ខេត្តកំពង់ឆ្នាំង ៖ មានការឆបោកថ្មីមួយទៀតដោយមនុស្សភេទទី៣ម្នាក់ បណ្តាលឱ្យស្ត្រីចំណាស់នៅជនបទ២នាក់ និងយុវជន២នាក់ទៀត ត្រូវរងការចោទប្រកាន់ពីបទសមគំនិតក្នុងអំពើឆបោកមាសទម្ងន់៥ជី ដែលបានប្រព្រឹត្តកាលពីវេលាម៉ោង៩និង៣០នាទីព្រឹកថ្ងៃទី៣១ តុលា នៅក្នុងផ្សារលើ ។
ខេត្តកំពង់ឆ្នាំង ៖ មានការឆបោកថ្មីមួយទៀតដោយមនុស្សភេទទី៣ម្នាក់ បណ្តាលឱ្យស្ត្រីចំណាស់នៅជនបទ២នាក់ និងយុវជន២នាក់ទៀត ត្រូវរងការចោទប្រកាន់ពីបទសមគំនិតក្នុងអំពើឆបោកមាសទម្ងន់៥ជី ដែលបានប្រព្រឹត្តកាលពីវេលាម៉ោង៩និង៣០នាទីព្រឹកថ្ងៃទី៣១ តុលា នៅក្នុងផ្សារលើ ។
សូមរំឭកថា ការចាញ់បោករបស់អ្នកជនបទស្រុកស្រែចម្ការថ្មីនេះ ក៏មិនខុសអីពីស្ត្រីម៉ាស្សាស្រស់ស្អាតម្នាក់ដែលបានចាញ់បោកសង្សារហេងស៊យរបស់ខ្លួននាំទៅទិញមាសហើយបន្លំយកមាស៥ជីរបស់អ្នកលក់រួចគេចខ្លួនបាត់កាលពីថ្ងៃទី២៥ ខែតុលា ឆ្នាំ២០១៤កន្លងទៅនេះ ។ ទីបំផុតនាងបានធ្លាក់ខ្លួនជាប់ពន្ធនាគារទាំងគ្មានកំហុស ដែលមេរៀននេះគួរបងប្អូនប្រជាពលរដ្ឋប្រុងប្រយ័ត្នឱ្យបានខ្ពស់ ។ ខាងក្រោមនេះជាល្បិចបោកប្រាស់ប្រជាពលរដ្ឋឱ្យមកទទួលទោសជំនួស ដោយចំណាយពេលធ្វើអំពើល្អប្រហែល១ខែមុនដើម្បីឱ្យគេទុកចិត្ត ។
លោក ម៉ា យន់ មន្ត្រីនគរបាលព្រហ្មទណ្ឌ ក្រុងកំពង់ឆ្នាំង បានឱ្យដឹងថា ជនទាំង៤នាក់ដែលរងការចោទប្រកាន់ក្នុងបទសមគំនិតមាន ៖
១-ឈ្មោះពេជ្រ អ៊ុំ ភេទស្រី អាយុ៥០ឆ្នាំ
២-ឈ្មោះ សាំង ឃីម ភេទស្រី អាយុ៥០ឆ្នាំ
៣-ឈ្មោះ ញ៉ែម សារីម ភេទប្រុស អាយុ២៨ឆ្នាំ ។
៤-ឈ្មោះ ង៉យ គា ភេទប្រុស អាយុ២០ឆ្នាំ ។
ទាំង៤នាក់មានទីលំនៅភូមិស្ទេង ឃុំខ្លុងពពក ស្រុកទឹកផុស ។ ចំណែកឯជនសង្ស័យជាមេខ្លោង ឈ្មោះ កាភីម ជាជនភេទទី៣ អាយុ២៨ឆ្នាំ គ្មានទីលំនៅពិតប្រាកដ ។
ប្រភពដដែលបានបន្តថា នៅព្រឹកថ្ងៃទី៣១ តុលា ជនទាំង៤នាក់រួមជាមួយមេខ្លោងឈ្មោះ កាភីម បានជួលរថយន្តតាក់ស៊ីរបស់ឈ្មោះខុម ដែលនៅភូមិឃុំជាមួយគ្នាមកផ្សារកំពង់ឆ្នាំង ។ ពេលមកដល់ផ្សារលើ ខេត្តកំពង់ឆ្នាំង ឈ្មោះ កាភីម បានឱ្យកាបូបប្រាក់ទៅឈ្មោះង៉យ គា កាន់ដោយប្រាប់ថា ទៅទិញគោយន្ត លុះពេលទៅដល់កន្លែងលក់គោយន្តឈ្មោះកាភីម បានឱ្យយុវជនទាំង២នាក់នៅរើសគោយន្តមួយគ្រឿងទៅព្រោះលុយមានកាន់នៅដៃហើយ។ បន្ទាប់មកឈ្មោះ កាភីម បាននាំស្ត្រី២នាក់ទៅទិញត្រៃសម្រាប់ធ្វើបុណ្យកឋិនទាន តែពេលដើរកាត់ហាងលក់គ្រឿងបុណ្យកឋិនទាន ឈ្មោះកាភីម មិនចូលទិញទេ ដោយប្រាប់ថា ទៅទិញមាសសិន ។
