យោងតាមប្រភពព័ត៌មានពី BBC ឱ្យដឹងថា នាយកប្រត្តិបត្តិក្រុមហ៊ុន Chonghaejin Marine Company ម្នាក់ក្នុងចំណោមអ្នក ត្រួតពិនិត្យការបើកនាវា Sewol ជាច្រើននាក់ផ្សេងទៀតគឺលោក Kim Han sik អាយុ៧១ឆ្នាំ ត្រូវបានកាត់ទោសឱ្យជាប់ពន្ធនាគាររយៈពេល១០ឆ្នាំពីបទធ្វើឱ្យលិចនាវា Sewol កាលពីថ្ងៃទី១៦ មេសា ឆ្នាំ២០១៤ ស្ថិតក្នុងភាគនិរតីនៃឆ្នេរខ្សាច់ប្រទេសកូរ៉េខាងត្បូងដោយការធ្វេសប្រហែសចេតនា ។
តុលាការក្នុងស្រុក Gwangju កាលពីសប្តាហ៍មុន ក៏បានកាត់ទោសសហសេវិក១៥នាក់ផ្សេងទៀតរបស់គាត់ឱ្យជាប់ពន្ធនាគារពី៥ឆ្នាំ ទៅ៣៦ឆ្នាំ ។ អ្នកស៊ើបអង្កេតជុំវិញការលិចនាវា Sewol រកឃើញថា មូលហេតុដែលនាំឱ្យនាវាលិចគឺបណ្តាលមកពីការផ្ទុកទំនិញហួសកម្រិត ពោលគឺចំណុចកណ្តាលរបស់នាវាកាន់តែធ្ងន់ទៅៗ ទើបបណ្តាលឱ្យនាវាមួយគ្រឿងនេះលិច ។
មនុស្ស៣០៤នាក់ក្នុងនោះសុទ្ធសឹងជាសិស្សសាលាកូរ៉េបានស្លាប់ក្នុងឧបទ្ទវហេតុលិចនាវានេះ ហើយ១៧២នាក់ផ្សេងទៀតរួចផុតពីស្លាប់ក្នុងចំណោមអ្នកធ្វើដំណើរ និងសហសេវិក៤៧៦ នាក់ដែលស្ថិតនៅលើនាវា Sewol ។ លោក Kim Han Sik បានសុំខមាទោសសមាជិកក្រុមគ្រួសារជនរងគ្រោះចំពោះហេតុការណ៍លិចនាវានេះ ហើយព្រមទទួលទោសតាមការសម្រេចរបស់តុលាការក្នុងស្រុកផងដែរ ៕
ចែករំលែកព័តមាននេះ