ប៉ុន្តែកាន់តែដើរចូលវាយ កាន់តែត្រូវ សៀវ ង៉ុយ វាយត្រូវកាន់តែខ្លាំងជាងមុន ទើបចប់ការប្រកួត ហ៊ុល ដារ៉ា ត្រូវចាញ់ពិន្ទុទាំងមិនអស់ចិត្តឡើយ ។ គូនេះប្រកួតគ្នាក្នុងប្រភេទទម្ងន់៥៤គីឡូក្រាម ។
លាស់ យីន និងជ័យ ប៊ុនសុង ជួបគ្នាលើកនេះ ក៏មិនធម្មតាប៉ុន្មានដែរ ព្រោះអ្នកទាំង២សុទ្ធតែជាអ្នកប្រដាល់ចាស់វស្សាដូចគ្នា មានល្បិចប្រកួតនៅលើសង្វៀនក្រាស់ឃ្មឹកពេញខ្លួនដូចគ្នាទៀត ។ នៅទឹកទី១ និងទី២ កីឡាករទាំង២ មិនទាន់បើកការវាយសម្រុករកគ្នាភ្លាមៗនោះទេ ហាក់មានការកោតញញើតគ្នាទៅវិញទៅមក ។ ប៉ុន្តែគ្រាន់តែចូលដល់ទឹកទី៣ភ្លាម លាស់ យីន បានបញ្ជូនស្នៀតជើងទាត់សំដៅកញ្ចឹងក និងកណ្តៀតក្អម ជ័យ ប៊ុនសុង យ៉ាងពេញទំហឹងក្នុងបំណងផ្តួលឱ្យសន្លប់ ប៉ុន្តែត្រូវ ជ័យ ប៊ុនសុង វាយម៉ាត់សងវិញយ៉ាងចាស់ដៃ ។ ជ័យ ប៊ុនសុង ហាក់បីដូចជាចាញ់ប្រៀបកម្លាំង លាស់ យីន បន្តិចនៅពេលការប្រកួតឈានចូលដល់ទឹកទី៤ និងទី៥ ដែលជាឱកាសសម្រាប់ លាស់ យីន វាយលុកតាមអំពើចិត្ត ។ ទោះបីយ៉ាងណា លាស់ យីន ដែលមិនសូវមានភាពស្ទាត់ជំនាញខាងប្រើស្នៀតកែង និងជង្គង់នោះ មិនអាចវាយគូប្រកួតឱ្យសន្លប់ឡើយ បានត្រឹមតែយកឈ្នះពិន្ទុ ជ័យ ប៊ុនសុង ទាំងលំបាកបំផុត ។ គូនេះប្រកួតគ្នាក្នុងប្រភេទទម្ងន់៦០គីឡូក្រាម ៕
ចែករំលែកព័តមាននេះ