រាជធានីភ្នំពេញ ៖ ព្រះរាជក្រឹត្យឡាយព្រះហស្ថលេខាដោយព្រះមហាក្សត្រកាលពីថ្ងៃទី១៦ វិច្ឆិកា និងត្រូវបានចម្លងនៅថ្ងៃទី២១ វិច្ឆិកា បានត្រាប់បង្គាប់ឱ្យបញ្ចប់មុខតំណែងលោកជំទាវ សម មុន្នីកា ពីរដ្ឋលេខាធិការក្រសួងទេសចរណ៍ដោយយោងតាមសាមីខ្លួនសុំលាលែង ។
លោកជំទាវ សម មុន្នីកា បានប្រឈមនឹងការរិះគន់នូវទង្វើរបស់លោកជំទាវ បន្ទាប់ពីឧបទ្ទវហេតុដែលនឹកស្មានមិនដល់នៅស្រុកកូនមុំ ខេត្តរតនគិរី ដែលកើតឡើងដោយរថយន្តឈ្នួលប្រភេទទេសចរណ៍ ម៉ាកសាំយ៉ុង ពណ៌សម្បកឪឡឹក បានជ្រុលចង្កូតធ្លាក់ផ្លូវ បុ៉ន្តែមិនបណ្តាលឱ្យមានរបួសស្នាមអ្វីទេ ។ ។
ហេតុការណ៍នេះបានធ្វើឱ្យមានការភ្ញាក់ផ្អើលតាមរយៈព័ត៌មានមួយចំនួនដែលបានផ្សព្វផ្សាយតាមបណ្តាញសង្គមហ្វេសប៊ុក ចំពោះការទាមទារសំណងពីអ្នកបើកបរដែលក្រីក្ររហូតដល់ទៅ៤ពាន់ដុល្លារជាជំងឺចិត្ត ជាតម្លៃនៃការភ័យលស់ព្រលឹងរបស់លោកជំទាវជាអ្នកជិះក្នុងនោះ ។
លោក រស់ សុភារិទ្ធ មន្ត្រីបម្រើការនៅមន្ទីរទេសចរណ៍រាជធានីភ្នំពេញ បាននិយាយពីហេតុការណ៍នោះថា មុនកើតហេតុអ្នកបើកបររថយន្តបានបើកល្បឿនលឿន គឺបើកជែងគ្នាជាមួយរថយន្តមួយទៀត ។ លុះដល់ចំណុចផ្លូវកោងបន្តិច ក៏ឃើញឆ្កែរត់កាត់ ហើយមិនឃើញអ្នកបើកបរបន្ថយល្បឿនទេ ។ ពេលបន្ថយល្បឿនរថយន្តក៏ដាច់រូ៉ទីល ទើបមានការធ្លាក់ចេញពីផ្លូវ បុ៉ន្តែរថយន្តនៅតែបន្តទៅមុខទៀតរហូតដល់ធ្លាក់ប្រឡាយ ទើបរថយន្តអស់ល្បឿន ។
តាមការរៀបរាប់របស់លោក រស់ ភារិទ្ធ ឱ្យដឹងទៀតថា ក្នុងឧបទ្ទវហេតុនោះមានអ្នកធ្វើដំណើរ មានក្រុមការងារពីក្រសួងទេសចរណ៍ និងមន្ទីរទេសចរណ៍ចំនួន៤នាក់ និងអ្នករួមដំណើរតាមរថយន្តប្រមាណ១០នាក់ ។ ក្រោយកើតហេតុ ឃើញមានអ្នករួមដំណើររងគ្រោះថ្នាក់មិនធ្ងន់ធ្ងរទេ គឺអ្នកខ្លះបែកច្រមុះ របួសជើង ក្បាល ដោយអ្នករួមដំណើរមិនគ្រោះថ្នាក់ធ្ងន់ធ្ងរ ក៏បន្តដំណើរទៅមុខទៀត ។ ចំណែកថ្នាក់ដឹកនាំក្រសួងទេសចរណ៍ លោកជំទាវ សមមុន្នីកា បានស្នើឱ្យមេបុ៉ស្តិ៍ប្រចាំនៅតំបន់នោះមើល និងសរសេរកំណត់ហេតុ ដោយប្តឹងទារ៤.០០០ដុល្លារ ។
ក្រោយមកក៏បែកធ្លាយតាមរយៈបណ្តាញសង្គមហ្វេសប៊ុក ដោយធ្វើការរិះគន់ដល់កាយវិការនេះយ៉ាងចាស់ដៃ ។ បុ៉ន្តែតាមរយៈការសម្ភាសន៍តាមទូរទស្សន៍ លោកជំទាវបាននិយាយថា ប្រាក់៤.០០០ដុល្លារនោះ នឹងប្រគល់ដល់កាកបាទក្រហម តែក៏ត្រូវបដិសេធភ្លាមៗដោយលោកជំទាវ ពុំ ចន្ទីនី ព្រោះជាប្រាក់មិនស្អាត ។ ដោយសារការទារសំណងថ្លៃលស់ព្រលឹង៤ពាន់ដុល្លារពីអ្នកបើករថយន្តឋានៈតូចទាប ក៏បានធ្វើឱ្យសាធារណៈមតិមានការចាប់អារម្មណ៍ និងថ្កោលទោសឡើងរញ្ជួយអាកាស ៕
ចែករំលែកព័តមាននេះ