រាជធានីភ្នំពេញ ៖ បុរសពីរនាក់ដែលជាអ្នកជួញដូរនិងអ្នកទិញគ្រឿងញៀនខុសច្បាប់ត្រូវបានកម្លាំងនគរបាលប៉ុស្តិ៍ផ្សារដើមថ្កូវ ធ្វើការឃាត់ខ្លួនបាន នៅពេលដែលពួកគេកំពុងតែធ្វើសកម្មភាពលក់និងទិញ ។ ជនសង្ស័យទាំងពីរនាក់ ត្រូវបានកម្លាំងនគរបាលធ្វើការឃាត់ខ្លួនបាន កាលពីវេលាម៉ោង១០ និង១៥នាទីព្រឹក ថ្ងៃទី២០ ខែវិច្ឆិកា ឆ្នាំ២០១៤ នៅចំណុចមុខផ្ទះគ្មានលេខមួយកន្លែង ស្ថិតនៅច្រកផ្លូវឌឿងហែមព្រះមុនីវង្ស ក្នុងសង្កាត់ផ្សារដើមថ្កូវ ខណ្ឌចំការមន ។
តាមប្រភពព័ត៌មានពីមន្ត្រីនគរបាលម្នាក់បានប្រាប់អោយដឹងថា ជនសង្ស័យជាអ្នកជួញដូរ និងអ្នកទិញទាំងពីរនាក់ ដែលកម្លាំងនគរបាលធ្វើការឃាត់ខ្លួនបាននេះ មានទី១-ឈ្មោះវង្ស តុលា អាយុ២២ឆ្នាំ មានទីលំនៅមិនពិតប្រាកដ (ជាអ្នកជួញដូរ) និងទី២-ឈ្មោះម៉ុក វណ្ណឌិន អាយុ២៤ឆ្នាំ មានទីលំនៅផ្ទះលេខ១១ ផ្លូវលំ សង្កាត់និរោធ ខណ្ឌមានជ័យ (ជាអ្នកទិញ) រួមជាមួយ និងវត្ថុតាងជាថ្នាំញៀនប្រភេទម្សៅក្រាមសថ្លា ចំនួនពីរកញ្ចប់តូចផងដែរ ។ តាមប្រភពដដែលបានប្រាប់បន្តទៀតថា ជនសង្ស័យជាអ្នកជួញដូរនិងទិញគ្រឿងញៀនខុសច្បាប់ទាំងពីរនាក់នេះ ត្រូវបានកម្លាំងនគរបាលប៉ុស្តិ៍ផ្សារដើមថ្កូវ ធ្វើការឃាត់ខ្លួនបាននៅពេលដែលពួកគេកំពុងតែធ្វើសកម្មភាពជាក់ស្តែង ។
ជនសង្ស័យទាំងពីរនាក់ក្រោយពីធ្វើការសាកសួរ និងធ្វើកំណត់ហេតុរួចហើយក៏បានបញ្ជូនខ្លួនពួកគេរួមទាំងវត្ថុតាងទៅកាន់អធិការដ្ឋាននគរបាលខណ្ឌចំការមនជាបន្តទៀត ៕
ចែករំលែកព័តមាននេះ