យុទ្ធជនវ័យក្មេង៣នាក់របស់ក្រុមរដ្ឋអ៊ិស្លាមក្នុងវីដេអូមួយផ្សាយកាលពីថ្ងៃទី១៩ វិច្ឆិកា បានអំពាវនាវដោយនិយាយជាភាសាបារាំងដល់បណ្តាជនអ៊ិស្លាមបារាំងឱ្យចូលរួមបម្រើក្នុងជួរពួកជីហាដនៅប្រទេសស៊ីរី ឬបើមិនដូច្នេះទេ ធ្វើការវាយប្រហារនានាក្នុងប្រទេសបារាំងតែម្តង ។
យុទ្ធជនវ័យក្មេង៣នាក់របស់ក្រុមរដ្ឋអ៊ិស្លាមក្នុងវីដេអូមួយផ្សាយកាលពីថ្ងៃទី១៩ វិច្ឆិកា បានអំពាវនាវដោយនិយាយជាភាសាបារាំងដល់បណ្តាជនអ៊ិស្លាមបារាំងឱ្យចូលរួមបម្រើក្នុងជួរពួកជីហាដនៅប្រទេសស៊ីរី ឬបើមិនដូច្នេះទេ ធ្វើការវាយប្រហារនានាក្នុងប្រទេសបារាំងតែម្តង ។
វីដេអូមានរយៈពេល៧នាទីនេះត្រូវបានផ្សាយតាមអីុនធើរណេតរបស់ពួកជីហាដ ។ វីដេអូត្រូវចាក់ផ្សាយ៣ថ្ងៃបន្ទាប់ពីការចាក់ផ្សាយវីដេអូមួយបង្ហាញពីការសម្លាប់ដោយកាត់ក្បាលឈ្លើយសឹកស៊ីរី១៨នាក់ និងចំណាប់ខ្មាំងជនជាតិអាមេរិកម្នាក់លោក PETER KASSIG ដែលក្នុងវីដេអូគេឃើញពេជ្ឈឃាតជាជនជាតិបារាំង២នាក់ ដែលគេកំណត់ដឹងអត្តសញ្ញាណហើយ គឺម្នាក់ឈ្មោះ MAXIME HAUCHARD ហើយម្នាក់ទៀតឈ្មោះ MICHAEL DOS SANTOS ។
ក្នុងវីដេអូផ្សាយកាលពីថ្ងៃទី១៩ វិច្ឆិកានោះ យុវជនប្រដាប់អាវុធទាំង៣នាក់និយាយភាសាបារាំងដូចគ្នាបានអំពាវនាវដល់បណ្តាជនអ៊ិស្លាមបារាំងឱ្យចាកចេញពីប្រទេស ហើយមកចូលរួមក្នុងជួរក្រុមរដ្ឋអ៊ិស្លាម ។ យុវជនម្នាក់ក្នុងចំណោមយុវជនទាំង៣នាក់នេះ រហូតដល់និយាយថា បើមិនមកសូមឱ្យធ្វើការវាយប្រហារនានាក្នុងដែនដីបារាំង ។ យុវជនបារាំងទាំង៣នាក់ដែលប្រាប់ឈ្មោះពួកគេថា ABU OSAMA AL FARANCI ABU MARYAM AL FARANCI និង ABU SALMAN AL FARANCI បានដុតលិខិតឆ្លងដែនរបស់ពួកគេចចោលនៅមុខកាមេរ៉ា ។
មានជនជាតិបារាំងដល់ទៅជាង១.១០០នាក់បានចូលបម្រើក្នុងជួរពួកជីហាដ ក្នុងនោះជិត៣៨០នាក់ បច្ចុប្បន្នកំពុងស្ថិតក្នុងប្រទេសស៊ីរី ឬនៅអុីរ៉ាក់ ហើយ៥០នាក់បានស្លាប់ហើយ។ កាលពីយប់ថ្ងៃទី១៩ វិច្ឆិកា រដ្ឋមន្ត្រីមហាផ្ទៃបារាំងលោក BERNARD CAZENEUVE បានព្រមានជាថ្មីចំពោះយុវជនបារាំងឱ្យមានការប្រុងប្រយ័ត្នចំពោះការឃោសនាបោកប្រាស់ពួកគេ ។ លោកស្នើដល់យុវជនបារាំងឱ្យពិនិត្យលើភាពសាហាវយង់ឃ្នងព្រៃផ្សៃរបស់ក្រុមភេរវករទាំងនោះ ៕
ចែករំលែកព័តមាននេះ