រាជធានីភ្នំពេញ ៖ លោកសម រង្ស៊ីប្រធានគណបក្សសង្គ្រោះជាតិ បានថ្លែងប្រាប់អ្នកកាសែតកាលពីថ្ងៃទី២១ វិចិ្ឆកាថា រូបលោកនឹងពិភាក្សាជាមួយសមាជិកសភាទាំងអស់របស់គណបក្សសង្គ្រោះជាតិ ដើម្បីធ្វើយ៉ាងណាបញ្ចូលឈ្មោះលោក មាជ សុវណ្ណារ៉ា ក្នុងបញ្ជីតំណាងរាស្ត្ររបស់គណបក្សសង្គ្រោះជាតិ ។ បន្ទាប់មករូបលោកផ្ទាល់នឹងជួបជាមួយសម្តេចតេជោ ហ៊ុន សែន នាយករដ្ឋមន្ត្រី ដើម្បីពិភាក្សាក្នុងគោលបំណងស្នើសុំដោះលែងលោក មាជ សុវណ្ណារ៉ា ។ ការថ្លែងរបស់លោក សម រង្ស៊ី ធ្វើឡើងនៅក្នុងពិធីបង្សុកូលរំលឹកខួបនៃអ្នកស្លាប់ក្បែរស្ពានពេជ្រកាលពីឆ្នាំ២០១១ កន្លងទៅ ។
លោក សម រង្ស៊ី ថ្លែងថា គណបក្សទាំងពីរគឺ គណបក្សប្រជាជនកម្ពុជា និងគណបក្សសង្គ្រោះជាតិត្រូវខិតខំដោះស្រាយបញ្ចប់ស្ថានភាពតានតឹងផ្នែកនយោបាយក្នុងប្រទេសកម្ពុជានាពេលបច្ចុប្បន្ននេះ ។ ស្ថានភាពតានតឹងទាំងនោះកើតឡើងក្រោយពេលបោះឆ្នោតជាតិឆ្នាំ២០១៣ ក្នុងនោះកាលពីថ្ងៃទី២២ កក្កដា ឆ្នាំ២០១៤ គណបក្សទាំងពីរបានចុះហត្ថលេខាចង់បញ្ចប់ស្ថានភាពតានតឹងសៅហ្មងដែលនាំផលវិបាកដល់ប្រទេសជាតិ ។
លោក សម រង្ស៊ី ក៏លើកឡើងថា លោកមានគម្រោងជួបជាមួយសម្តេចតេជោនាយករដ្ឋមន្ត្រី ហ៊ុន សែន ព្រោះរូបលោកស្រឡាញ់វប្បធម៌សន្តិភាព និងដំណោះស្រាយប្រកបដោយសន្តិវិធី គឺលោកគាំទ្រជានិច្ច ចំពោះវប្បធម៌ជួបសន្ទនារកដំណោះស្រាយត្រឹមត្រូវតាមសន្តិវិធី ។ នៅពេលសួរថា លោកយល់យ៉ាងម៉េចចំពោះករណីលោក មាជ សុវណ្ណារ៉ា ដែលប្រមុខរាជរដ្ឋាភិបាលបានអះអាងថា ជានីតិវិធីរបស់តុលាការ ?
លោក សម រង្ស៊ី ថ្លែងថា យើងនឹងធ្វើតាមនីតិវិធីច្បាប់ យើងនឹងចាត់វិធានការដើម្បីឱ្យលោក មាជ សុវណ្ណារ៉ា មានអភ័យឯកសិទ្ធិសភាក្នុងឋានៈជាតំណាងរាស្ត្រ ។ ចំណែកឯការចាប់ខ្លួនព្រះសង្ឃវិញ លោកបានពិភាក្សាជាមួយមិត្តភក្តិជាតិ និងអន្តរជាតិដើម្បីដោះស្រាយភាពតានតឹងនេះឱ្យទៅជាធូរស្រាលដូចកិច្ចព្រមព្រៀងថ្ងៃទី២២ កក្កដា មានស្រាប់ ព្រោះការចាប់ខ្លួនសកម្មជន និងមន្ត្រីគណបក្សសង្គ្រោះជាតិ មិនមែនជាសម្ពាធសម្រាប់គណបក្សសង្គ្រោះជាតិទេ ។
លោក សម រង្ស៊ី ថ្លែងបញ្ជាក់ថា ការចាប់ខ្លួននេះវាមិនមែនជាសម្ពាធទេ អ្វីក៏ដោយវាស្ថិតនៅលើខ្លួនយើង បើខ្លួនយើងរឹងមាំ ទោះបីជាមានសម្ពាធយ៉ាងណា ក៏មិនអាចប៉ះពាល់ដល់យើងដែរ ។ យើងគាំទ្រ និងលើកតម្កើងលទ្ធិប្រជាធិបតេយ្យ ប៉ុន្តែពេលនេះយើងបានសុខស្រួលប៉ុណ្ណា យើងទទួលយកប៉ុណ្ណឹងសិនចុះ» ។ លោក សម រង្ស៊ី បានថ្លែងថា លោកសង្ឃឹមថា នឹងជួបជាមួយនាយករដ្ឋមន្ត្រី ហ៊ុន សែន រកដំណោះស្រាយប្រកបដោយសន្តិភាពនៅសប្តាហ៍ក្រោយនេះ ៕
ចែករំលែកព័តមាននេះ