រាជធានីភ្នំពេញ ៖ ម្ចាស់ជ័យលាភី The Voice Cambodia រដូវកាលទី១ លោកប៊ុត សីហា បេក្ខជនមកពីទឹកដីសម្បូរដើមត្នោត ខេត្តកំពង់ស្ពឺ កំពុងទទួលបានការចាប់អារម្មណ៍ខ្លាំងពីមហាជន ។ ការទទួលជ័យលាភីរបស់លោកប៊ុត សីហា កាលពីពេល ថ្មីៗនេះមានមតិមួយចំនួនលើកឡើងថា ទំនងបេក្ខជនរូបនេះមានការតស៊ូក្នុងជីវិតកម្សត់ ព្រមជាមួយការបាត់បង់ឪពុកចំពេលកំពុងប្រឡង ទើបធ្វើឱ្យមហាជនអាណិតអាសូរ និងបោះឆ្នោតជូន ។
ក្នុងការប្រកួតលោកប៊ុត សីហា បានឈ្នះបេក្ខជនជាច្រើននាក់តាំងពីវគ្គដំបូងមក ។ នៅពេលក្លាយជាម្ចាស់ជ័យលាភីនៅវគ្គចុងក្រោយមានការបញ្ចេញទស្សនៈ ខុសៗគ្នា ក្នុងនោះមានទស្សនៈច្រើនផ្តោតលើមនោសញ្ចេតនារបស់មហាជន ចំពោះលោកប៊ុត សីហា ។ ទស្សនៈឬមតិមួយចំនួនយល់ថា មហាជនផ្ញើសារគាំទ្រទៅលើបេក្ខជនប៊ុត សីហា ព្រោះតែអាណិតដែលគេបាត់បង់ឪពុកចំពេលកំពុងប្រឡង ។ ម្យ៉ាងទៀតពេលដាក់ពាក្យប្រឡង សីហា ជិះកង់ទៅទិញពាក្យ ។
សីហាជាអ្នកចម្រៀងនៅក្នុងក្រុមតន្ត្រីមួយនៅឯស្រុកកំណើត ហើយតែងតែចូលរួមច្រៀងយកប្រាក់ជួយចិញ្ចឹមក្រុមគ្រួសារ និងបង្ខំចិត្តបោះបង់ការសិក្សាត្រឹមថ្នាក់ទី៩ ព្រោះតែមិនអាចប្រឈមមើលភាពក្រខ្សត់របស់ក្រុមគ្រួសារបាន ។
សរុបសេចក្តីទៅ មហាជនខ្លះយល់ថា ឱកាសទទួលបានជ័យលាភីក្នុងកម្មវិធី The Voice Cambodia រដូវកាលទី១របស់ប៊ុត សីហា អាចជារឿងកើតចេញពីហេតុផលទាំងនោះគួបផ្សំផង ។
ផ្ទុយពីការយល់ឃើញបែបនោះ បើយោងតាមតារាចម្រៀងលោកឆន សុវណ្ណរាជ ជាគ្រូបង្វឹកផ្ទាល់របស់ប៊ុត សីហា បានលើកឡើងថា «ការប្រឡងនេះមានការយកចិត្តទុកដាក់សង្កេតលើទឹកដមសំឡេងតាំងពីវគ្គដំបូងមកម្ល៉េះ ។ កម្មវិធីនេះមានភាពសុក្រឹតបំផុត ដោយសារតែជាការទិញសិទ្ធិពីប្រទេសគេផ្ទាល់ ហើយម្ចាស់ដើមក៏បានចូលរួមមកមើលការងាររបស់កម្ពុជាយើងរៀបចំដែរ ថាតើពេលបានអាជ្ញាប័ណ្ណផលិតកម្មវិធីប្រឡងមក ធ្វើត្រឹមត្រូវ យុត្តិធម៌ដែរឬអត់។ បើយើងធ្វើមិនត្រឹមត្រូវគេក៏មានសិទ្ធិដកអាជ្ញាប័ណ្ណចេញដែរ ដើម្បីកុំឱ្យខូចកម្មវិធីល្បីរបស់ គេ ។ និយាយតាមត្រង់តាំងពីចូលដល់ដំណាក់កាលសល់បេក្ខជន១០នាក់ គ្រូបង្វឹកទាំងអស់អត់មានសិទ្ធិជួបកូនក្រុមណានោះទេ ក្រៅពីខំបង្វឹកកូនក្រុមរៀងខ្លួន ។ ការសម្រេចចិត្ត ស្ថិតនៅលើគ្រូបង្វឹកផ្ទាល់ ហើយការសម្រេចចិត្ត ម្តងៗមានភាពលំបាកបំផុត ព្រោះកូនក្រុមសុទ្ធសឹងតែជាអ្នកមានសមត្ថភាព ។ ទីបំផុតយើងត្រូវជម្រុះអ្នកដែលយើងចូលចិត្តផង និងរើសអ្នកដែល យើងពេញចិត្តផង ដូចសីហាផ្ទាល់ខ្ញុំរើសយក គាត់ហូរហែរហូតដល់វគ្គផ្តាច់ព្រត្រ័ ដោយសីហាគាត់ធ្វើបានល្អ ពិតជាមិនឱ្យខ្ញុំអស់សង្ឃឹមឡើយ» ។
