រាជធានីភ្នំពេញ ៖ អង្គការដៃគូចំនួន១៦ ដែលធ្វើការងារជាមួយអ្នកជំងឺអេដស៍ និងផ្ដល់សេវាថែទាំមេរោគអេដស៍ សហការជាមួយមន្ទីរសុខាភិបាលរាជធានីភ្នំពេញ គ្រោងនឹងចុះចែកស្រោមអនាម័យជាង២៦ម៉ឺនស្រោម នៅថ្ងៃបុណ្យអុំទូក និងធ្វើតេស្ដឈាមដោយស្ម័គ្រចិត្ដ ដើម្បីអប់រំដល់ប្រជាពលរដ្ឋដែលមកទស្សនាក្នុងពិធីបុណ្យអុំទូក នាពេលខាងមុខនេះ ។
រាជធានីភ្នំពេញ ៖ អង្គការដៃគូចំនួន១៦ ដែលធ្វើការងារជាមួយអ្នកជំងឺអេដស៍ និងផ្ដល់សេវាថែទាំមេរោគអេដស៍ សហការជាមួយមន្ទីរសុខាភិបាលរាជធានីភ្នំពេញ គ្រោងនឹងចុះចែកស្រោមអនាម័យជាង២៦ម៉ឺនស្រោម នៅថ្ងៃបុណ្យអុំទូក និងធ្វើតេស្ដឈាមដោយស្ម័គ្រចិត្ដ ដើម្បីអប់រំដល់ប្រជាពលរដ្ឋដែលមកទស្សនាក្នុងពិធីបុណ្យអុំទូក នាពេលខាងមុខនេះ ។
លោកវេជ្ជបណ្ឌិត សេម ប៉េងស៊ាន ប្រធានប្រតិបត្ដិអង្គការមូលនិធិថែទាំសុខភាពអ្នកជំងឺអេដស៍ បានឱ្យដឹងក្នុងកិច្ចប្រជុំស្ដីពីយុទ្ធនាការធ្វើតេស្ដឈាមរកមេរោគអេដស៍ និងការប្រើប្រាស់ស្រោមអនាម័យ ក្នុងទិវាអេដស៍ពិភពលោក កាលពីព្រឹកថ្ងៃទី៣១ តុលា នៅសណ្ឋាគាហ្គ្រីនភែលេស ថា នៅថ្ងៃបុណ្យអុំទូកខាងមុខ អង្គការដៃគូចំនួន១៦ នឹងរៀបចំកម្មវិធីប្រគំតន្ដ្រីកម្សាន្ដ ដើម្បីអប់រំផ្សព្វផ្សាយ និងបង្ការទប់ស្កាត់ការរីករាលដាលមេរោគអេដស៍ ហើយរៀបចំជាស្ដង់មួយចំនួនសម្រាប់ផ្ដល់ព័ត៌មានអំពីការធ្វើតេស្ដឈាមរកមេរោគអេដស៍ដោយស្ម័គ្រចិត្ដ រក្សាការសម្ងាត់ និងផ្ដល់ប្រឹក្សា។ ក្រៅពីនោះ អង្គការក៏មានក្រុមការងារស្ម័គ្រចិត្តចែកស្រោមអនាម័យជាង២៥ម៉ឺនស្រោមផងដែរ ។
លោកវេជ្ជបណ្ឌិតបញ្ជាក់ថា គោលបំណងសំខាន់គឺចង់លើកកម្ពស់ការផ្ដល់សេវាធ្វើតេស្ដឈាមរកមេរោគអេដស៍ ចំពោះអ្នកមានផ្ទុកមេរោគអេដស៍ដែលមិនទាន់ដឹងខ្លួនថាមានមេរោគ ពិសេសចង់ឱ្យអ្នកផ្ទុកមេរោគអេដស៍ទាំងអស់ ទទួលបានសេវាថែទាំ និងព្យាបាល ដើម្បីទទួលបានការអប់រំ និងបង្ការការពារកុំឱ្យមានការឆ្លងថ្មី ។
