ខេត្តតាកែវ ៖ ពាក្យចចាមអារ៉ាមអកុសលពីមាត់មួយទៅមាត់មួយនាព្រឹកថ្ងៃទី៣១ តុលា ដែលថា លោកព្រឹទ្ធាចារ្យភិរម្យ ប្រាជ្ញ ឈួន ជាស្តេចចាប៉ីដងវែងដ៏ល្បីល្បាញប្រចាំកម្ពុជា បានទទួលមរណភាពនោះ ធ្វើឱ្យមានការភ្ញាក់ផ្អើលដល់ប្រជាពលរដ្ឋគ្រប់ៗគ្នា ។
ដើម្បីឱ្យអស់ចម្ងល់ ភ្នាក់ងារកោះសន្តិភាពប្រចាំខេត្តតាកែវ បានចុះទៅដល់គេហដ្ឋានរបស់លោកតាតែម្តង ហើយឃើញច្បាស់ថា ព័ត៌មានជាពាក្យចចាមអារ៉ាមទាំងអស់នេះ មិនពិតទេដោយឃើញស្ថានភាពសុខភាពរបស់លោកតា គឺល្អប្រសើរនិងបាននិយាយលេងសើចសប្បាយថែមទៀតផងជាមួយកោះសន្តិភាព ។
ភរិយាលោកតាឈ្មោះ កែវ ព្រីង អាយុ៦៦ឆ្នាំ ឱ្យដឹងថា លោកតាព្រឹទ្ធាចារ្យភិរម្យ ប្រាជ្ញ ឈួន ពេលនេះមានអាយុ៧៨ឆ្នាំ ហើយគាត់មិនបានស្លាប់ដូចពាក្យចចាមអារ៉ាមផ្តេសផ្តាសនេះទេ សុខភាពរបស់គាត់គឺល្អប្រសើរ សម្រាន្ត និងងើបអង្គុយដោយខ្លួនឯង ។ ចំពោះការពិសាអាហារវិញ ក៏ធម្មតាដែរ ។ បច្ចុប្បន្នក្រុមគ្រួសាររបស់លោកព្រឹទ្ធាចារ្យភិរម្យ ប្រាជ្ញ ឈួន នៅភូមិស្រម៉ក្រោម ឃុំខ្វាវ ស្រុកទ្រាំង ។
លោកតា ប្រាជ្ញ ឈួន មានប្រសាសន៍លេងសើចថា «ខ្ញុំអត់អីទេ កុំបារម្ភអី សុខភាពនៅល្អ គ្រាន់តែងងឹតភ្នែកមើលមិនសូវឃើញប៉ុណ្ណោះ»។ លោកថា នៅពេលហូបបាយ បើសិនមានម្ហូបត្រូវមាត់នោះ បាន១ចានដែរ គ្រាន់តែស្ថានភាពក្រុមគ្រួសារមានជីវភាពខ្វះខាតបន្តិច ។
គួរបញ្ជាក់ថា លោកតាព្រឹទ្ធាចារ្យភិរម្យ ប្រាជ្ញ ឈួន មានភរិយាមុនឈ្មោះ កែវ ឃឹម អាយុ៧០ឆ្នាំ បានស្លាប់ហើយ និងបន្សល់ទុកកូនប្រុសចំនួន៥នាក់ ។ បន្ទាប់មក លោកតាក៏មានភរិយាក្រោយជាប្អូនរបស់ភរិយាមុន មកជួយថែរក្សាលោកតារហូត ហើយថ្វីដ្បិតតែពេលនេះលោកតាដើរមិនសូវបាន ភ្នែកមើលមិនសូវឃើញ តែលោកតានៅអាចច្រៀងចាប៉ីបានខ្លះៗដែរ ។
ព្រឹទ្ធាចារ្យភិរម្យប្រាជ្ញ ឈួន គឺជាស្តេចចាប៉ីដងវែង ដែលរកអ្នកមកប្រៀបផ្ទឹមនឹងលោកតាមិនបានឡើយ ។
តាមរយៈចាប៉ីដងវែង លោកតាបានលើកយកច្បាប់ល្បើកថ្មី ឬច្បាប់ប្រុស ច្បាប់ស្រី ដែលអ្នកភិរម្យភាសាអ៊ូ បានច្រៀងមកសាបព្រោះបន្ត ដល់កូនចៅខ្មែរជំនាន់ក្រោយ ឱ្យចេះធ្វើខ្លួនជាពលរដ្ឋល្អក្នុងសង្គមគ្រួសារ និងសង្គមជាតិ ។ លោកព្រឹទ្ធាចារ្យភិរម្យប្រាជ្ញ ឈួន គឺជាប្រទីបបំភ្លឺផ្លូវដល់កូនខ្មែរ ឱ្យស្គាល់អ្វីដែលល្អ អ្វីដែលអាក្រក់ សម្រាប់ប្រតិបត្តិក្នុងជីវិតរបស់ខ្លួន ។ សូមជូនពរជ័យដល់លោកតា សូមមានជន្មាយុយឺនយូរតទៅមុខទៀតកុំបីឃ្លៀងឃ្លាតទ្បើយ ៕
ចែករំលែកព័តមាននេះ