មានការប៉ះទង្គិចគ្នារវាងប៉ូលិស និងពួកបាតុករស្និទ្ធលទ្ធិប្រជាធិបតេយ្យ កាលពីថ្ងៃទី១៩ វិច្ឆិកា នៅក្រុងហុងកុងខណៈដែលបាតុករមួយក្រុមតូចដែលបិទមុខ ប៉ុនប៉ងលុកចូលក្នុងក្រុមប្រឹក្សាសភាហុងកុង ។
ប៉ូលិសប្រមាណជា១០០នាក់ បានប្រើដំបងនិងឧស្ម័នម្រេច ប្រឆាំងពួកអ្នកតវ៉ា ហើយមនុស្ស៤នាក់ត្រូវចាប់ខ្លួន ។ ឧប្បត្តិហេតុនេះ កើតមានប៉ុន្មានម៉ោង បន្ទាប់ពីអាជ្ញាធររើបារ៉ាស់រាំងផ្លូវទាំងឡាយចោល បន្ទាប់ពីការសម្រេចលើកដំបូងមួយរបស់តុលាការ សំដៅកាត់បន្ថយទីតាំងកាន់កាប់របស់ពួកបាតុករចាប់តាំងពីដំណាច់ខែកញ្ញា មក ។ ការប៉ះទង្គិចគ្នាកើតឡើងពេលមនុស្សប្រមាណជា១០នាក់ ដែលបិទមុខបានសម្រុកទម្លុះទ្វារចូលមួយរបស់សភា ។ បាតុករម្នាក់ អាចចូលដល់ក្នុងអគារសភាមុនពេលបណ្តេញចេញវិញ ។
ប៉ូលិសថ្កោលទោសយ៉ាងខ្លាំង ចំពោះអំពើបែបនេះរបស់ពួកបាតុករដែលធ្វើឱ្យប៉ះពាល់ដល់សណ្តាប់ធ្នាប់សាធារណៈ ។ កិច្ចប្រជុំសភាគ្រោងធ្វើនាថ្ងៃទី១៩ វិច្ឆិកា នោះ ត្រូវលុបចោលវិញ ក៏ដូចជាការចូលទស្សនារបស់សាធារណជនដែរ ៕
ចែករំលែកព័តមាននេះ