រាជធានីភ្នំពេញ ៖ សម្តេចចៅហ្វាវាំង គង់ សំអុល អនុប្រធានអចិន្ត្រៃយ៍កាកបាទក្រហមកម្ពុជា កាលពីថ្ងៃទី២១ វិច្ឆិកា ២០១៤ បានបើកសម័យប្រជុំដំបូងនៃគណៈកម្មការ និងអនុគណៈកម្មការរៀបចំកិច្ចប្រជុំថ្នាក់ដឹកនាំកាកបាទក្រហម អឌ្ឍចន្ទក្រហម ភូមិភាគអាស៊ីអាគ្នេយ៍លើកទី១២ ដែលនឹងចាប់ផ្តើមនាពេលខាងមុខនេះ នៅទីស្នាក់ការកណ្តាលកាកបាទក្រហមកម្ពុជា។
កិច្ចប្រជុំបានដំណើរការលើរបៀបវីរៈមួយចំនួន ក្នុងនោះមាន អំណានសេចក្តីសម្រេចស្តីពីការចាត់តាំងគណៈកម្មការ និងអនុគណៈកម្មការរៀបចំកិច្ចប្រជុំថ្នាក់ដឹកនាំកាកបាទក្រហម អឌ្ឍចន្ទក្រហមភូមិភាគអាស៊ី អាគ្នេយ៍លើកទី១២។ ការណែនាំពីតួនាទី ភារកិច្ចគណៈកម្មការ និងអនុគណៈកម្មការ និងការពិភាគ្សាលើបញ្ហាផ្សេងៗមួយចំនួនដើម្បីឱ្យការរៀបចំទទួលគណៈប្រតិភូថ្នាក់ដឹកនាំកាកបាទក្រហម អឌ្ឍចន្ទក្រហមភូមិភាគអាស៊ីអាគ្នេយ៍បានទទួលជោគជ័យត្រចេះត្រចង់។
លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជាបានអានសេចក្តីសម្រេចស្តីពីការតែងតាំងគណៈកម្មការ និងអនុគណៈកម្មការនីមួយៗ ដើម្បីបំពេញតួនាទីភារកិច្ចរបស់ខ្លួនក្នុងការទទួលបដិសណ្ឋារកិច្ចចំពោះភ្ញៀវឱ្យបានល្អ។
កិច្ចប្រជុំថ្នាក់ដឹកនាំកាកបាទក្រហម អឌ្ឍចន្ទក្រហមភូមិភាគអាស៊ីអាគ្នេយ៍លើកទី១២ គ្រោងធ្វើឡើងនៅថ្ងៃទី២៤-២៧ កុម្ភៈ ២០១៥ ដោយមានសមាគមជាតិនៃប្រទេសនីមួយៗ ក្នុងសមាគមជាតិអាស៊ីអាគ្នេយ៍(អាស៊ាន)ចូលរួមរាប់ទាំងប្រទេសកម្ពុជាផង។
សម្តេចចៅហ្វាវាំង គង់ សំអុល ប្រធានអង្គប្រជុំបានសំណូមពរអោយគណៈកម្មការ និងអនុគណៈកម្មការនីមួយៗដែលបានតែងតាំងហើយ ត្រូវធ្វើការងាររបស់ខ្លួនប្រកបដោយភាពទទួលខុសត្រូវខ្ពស់ ដើម្បីមុខមាត់របស់កាកបាទក្រហមកម្ពុជា ក្នុងនាមជាម្ចាស់ផ្ទះរៀបចំកិច្ចប្រជុំថ្នាក់ដឹកនាំកាកបាទក្រហម អឌ្ឍចន្ទក្រហម ភូមិភាគអាស៊ីអាគ្នេយ៍លើកទី១២៕
ចែករំលែកព័តមាននេះ