ខេត្តកំពង់ស្ពឺ ៖ ផ្ទះថ្មក្រោមឈើលើប្រក់ស៊ីហ្រូមួយខ្នងត្រូវអគ្គិភ័យលេបត្របាក់អស់គ្មានសល់ព្រមទាំងសម្ភារក្នុងផ្ទះផងដែរ ។ អគ្គិភ័យនេះបានកើតឡើងកាលពីវេលាម៉ោង២ និង៣០នាទីរសៀល ថ្ងៃទី៣១ តុលា ២០១៤ ស្ថិតនៅចំណុចភូមិរោងដំរី ឃុំភ្នំតូច ស្រុកឧត្តុង ខេត្តកំពង់ស្ពឺ ។ ម្ចាស់ផ្ទះឈ្មោះខឹម ឡា ភេទប្រុស អាយុ៥០ឆ្នាំ ចំណែកប្រពន្ធឈ្មោះ មឺុន ខន អាយុ៤៩ឆ្នាំ រស់នៅក្នុងភូមិ-ឃុំ កើតហេតុ ។
ប្រភពព័ត៌មានពីប្រជាពលរដ្ឋរស់នៅក្បែរខាងផ្ទះជនរងគ្រោះបានឱ្យដឹងថា នៅមុនពេលកើតហេតុកាលបានឃើញភ្លើងឆាបឆេះចេញពីក្នុងផ្ទះមក និងបានឆេះរាលដាល ពេញបន្ទុកតែម្តង ។ ប្រភពបានបន្តទៀតថា ពេលឆេះផ្ទះនោះម្ចាស់ផ្ទះមិនបាននៅផ្ទះទេ ដោយប្តីទៅរកស៊ីនៅកោះកុង ចំណែកប្រពន្ធទៅធ្វើការរោងចក្រ ។ ហើយនៅពេលដែលភ្លើងកំពុងតែឆេះផ្ទះនោះ អ្នកជិតខាងបានទូរស័ព្ទ ប្រាប់ម្ចាស់ផ្ទះ លុះពេលម្ចាស់ផ្ទះមកដល់គឺឃើញផ្ទះនៅសល់តែផេះផង់ និង គ្រោងឆ្អឹងតែតែប៉ុណ្ណោះ ។ គេនៅមិនទាន់ដឹងពីទំហំនៃការខូចខាតនៅឡើយទេដោយគ្រាន់តែដឹងថា មាសប្រាក់ លុយកាក់មួយចំនួនត្រូវបានឆេះអស់ទៅហើយ។
ប្រភពពីនគរបាលស្រុក ឧត្តុងបានឱ្យដឹងថា ជំហានដំបូងនគរបាលសន្និដ្ឋានថា អគ្គិភ័យឆាបឆេះនេះអាចបណ្តាលមកពីទុស្សេខ្សែភ្លើង ។ នៅក្នុងពេលភ្លើងកំពុងតែឆេះអ្នកជិតខាងបានដងទឹកដឹកតាមរឺុម៉កម៉ូតូយកមកជះពន្លត់ទៅលើផ្ទះដែលកំពុងឆេះនិងផ្ទះនៅក្បែរខាងដើម្បីកុំឱ្យភ្លើងឆេះរាលដាលទៅផ្ទះដ៍ទៃទៀត តែអំណាចភ្លើងកាន់តែខ្លាំងឡើងពេញបន្ទុកមិនអាចពន្លត់បានឡើយ ។
ចែករំលែកព័តមាននេះ