ខេត្តប៉ៃលិន ៖ បុរសម្នាក់ បានជិះម៉ូតូទៅទារលុយជំពាក់ពីបុរសម្នាក់ទៀត ដែលត្រូវជាសាច់ញាតិលុះទៅដល់ អ្នកជំពាក់គេចោទថា ជេររូបគេបណ្តាលឱ្យខឹង ហើយពេលអ្នកទារលុយជិះម៉ូតូត្រឡប់ទៅវិញ ក៏ជិះម៉ូតូដេញបុក ដួលធ្លាក់ប្រឡាយអត់ទឹក រួចយកដំបងវាយថែមទៀត ។ ក្រោយមកភាគីរងរបួសខឹងក៏ហៅឱ្យបងបង្កើតរបស់ខ្លួនយកកាំបិតប៉័ងតោចូលទៅកាប់ភាគីម្ខាងទៀតនៅក្នុងផ្ទះ បណ្តាលឱ្យរងរបួសរៀងខ្លួន ហើយក៏ត្រូវសមត្ថកិច្ចចាប់ឃាត់ខ្លួនយកទៅស្នងការដ្ឋាននគរបាលខេត្តប៉ៃលិនទាំងអស់គ្នា ។
ហេតុការណ៍កាប់ចាក់គ្នាដោយសារតែជំពាក់លុយ២ម៉ឺនរៀលនេះ បានកើតឡើងកាលពីវេលាម៉ោង៦ និង១០នាទីល្ងាច ថ្ងៃទី២២ វិច្ឆិកា ២០១៤ ស្ថិតនៅចំណុចក្បែរស្តង់អេតចាយ ក្នុងភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ។
ជនជិះម៉ូតូទៅទារលុយគេជំពាក់២ម៉ឺនរៀលហើយត្រូវគេជិះម៉ូតូបំបុកធ្លាក់ប្រឡាយនិង វាយថែមទៀត ឈ្មោះ ធូ ភេទប្រុស អាយុប្រហែល៣៦ឆ្នាំ រងរបួសរយះក្បាលផ្នែកខាងឆ្វេង និងបងបង្កើតរបស់គេ ឈ្មោះ ធី អាយុប្រហែល៣៨ឆ្នាំ អត់រងរបួស ត្រូវជាប្អូនថ្លៃ ។ ចំណែកភាគីម្ខាងទៀត ឈ្មោះ វីរៈ ភេទប្រុស អាយុប្រហែល៣៩ឆ្នាំ ត្រូវជាបងថ្លៃ រងរបួសរយះក្បាលផ្នែកខាងលើ និងដៃស្តាំ ទាំងអស់គ្នាជាអាជីវករកាប់ជ្រូក លក់សាច់ជ្រូកនៅផ្សារសាមគ្គីហៅ ប៉ាហ៊ី ក្នុងភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ។
សូមបញ្ជាក់ថា ឈ្មោះ ធី ត្រូវជាប្អូនថ្លៃ រីឯ ឈ្មោះ វីរៈ ត្រូវជាបងថ្លៃ ហើយក៏កាប់ចាក់គ្នា ដោយសារតែរឿងរ៉ាវជំពាក់លុយចំនួន២ម៉ឺនរៀល ។
ព័ត៌មានលម្អិតនឹងមានផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