រាជធានីភ្នំពេញ ៖ នារីពីរនាក់ត្រូវក្រុមចោរប្រដាប់អាវុធចំនួន២នាក់ជិះម៉ូតូហុងដាឌ្រីម សេ១២៥ មួយគ្រឿងស្ទាក់ផ្លូវដកកាំភ្លើងវាយនិងបាញ់មួយគ្រាប់ចំបញ្ឆិត.ក នារីរងគ្រោះបណ្តាលឱ្យនារីម្នាក់រងរបួសហើយក្រុមចោរបានប្លន់យកម៉ូតូម៉ាក MSX មួយគ្រឿងរបស់នារីរងគ្រោះជិះគេចខ្លួនដោយសុវត្ថិភាព ។ ហេតុការណ៍នេះកើតឡើងកាលពីវេលាម៉ោង ៧ និង ១០នាទីយប់ ថ្ងៃទី ២១ វិច្ឆិកា ២០១៤ នៅចំណុចផ្លូវលំ ស្ថិតក្នុងភូមិរោងចក្រ សង្កាត់ភ្នំពេញថ្មី ខណ្ឌសែនសុខ ។
នារីរងគ្រោះទី១.ឈ្មោះ សុ មុនីភក្រ័ត្រា អាយុ២០ឆ្នាំ ត្រូវចោរបាញ់ចំមួយគ្រាប់បណ្តាលឱ្យរងរបួស ចំណែកនារីរងគ្រោះទី២.ឈ្មោះ ឈឿន ចាន់ដា អាយុ២០ឆ្នាំ។ នារីរងគ្រោះទាំងពីរនាក់ ស្នាក់នៅក្នុងភូមិដីថ្មី សង្កាត់ភ្នំពេញថ្មី ខណ្ឌសែនសុខ ។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុនារីរងគ្រោះទាំងពីរនាក់បានជិះម៉ូតូមួយគ្រឿង ម៉ាកMSX ពណ៌ស អត់មានពាក់ស្លាកលេខទេ ដោយធ្វើដំណើរតាមផ្លូវភ្នំពេញ-ហាណួយ ក្នុងគោលបំណងទៅផ្សារ សិនជូរីផ្លាហ្សា ខណៈបើកម៉ូតូមកដល់ចំណុចផ្លូវលំ ក្នុងភូមិរោងចក្រក៏មានក្រុមចោរពីរនាក់ ជិះម៉ូតូហុងដាឌ្រីម ពណ៌ខ្មៅ មួយគ្រឿង បានមកស្ទាក់ផ្លូវនារីរងគ្រោះឱ្យឈប់រួចដកកាំភ្លើងវាយនារីរងគ្រោះ និងបាញ់មួយគ្រាប់ ចំបញ្ឆិត.ក នារីរងគ្រោះឈ្មោះ សុ មុនីភក្រ័ត្រា បណ្តាលឱ្យរបួស។បន្ទាប់មកក្រុមចោរក៏បានយកម៉ូតូរបស់នារីរងគ្រោះជិះគេចខ្លួនដោយសុវត្ថិភាព។
ក្រោយពេលកើតហេតុនារីរងគ្រោះដែលរងរបួសត្រូវបានគេបញ្ជូនទៅសង្រ្គោះ នៅមន្ទីរពេទ្យ ចំណែកនារីរងគ្រោះដែលមិនមានរងរបួសបានទៅដាក់ពាក្យបណ្តឹងនៅអធិការដ្ឋាននគរបាលខណ្ឌសែនសុខ ដើម្បីឱ្យសមត្ថកិច្ចជួយស្រាវជ្រាវ យកម៉ូតូរបស់នាងត្រឡបើមកវិញ ។
ចែករំលែកព័តមាននេះ