រាជធានីភ្នំពេញ ៖ បុរសជាព្រូរថយន្តម្នាក់បានស្លាប់កៀបជាប់ក្នុងកាប៊ីនរថយន្ត និងអ្នកបើកបររបួសធ្ងន់ក្នុងហេតុការណ៍គ្រោះថ្នាក់ចរាចរណ៍រថយន្តសាំងយ៉ុង១៥កៅអីដឹកចំណីសត្វបុកជាមួយរថយន្តកុងតឺន័រកាលពីវេលាម៉ោង១១ និង៣៥នាទីព្រឹក ថ្ងៃទី១១ វិច្ឆិកា ២០១៤ នៅលើកំណាត់ផ្លូវជាតិលេខ៤ ចំណុចភូមិព្រៃបឹង សង្កាត់កន្ទោក ខណ្ឌពោធិ៍សែនជ័យ។
អ្នកបើកបររថយន្តត្រូវគេស្គាល់ឈ្មោះសែន ចាន់ ភេទប្រុស មានទីលំនៅភូមិទន្លាប់ ឃុំទន្លាប់ ស្រុកគិរីវង់ ខេត្តតាកែវ រីឯព្រូរថយន្តដែលស្លាប់មិនទាន់ស្គាល់ឈ្មោះនៅឡើយ។
ប្រភពបានឱ្យដឹងថា មុនពេលកើតហេតុគេឃើញរថយន្តសាំងយ៉ុង១៥កៅអីដឹកចំណីសត្វ ពណ៌ទឹកប្រាក់ ពាក់ស្លាកលេខភ្នំពេញ២D៣៧៤៣ ធ្វើដំណើរក្នុងទិសដៅពីកើតទៅលិច លុះមកដល់ចំណុចកើតហេតុខាងលើមិនដឹងយ៉ាងម៉េចស្រាប់តែរថយន្តសាំងយ៉ុងបើកជ្រុលទៅបុករថយន្តកុងតឺន័រមួយគ្រឿងទៀត ពណ៌ស ពាក់ស្លាកលេខ៣C១៤២១របស់ក្រុមហ៊ុនផែស្ងួតតិចស្រ៊ន់ដែលកំពុងធ្វើដំណើរបញ្ច្រាសទិសគ្នាពេញទំហឹងបណ្តាលឱ្យកៀបអ្នកបើកបរ និងព្រូជាប់ក្នុងកាប៊ីនរថយន្តស្លាប់ និងរបួសធ្ងន់តែម្តង ចំណែកអ្នកបើកបររថយន្តកុងតឺន័របានរត់គេចខ្លួនបាត់ស្រមោល៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