លោកបន្តថា ក្នុងឱកាសនោះក៏មានការចែកជាក្រុមអ្នកស្ម័គ្រចិត្ដមួយចំនួន ចុះទៅអប់រំផ្សព្វផ្សាយ បើប្រសិនជាមានអ្នកចង់ធ្វើតេស្ដឈាម ក្រុមស្ម័គ្រចិត្ដទាំងនោះនឹងនាំមកកន្លែងធ្វើតេស្ដឈាម ដើម្បីរកឱ្យឃើញអំពីស្ថានភាពមេរោគអេដស៍ ហើយក្នុងការធ្វើតេស្ដឈាមនេះ បើរកឃើញពលរដ្ឋណាម្នាក់មានផ្ទុកមេរោគអេដស៍ ក្រុមការងារនឹងបញ្ជូនគាត់ទៅកន្លែងផ្ដល់សេវា និងផ្ដល់ថ្នាំពន្យារ ។
លោកវេជ្ជបណ្ឌិតលើកឡើងថា ក្រុមអ្នកស្ម័គ្រចិត្ដទាំងអស់មានចំនួនជាង១០០នាក់ ដែលចែកជា៦ក្រុម សម្រាប់រៀបចំជាស្ដង់ដាក់នៅតាមតំបន់មាត់ទន្លេ តំបន់សំខាន់ៗមួយចំនួនទៀត នៅតាមសួនច្បារ និងក្រុមអ្នកស្ម័គ្រចិត្ដចល័ត ដើម្បីអប់រំផ្សព្វផ្សាយចុះចែកខិត្តប័ណ្ណ ដល់ប្រជាពលរដ្ឋ ដែលដើរលេងកម្សាន្ដក្នុងអំឡុងពិធីបុណ្យអុំទូក។
ចំណែកលោកវេជ្ជបណ្ឌិត ឡុង ឡាវី អនុប្រធានមន្ទីរសុខាភិបាលរាជធានីភ្នំពេញ បានបញ្ជាក់ថា មន្ទីរសុខាភិបាលនឹងដាក់ភ្នាក់ងារសុខាភិបាលចុះណែនាំដល់ប្រជាពលរដ្ឋ ដែលមកដើរកម្សាន្ដក្នុងអំឡុងពិធីបុណ្យអុំទូក ត្រូវមានការប្រុងប្រយ័ត្នខ្ពស់ចំពោះការឆ្លងមេរោគអេដស៍ ហើយបើសិនជាចង់សប្បាយនៅកន្លែងណាមួយ ឬជាមួយដៃគូនោះ ត្រូវចេះប្រើស្រោមអនាម័យ ដើម្បីការពារខ្លួនប្រកបដោយសុវត្ថិភាពសម្រាប់ក្រុមគ្រួសារ និងអ្នកជាទីស្រឡាញ់របស់យើង ។
លោកបន្តថា ទាំងមន្ទីរសុខាភិបាលភ្នំពេញ និងអង្គការមូលនិធិថែទាំសុខភាពអ្នកជំងឺអេដស៍ គ្រោងនឹងចុះធ្វើតេស្ដឈាមស្វែងរកមេរោគអេដស៍ដល់មនុស្សប្រមាណជិត២ម៉ឺននាក់ ចែកស្រោមអនាម័យជាង២៥ម៉ឺនស្រោម និងចុះអប់រំទប់ស្កាត់ការឆ្លងមេរោគអេដស៍ដល់ប្រជាពលរដ្ឋ ដែលមានរយៈពេល៣ថ្ងៃ ចាប់ពីថ្ងៃទី៤ ដល់ថ្ងៃទី៦ វិច្ឆិកា ខាងមុខនេះ ៕
ចែករំលែកព័តមាននេះ