តាមឯកសាររបស់សភាអាហ្វ្រិកខាងត្បូង កាលពីពេល ថ្មីៗកន្លងមកផ្សាយថា ប៉ូលិសបានស៊ើបអង្កេតទាក់ទិននឹងរឿងលោកប្រធានាធិបតីយកថវិកាជាតិចំនួន២៣លានដុល្លារទៅកែលំអភូមិគ្រឹះរបស់ខ្លួន ។
AFP បានផ្សាយដោយយោងតាមឯកសាររបស់សភាថា ប៉ូលិសកំពុងសើុបអង្កេតទាក់ទិនលើការចំណាយថវិកាជាតិសម្រាប់កែលំអភូមិគ្រឹះរបស់លោកប្រធានាធិបតី ហ្សាខុប ស៊ូម៉ា ។ លោកហ្សាខុប ស៊ូម៉ា បានជាប់ឆ្នោតឡើងកាន់តំណែងដឹកនាំប្រទេសជាថ្មី កាលពីខែឧសភា និងកន្លងមកបានបដិសេធថាមិនបានដឹងរឿងរ៉ាវទាក់ទងនឹងការកែលំអភូមិគ្រឹះរបស់ខ្លួន ទាំងការសាងសង់អាងហែលទឹក និងគ្លីនិកប្រចាំគ្រួសារទេ ។ ចំណែករដ្ឋាភិបាលបញ្ជាក់ថា ការកែលំអលំនៅឋានរបស់លោកប្រធានាធិបតី ពាក់ព័ន្ធនឹងរឿងសុវត្ថិភាព ។
បញ្ហានោះបានធ្វើឱ្យមានការរិះគន់យ៉ាងខ្លាំងចំពោះការដឹកនាំប្រទេសរបស់លោកហ្សាខុប ស៊ូម៉ា ដែលបណ្តែតបណ្តោយឱ្យមានអំពើពុករលួយកើតឡើង ។
លោកអេមមូស៊ី ម៉ៃម៉ានី មេដឹកនាំពីគណបក្សប្រឆាំងបញ្ជាក់ថា ដល់ពេលវេលាដែលប៉ូលិសត្រូវបំពេញតួនាទីរបស់ខ្លួនហើយ ។ មេដឹកនាំបក្សប្រឆាំងរូបនេះ និងអ្នកនយោបាយរបស់ភាគីប្រឆាំងជាច្រើនរូបទៀតបានអំពាវនាវឱ្យលោកហ្សាខុប ស៊ូម៉ា លាលែងពីតំណែងប្រធានាធិបតីអាហ្វ្រិកខាងត្បូង ។ កាលពីខែមីនា ២០១៤ រដ្ឋមន្ត្រីក្រសួងដែនដី និងនគរូបនីយកម្មរបស់អាហ្វ្រិកខាងត្បូងបញ្ជាក់ថា លោកហ្សាខុប ស៊ូម៉ា បានទទួលផលប្រយោជន៍ច្រើនពីការសាងសង់ និងកែលំអភូមិគ្រឹះ ។ លោកហ្សាខុប ស៊ូម៉ា រងការរិះគន់ពីប្រជាពលរដ្ឋចំពោះការយកប្រាក់របស់ជាតិទៅចំណាយមិនសមហេតុផលស្រប
ពេលប្រទេសកំពុងជួបវិបត្តិអ្នកអត់ការងារធ្វើ និងការមិនស្មើភាពនៅក្នុងសង្គម ៕
ចែករំលែកព័តមាននេះ