រាជធានីភ្នំពេញ ៖ បុរសជាកម្មករសំណង់ម្នាក់បានធ្វើដំណើរដោយថ្មើរជើងឡើងលើស្ពានជ្រោយចង្វារប៉ុនប៉ងលោតទឹកសម្លាប់ខ្លួន តែត្រូវប៉ូលិសឃាត់នាំមកកាន់ស្នាក់ការនគរបាលការពារស្ពានដើម្បីសួរនាំ។ ហេតុការណ៍នេះបានបង្កឱ្យមានការភ្ញាក់ផ្អើលកាលពីវេលាម៉ោង១២ និង៥០នាទីថ្ងៃត្រង់ នៅចំណុចលើស្ពានជ្រោយចង្វារផ្នែកខាងលិច ស្ថិតក្នុងសង្កាត់ស្រះចក ខណ្ឌដូនពេញ ។
បុរសដែលគិតខ្លីប៉ងសម្លាប់ខ្លួនឈ្មោះពៅ ជីវ័ន្ត អាយុ១៦ឆ្នាំ ជាកម្មករសំណង់ មានទីលំនៅភូមិសំរោង ឃុំកំពង់ថ្ម ស្រុកបារាយណ៍ ខេត្តកំពង់ធំ ។
ប្រភពបានឱ្យដឹងថា មុនពេលកើតហេតុគេឃើញបុរសខាងលើដើរឆ្លងស្ពានជ្រោយចង្វារពីកើតទៅលិច ពេលមកដល់ចំណុចកំផែងខាងលិចជនរងគ្រោះបានឡើងលើបង្កាន់ដៃស្ពានហើយផ្លោះទៅឈរខាងក្រៅបង្កាន់ដៃស្ពានបម្រុងលោតសម្លាប់ខ្លួន តែត្រូវសមត្ថកិច្ចការពារស្ពានឃើញទាន់ក៏ឃាត់លួងលោមនាំមកស្នាក់ការនគរបាលការពារស្ពានដើម្បីសាកសួរ។
សមត្ថកិច្ចបានឱ្យដឹងថា មូលហេតុដែលបុរសខាងលើគិតខ្លីប៉ុនប៉ងលោតទឹកសម្លាប់ខ្លួនដោយសារតូចចិត្ត និងខឹងមេការសំណង់បើកយកលុយប្រាក់ខែរបស់គេចំនួន៣០ម៉ឺនរៀលយកទៅបាត់អស់។ មេការសំណង់នោះត្រូវកម្មកសំណង់ខាងលើប្រាប់ឱ្យដឹងថា ឈ្មោះធុច ថុន ជាអ្នកស្គាល់គ្នាដែលបាននាំរូបគេមកធ្វើការងារសំណង់ជាមួយទើបបានជាង១ខែប៉ុណ្ណោះ។
ក្រោយពីសាកសួររួច សមត្ថកិច្ចបានឱ្យសោហ៊ុយខ្លះទៅជនរងគ្រោះ និងនាំទៅជិះរថយន្តត្រឡប់ទៅស្រុកកំណើតវិញ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