កាសែត Gulf News របស់អេមីរា៉តអារា៉ប់រួម កាលពីពេល ថ្មីៗនេះផ្សាយថា កូនកំលោះម្នាក់នៅទីក្រុង Medinah ប្រទេសអារា៉ប៊ីសាអូឌីត បានប្រកាសផ្តាច់ចំណងមេត្រីភាពពីកូនក្រមុំ ភ្លាមៗក្នុងពេលកំពុងរៀបការ ខណៈនាងបើកស្បៃឃ្លុំមុខ ។
តើហេតុអីគ្រាន់តែកូនក្រមុំបើកស្បៃមុខ កូនកំលោះផ្តាច់ចំណងស្នេហ៍ភ្លាម ?
បុរសជាកូនកំលោះបានថ្លែងប្រាប់កូនក្រមុំដែលជាគូអាពាហ៍ពិពាហ៍របស់ខ្លួនថា នាងមិនសក្តិសមជាគូជីវិតរបស់គេទេ ព្រោះមិនដូចអ្វីជាក្តីស្រមៃរបស់គេ ។ នាងមិនមែនជានារីដែលគេគួររៀបការជាមួយ ដូច្នេះសុំកាត់ផ្តាច់ចំណងស្នេហ៍ និងឈប់រៀបការតែម្តង ។
សារព័ត៌មានក្នុងស្រុកបញ្ជាក់ថា គូអាពាហ៍ពិពាហ៍នោះមិនបានស្គាល់មុខគ្នានៅមុនពេលរៀបការទេ ទោះបីប្រពៃណីទំនៀមទម្លាប់អនុញ្ញាតឱ្យកូនកំលោះកូនក្រមុំអាចជួបមុខគ្នានៅមុនពេលរៀបអាពាហ៍ពិពាហ៍ក្តី ។
ប្រឈមមុខនឹងរឿងស្មានមិនដល់ គឺកូនកំលោះសុំឈប់រៀបការបែបនោះ នារីជាកូនក្រមុំបានទ្រហោយំនៅចំពោះមុខភ្ញៀវដែលចូលរួម ។ នារីជាកូនក្រមុំខកចិត្ត និងអាមា៉ស់យ៉ាងខ្លាំង ។
ក្រោយពេលរឿងរា៉វនោះបែកខ្ចរខ្ចាយតាមទំព័រហ្វេសប៊ុកមក មហាជនបានបន្ទោសកូនកំលោះថា ជាមនុស្សគ្មានការទទួលខុសត្រូវ ។ លើសពីនេះគេបន្ទោសកូនកំលោះ និងកូនក្រមុំថា ពួកគេគួរតែជួបគ្នាមុនពេលរៀបការទើបល្អ ៕
ចែករំលែកព័តមាននេះ