ដោយដកស្រង់សម្តីរបស់បណ្តាអ្នកទទួលខុសត្រូវក្រុមឧទ្ទាមកងទ័ពដើម្បីឯករាជ្យកាជីន KIA សារព័ត៌មានក្នុងស្រុកភូមារាយការណ៍កាលពីថ្ងៃទី២០ វិច្ឆិកា ថា មនុស្សទើបជ្រើសរើសថ្មី២២នាក់ បានស្លាប់ ហើយ១៤នាក់ទៀតត្រូវរបួស ដោយសារការបាញ់កាំភ្លើងធំប្រឆាំងសាលាហ្វឹកហ្វឺនយោធាមួយរបស់ក្រុម KIA ស្ថិតនៅជិតទីក្រុងឡាអុីហ្សា រដ្ឋកាជីន ចុងខាងជើងភូមា ។
យោងតាមព័ត៌មាននានាថា គ្រាប់កាំភ្លើងធំបានធ្លាក់លើសាលាហ្វឹកហ្វឺនទ័ពនោះ ដែលស្ថិតនៅចម្ងាយ៥គីឡូម៉ែត្រភាគឦសានក្រុងឡាអុីហ្សា កាលពីថ្ងៃទី១៩ វិច្ឆិកា វេលាម៉ោង១២និង២០នាទី ម៉ោងក្នុងស្រុក ខណៈមានការប៉ះទង្គិចគ្នាដោយអាវុធរវាងកងទ័ពរដ្ឋាភិបាល និងពួកឧទ្ទាម KIA ដែលផ្ទុះឡើងមុននេះ ។
ពុំមានសេចក្តីរាយការណ៍ណាមួយរបស់រដ្ឋាភិបាលអំពីឧប្បត្តិហេតុនេះនៅឡើយ ។ ក្រុងឡាអុីហ្សា ជាមូលដ្ឋានរបស់ក្រុម KIA ។ ភាគីទាំង២ធ្លាប់ប៉ះទង្គិចគ្នាកាលពីខែមេសា ក្នុងតំបន់នានានៃរដ្ឋកាជីន ។ នៅចុងខាងជើងភូមា ជម្លោះមានការកើនឡើងរវាងកងទ័ពរដ្ឋាភិបាល និងពួកឧទ្ទាមកាជីន ដែលបដិសេធពុំព្រមចាកចេញពីទីតាំងរបស់ខ្លួន ស្ថិតនៅជាប់ព្រំដែនចិន ។ អ្នកសង្កេតការណ៍ម្នាក់ដែលមិនបញ្ចេញឈ្មោះ រាយការណ៍ប្រាប់ AFP ថា កងទ័ពភូមាបានវាយប្រហារតាមឧទ្ធម្ភាគចក្រប្រយុទ្ធ និងបាញ់កាំភ្លើងធំធុនធ្ងន់លើទីតាំងពួកឧទ្ទាម ។
អ្នកនាំពាក្យម្នាក់របស់អង្គការដើម្បីឯករាជ្យភាពកាជីន មានមូលដ្ឋាននៅប្រទេសថៃនិយាយថា ចាប់តាំងពីប៉ុន្មានថ្ងៃមកហើយ ការប្រយុទ្ធគ្នាមានសភាពខ្លាំងក្លា ។
អគ្គលេខាធិការអង្គការសហប្រជាជាតិ លោកបាន គីមូន បានអំពាវនាវដល់អាជ្ញាធរភូមា ឱ្យបញ្ឈប់រាល់សកម្មភាពដែលអាចបង្កគ្រោះថ្នាក់ដល់អាយុជីវិតជនសុីវិលក្នុងតំបន់នោះ ឬធ្វើឱ្យជម្លោះកាន់តែធ្ងន់ធ្ងរថែមទៀត នៅទីនោះ ។
ចំណែកស្ថានទូតអាមេរិក ប្រចាំក្រុងរ៉ង់ហ្គូន សម្តែងការព្រួយបារម្ភចំពោះសភាពការណ៍ក្នុងរដ្ឋកាជីន ។
ក្រោយ១៧ឆ្នាំ នៃបទឈប់បាញ់គ្នា ការប្រយុទ្ធគ្នាផ្ទុះឡើងវិញ រយៈពេល១៨ខែមកហើយ រវាងកងទ័ពភូមា និងពួកឧទ្ទាមកាជីន ញុាំងឱ្យប្រជាជនយ៉ាងច្រើនរត់ភៀសខ្លួន ។ បទឈប់បាញ់គ្នាត្រូវកាត់ផ្តាច់កាលពីខែមិថុនា ឆ្នាំ២០១១ រវាងកងទ័ពរដ្ឋាភិបាល និងពួក KIA ។ ការប្រយុទ្ធគ្នាកើតមានវិញ ព្រោះតែរដ្ឋាភិបាលកណ្តាលចង់ឱ្យពួក KIA ធ្វើសមាហរណកម្មចូលក្នុងកងទ័ពរៀបរយ ហើយក្លាយទៅជាកងឆ្មាំព្រំដែន ។ រឿងបែបនេះ គេឃើញនៅគ្រប់ទីកន្លែងតាមបណ្តោយព្រំដែនភូមា ក្នុងអ្វីដែលគេហៅថាតំបន់ជនជាតិភាគតិច ។ រដ្ឋាភិបាលទទួលបានជោគជ័យក្នុងការចរចាជាមួយពួកការ៉ែន ពួកមន និងពួកសារនៅភាគខាងជើងប្រទេស ក៏ប៉ុន្តែជាមួយពួកកាជីន បែរជាជាប់គាំង ។
ដោយសារការប្រយុទ្ធគ្នារវាងកងទ័ពភូមា និងពួក KIA ប្រជាជនសុីវិលបាននាំគ្នាភៀសខ្លួនពីកន្លែងមួយទៅកន្លែងមួយទៀត ហើយសាកល្បងឆ្លងដែនចូលទៅប្រទេសចិន តែត្រូវចិនរុញច្រាន ។ ដូច្នេះពួកគេភាគច្រើន ស្ថិតក្នុងតំបន់ត្រួតត្រាដោយពួកឧទ្ទាមកាជីន ហើយក្នុងតំបន់នោះពួកគេពុំបានទទួលជំនួយមនុស្សធម៌ណាមួយឡើយ ៕
ចែករំលែកព័តមាននេះ