ខេត្តកំពង់ស្ពឺ ៖ រឿងរ៉ាវស្នេហាត្រីកោណមួយ បានដុតបញ្ឆេះឱ្យក្លាយជាភ្លើងកំហឹងយ៉ាងសន្ធោសន្ធៅ បណ្តាលឱ្យស្ត្រីម្នាក់ដែលអះអាងថា ជាប្រពន្ធដើម ក្លាយជាអ្នកទោសដោយសារតែបានចាប់ស្ត្រីម្នាក់ដោយចោទថា ជាប្រពន្ធចុងលួចលាក់ជាមួយប្តី ហើយឆូតមុខនឹងផ្លែទ្បាមហូរឈាមស្រោចពេញខ្លួន និងត្រូវបានបញ្ជូនទៅសង្គ្រោះនៅមន្ទីរពេទ្យភ្លាមៗ ។
ករណីបង្កហិង្សាដោយចេតនា ព្រោះតែការក្បត់ចិត្តរបស់លោកប្តីនេះ បានកើតទ្បើងកាលពីវេលាម៉ោង៤និង៣០នាទីរសៀល ថ្ងៃទី៣០ តុលា នៅភូមិផ្សារកន្ទួត ឃុំសង្កែសាទប ស្រុកឱរ៉ាល់ ។ លោកប្តីឈ្មោះ ប៉ិម អាយុ៣៣ឆ្នាំ ប្រពន្ធដើមឈ្មោះ ឆយ ស្រីលក្ខណ៍ អាយុ២៦ឆ្នាំ ។ ចំណែកស្ត្រីជាប់ចោទជាប្រពន្ធចុងលួចលាក់ឈ្មោះ អឿន សុខទ្បា អាយុ២៧ឆ្នាំ ។ អ្នកទាំង៣រស់នៅក្នុងភូមិឃុំខាងលើជាមួយគ្នា តែផ្ទះផ្សេងគ្នា ។
តាមប្រភពព័ត៌មានពីអ្នកជិតខាងដែលដឹងរឿងស្នេហាត្រីកោណនេះ បានបង្ហើបថា រឿងបុរសមានបេះដូង២ចម្រៀកនេះ កើតទ្បើងច្រើនឆ្នាំមកហើយ ចាប់តាំងពីបុរសជាប្តីលែងរវីរវល់នឹងនាងប្រពន្ធដើម ថែមទាំងបានយកប្រពន្ធចុងមករស់នៅជាមួយគ្នាពេញមុខ ធ្វើឱ្យនាងជាប្រពន្ធដើមឈឺចិត្តឆ្អិតទ្រូង ព្រោះតែទង្វើបុរសជាប្តី រហូតទ្រាំលែងបានក៏បង្កឱ្យមានរឿងបែបនេះតែម្តង ។
ប្រភពដដែលបន្តថា កាលពីអំទ្បុងប៉ុន្មានខែមុន បុរសជាប្តីធ្លាប់បានយកនាងជាប្រពន្ធចុងទៅលាក់ទុកនៅរាជធានីភ្នំពេញ ដោយបានជួលផ្ទះឱ្យស្នាក់នៅទៀតផង ។ ប៉ុន្តែមិនបានប៉ុន្មានផង គេឃើញនាងជាប្រពន្ធចុងត្រទ្បប់មកវិញ ថែមទាំងឌឺដងឱ្យនាងជាប្រពន្ធដើមថែមទៀត ។ លោកអនុសេនីយ៍ឯក ប៊ុត ប៊ុនធឿន អធិការនគរបាលស្រុកឱរ៉ាល់ បានឱ្យដឹងថា ផ្អែកតាមចម្លើយបំភ្លឺរបស់សាក្សី មុនពេលកើតហេតុ ស្ត្រីជាប្រពន្ធចុង បាននាំគ្នាអង្គុយផឹកស៊ីនៅផ្ទះជាមួយប្តីជាជាងជួសជុលម៉ូតូយ៉ាងសប្បាយរីករាយ ហើយដំណឹងនេះឮដល់ប្រពន្ធដើមដែលកំពុងឈឺចុកចាប់ក្នុងចិត្តផងនោះ នាងដើមក៏ដើរសំដៅទៅផ្ទះប្តីរបស់ខ្លួន ដែលស្ត្រីជាប្រពន្ធចុងកំពុងផឹកស៊ីជាមួយ ។ លុះទៅដល់ក៏បានប្រវាយប្រតប់និងយកផ្លែទ្បាមឆូតមុខស្ត្រីជាប្រពន្ធចុងមួយកន្លែង និងក្រោមត្រចៀកមួយកន្លែង រងរបួសហូរឈាមស្រោចខ្លួន និងត្រូវបានបញ្ជូនភ្លាមៗទៅសង្គ្រោះនៅមន្ទីរពេទ្យបង្អែកខេត្ត ។ ដោយសារការចាប់ឆូតនឹងផ្លែទ្បាមនោះ ត្រូវគ្រូពេទ្យដេរលើផ្ទៃមុខចំនួន១៩ថ្នេរ ចំណែកក្រោមត្រចៀក៤ថ្នេរ ។
លោកអធិការស្រុកបន្តថា ស្ត្រីជាប្រពន្ធដើមក្រោយបង្កហេតុ ដោយភ្លើងកំហឹង១០០អង្សានេះ ក៏ត្រូវសមត្ថកិច្ចឃាត់ខ្លួនភ្លាមៗដែរ ដើម្បីកសាងសំណុំរឿងបញ្ជូនទៅកាន់ស្នងការដ្ឋាននគរបាលខេត្ត ចាត់ការតាមនីតិវិធី ។ អ្នករស់នៅផ្សារកន្ទួតលើកទ្បើងថា រឿងនេះ បើែស្ត្រីជាប្រពន្ធចុងមិនត្រទ្បប់មករស់នៅជាមួយប្តី ដែលជាជាងជួសជុលម៉ូតូ ហើយមិនឌឺដងដៀមដាមដាក់នាងប្រពន្ធដើមទេ ក៏មិនអាចកើតមានរឿងបែបនេះដែរ ។ ប៉ុន្តែក៏មានអ្នកខ្លះលើកទ្បើងថា តើឱ្យទ្រាំដល់ណាទៀត បើមករស់នៅជាមួយគ្នារាល់ថ្ងៃ ហើយក្នុងភូមិជាមួយគ្នាទៀត តើក្នុងលោកនេះ មានស្ត្រីណា ដែលទ្រាំបាន តើម្ទេសណាមិនហឹរ ? ទោះជាយ៉ាងណាក៏ដោយ ព្រោះតែភ្លើងកំហឹង បណ្តាលឱ្យស្ត្រីជាប្រពន្ធដើមមានទោសជាប់ខ្លួនទៅវិញ ។
តាមប្រភពព័ត៌មានឱ្យដឹងថា ស្ត្រីជាប្រពន្ធដើមមានកូនប្រុស៣នាក់ ចំណែកស្ត្រីជាប្រពន្ធចុងកំពុងមានផ្ទៃពោះ៤ខែ ។ មិនអាចស្វែងរកការបំភ្លឺបែបណាពីបុរសជាប្តី ដែលធ្វើឱ្យស្ត្រី២នាក់ក្លាយជាសត្រូវនឹងគ្នានេះបានទេ ៕
ចែករំលែកព័តមាននេះ