លុះទៅដល់តូបលក់មាសលេខ០៩ ដែលមានអ្នកលក់មាសឈ្មោះឡេង ឃឹមឃន ឈ្មោះ កាភីម បានសុំមើលខ្យែ.កមាសទម្ងន់៥ជី ហើយអ្នកលក់មាសក៏ឱ្យមើល ។ ពេលកំពុងមើលនោះ ឈ្មោះ កាភីម បានឱ្យកាបូបលុយមួយទៀតទៅស្ត្រីឈ្មោះ ពេជ្រ អ៊ុំ ដោយប្រាប់ថា មើលកាបូបប្រយ័ត្នបាត់រួចសុំអ្នកលក់មាសថា សុំយកទៅឱ្យប្អូនដែលកំពុងទិញគោយន្តពាក់មើលសិនរួចក៏ចេញទៅបាត់រហូតតែម្តង ។
បន្តិចក្រោយមកអ្នកលក់មាសមានការសង្ស័យក៏ប្រាប់ឱ្យស្ត្រី២នាក់នោះរាប់លុយប្រគល់ឱ្យព្រោះបក្សពួកបានយកខ្សែ.កមាស៥ជីទៅបាត់ហើយ លុះនៅពេលស្ត្រីទាំង២នាក់ បើកកាបូបប្រាក់នោះមើលស្រាប់តែឃើញសុទ្ធតែប្រាក់ដុល្លារខ្មោចទើបដឹងថា ចាញ់បោកឈ្មោះ កាភីមនោះហើយម្ចាស់មាសបានប្តឹងសមត្ថកិច្ចតែម្តង ។
បើតាមឈ្មោះ សាំង ឃីម រៀបរាប់ថា ពួកគាត់មិនមែនជាអ្នកបោកប្រាស់នោះទេ ឯឈ្មោះកាភីមនេះជាមនុស្សខ្ចាត់ព្រាត់មកពីណាមិនដឹងទេ តែបានមកស្គាល់គ្រួសារឈ្មោះ ង៉យ គា និងបានសុំឈ្មោះ ង៉យ គា ធ្វើជាបងប្អូនធម៌ទៀតផង ។ ឈ្មោះ កាភីម នេះបានសន្យាជួយទំនុកបម្រុងគ្រួសារ ង៉យ គា ឱ្យមានជីវភាពធូរធារ ព្រោះអាណិតគ្រួសារនេះណាស់ ហើយឈ្មោះ កាភីម បានមកស្នាក់នៅជាមួយគ្រួសារង៉យ គា ជាងមួយខែមុនពេលកើតហេតុនេះដោយបានជួយចេញថ្លៃម្ហូបអាហារផងដែរ ។
ស្ត្រីរូបនេះបានបន្តថា នៅរសៀលថ្ងៃទី៣០ តុលា ឈ្មោះ កាភីម បានឱ្យគាត់ និងចាស់ៗជូនគេទៅវត្តខ្លុងពពក ដោយសុំព្រះសង្ឃដង្ហែអង្គកឋិនចូលមួយត្រៃនឹងគេដែរនៅពេលខាងមុខនេះ រួចនៅព្រឹកថ្ងៃទី៣១ តុលា ឈ្មោះកាភីម បានជួលរថយន្តនាំពួកគាត់មកផ្សារកំពង់ឆ្នាំង ដោយប្រាប់ថា ទៅទិញគោយន្តឱ្យគ្រួសារង៉យ គា មួយគ្រឿង និងទិញត្រៃចូលកឋិនទានមួយត្រៃ ។ ពួកគាត់មិនមែនជាដៃជើងរបស់ជនឆបោកនោះទេ ។ ទោះយ៉ាងណា ជនទាំង៤នាក់រួមទាំងវត្ថុតាងគឺប្រាក់ដុល្លារខ្មោចចំនួន១៧៩០០ដុល្លារ ត្រូវបាននគរបាលក្រុងកំពង់ឆ្នាំងបញ្ជូនទៅស្នងការដ្ឋានខេត្ត ដើម្បីបន្តចាត់ការតាមនីតិវិធីច្បាប់ ៕
ចែករំលែកព័តមាននេះ