ចំណែកលោកប៊ុត សីហា ផ្ទាល់ ឆ្លើយតបនឹងមតិខ្លះថា លោកទទួលជ័យលាភីដោយសារតែមនោសញ្ចេតនារបស់មហាជននោះ លោកបញ្ជាក់ថា «ការប្រឡងនេះផ្តោតលើសំឡេង ។ ខាងកម្មវិធីប្រឡងគេអត់ឱ្យពាក់ព័ន្ធភាពតោកយ៉ាក ការអាណិតអាសូរមករ៉ាយរ៉ាប់ជូនគេទេ។ យើងតោកយ៉ាកក៏ដោយ តែមានសំឡេងល្អ ទេពកោសល្យល្អ ទើបយើងអាចទទួលយកបាន ព្រោះកម្មវិធីតម្រូវតែសំឡេង និងមិនចាំបាច់មានរូបសម្បត្តិស្អាតប៉ុន្មានទេ» ។
លោកប៊ុត សីហា ជាកូនពៅ ក្នុងចំណោមបងប្អូន៦នាក់ និងមានឪពុកជាអ្នកភ្លេងប្រពៃណី ។ សីហារំឭកថា «កំពុងប្រឡង សុខៗ ស្រាប់តែលោកឪពុកបាត់បង់ជីវិតមុនពេលប្រឡងវគ្គផ្តាច់ព្រ័ត្រមិនដល់១អាទិត្យទេ ។ ពេលនោះខ្ញុំបានបែងចែកទាំងលំបាក ដូចជាពេលថ្ងៃបុណ្យសពគាត់ បងប្អូនទាំងអស់ប្រាប់ថា បើចង់ យំៗឱ្យហើយទៅ ព្រោះខានស្អែកត្រូវប្រឡងហើយ ។ ពេលមកប្រឡងបងប្អូន គាត់មកជួយគាំទ្រ និងលើកទឹកចិត្តដោយប្រាប់ខ្ញុំថា ធ្វើយ៉ាងណាកុំយំ ហើយលោកគ្រូបង្វឹកឆន សុវណ្ណរាជ ក៏បានលើកទឹកចិត្តច្រើនណាស់ដែរ ពេលកំពុងប្រលងនោះ ។ គ្មានកូនណាមួយដែលឪពុកស្លាប់ទៅហើយ សើចញញឹមបាននោះទេ» ។
ឈប់សិក្សាត្រឹមថ្នាក់ទី៩ នៃអនុវិទ្យាល័យ «ទន្ទមានជ័យ» សីហា បញ្ជាក់ថា លោកត្រូវការលុយរៀនគួ តែអ្នកផ្ទះអត់មានលុយឱ្យបង់ក៏ឈប់រៀនទាំងស្រុងតែម្តង ។ ក្រោយជាប់ជ័យលាភីនេះ សីហាចង់បន្តការសិក្សា ព្រោះនឹកស្តាយ ដែលបានបោះបង់ ។ ណាមួយចង់ចេះដឹងបន្ថែម ព្រោះជាអ្នកចម្រៀងមានគេចាប់អារម្មណ៍ គួរតែមានចំណេះខ្ពស់ដែរ ។ លោកប៊ុត សីហា បានថ្លែងអំណរគុណចំពោះមហាជនដែលផ្ញើសារគាំទ្រដល់រូបលោកឱ្យជាប់លើកពានរង្វាន់ ។
ពេលប្រឡងវគ្គផ្តាច់ព្រ័ត្រនោះ ប៊ុត សីហា លើកយកបទចម្រៀងរបស់លោកខេមរៈ សិរីមន្ត មានចំណងជើងថា «ស្រលាញ់បងគ្មានអនាគតទេ» និងបទលោកព្រាប សុវត្ថិ «គ្មានអូនបងនៅជាបង» មកច្រៀង ។
ប៊ុត សីហា សន្យាថា នឹងមិនចោលភូមិកំណើតដែលធ្លាប់កម្សត់កម្រនោះទេ ។ លោកនឹងឧស្សាហ៍ទៅសួរសុខទុក្ខបងប្អូន អ្នកភូមិដែលជួយលើកទឹកចិត្តពេលប្រឡង ។ មិនតែប៉ុណ្ណោះ ម្ចាស់ពានរង្វាន់ចម្រៀងប្រកបដោយកិត្តិយសនេះ សន្យាមិនប្រើចរិតឆ្មើងឆ្មៃដាក់ទស្សនិកជនទេ នៅតែរក្សាចរិតដូចដើមដដែល ៕
ចែករំលែកព័តមាននេះ