ខេត្តរតនគិរី ៖ អភិបាលក្រុងបានលុង លោក អ៊ុន សំអុល បានបើកកិច្ចប្រជុំបន្ទាន់មួយជាមួយតំណាងក្រុមហ៊ុនវិនិយោគផ្សារ ដើម្បីរកដំណោះស្រាយគំនរសំរាមរលួយស្អុយនៅជុំវិញផ្សារបានលុង ។ កិច្ចប្រជុំដែលធ្វើឡើងនៅព្រឹកថ្ងៃទី៣១ តុលា ២០១៤ បានធ្វើឡើងបន្ទាប់ពីក្រុមអាជីវករ
ខេត្តរតនគិរី ៖ អភិបាលក្រុងបានលុង លោក អ៊ុន សំអុល បានបើកកិច្ចប្រជុំបន្ទាន់មួយជាមួយតំណាងក្រុមហ៊ុនវិនិយោគផ្សារ ដើម្បីរកដំណោះស្រាយគំនរសំរាមរលួយស្អុយនៅជុំវិញផ្សារបានលុង ។
កិច្ចប្រជុំដែលធ្វើឡើងនៅព្រឹកថ្ងៃទី៣១ តុលា ២០១៤ បានធ្វើឡើងបន្ទាប់ពីក្រុមអាជីវករ និង ប្រជាពលរដ្ឋនៅជុំវិញផ្សារបានរអ៊ូរទំានិងស្តីបន្ទោសទៅលើអាជ្ញាធរនិងភាគីពាក់ព័ន្ឋថាមិនបានយកចិត្តទុកដាក់ដោះស្រាយបញ្ហាគំនរសំរាមដែលស្អុយរលួយធ្វើឲ្យប៉ះពាល់ដល់សោភ័ណ្ឌភាព បរិស្ថាន និងសុខភាពប្រជាពលរដ្ឋ ជាពិសេសខ្មាស់ភ្ញៀវទេសចរអន្តរជាតិ ដែលមកកម្សាន្តនៅក្នុងខេត្តដ៍មានសក្តានុពលលើវិស័យទេសចរណ៍បែបធម្មជាតិនៅភូមិភាគឦសាន្តប្រទេសកម្ពុជាមួយនេះ ។ កិច្ចប្រជុំនេះក៍មានការចូលរួមពីខាងមន្ទីរពាក់ព័ន្ឋ ប៉ុន្តែអវត្តមានខាងភាគីក្រុមហ៊ុនប្រមូលសំរាម ជា គង់ ដោយសារខាងអាជ្ញាធរដែលចេញមុខសម្របសម្រួល មិនទាន់កោះហៅព្រោះខ្លាចមានការប្រឈមមុខគ្នា តែនឹងកោះហៅនៅពេលក្រោយ (កោះប្រជុំម្នាក់ម្តង) ។
យ៉ាងណាក៍ដោយ កិច្ចប្រជុំនេះមិនទាន់មានលទ្ឋផលនិងសម្រេចយ៉ាងណានៅឡើយទេ ដោយខាងតំណាងផ្សាររង់ចំាយលទ្ឋផលកិច្ចប្រជុំទៅឲ្យប្រធានក្រុមហ៊ុនវិនិយោគផ្សារសម្រេចនៅក្នុងកិច្ចប្រជុំនាថ្ងៃទី០៣ វិច្ឆិកាដើមសបា្តហ៍ក្រោយ ។
សូមបញ្ជាក់ផងដែរថា គំនរសំរាមដែលគរស្អុយរលួយនៅផ្សារបានលុងនេះ ត្រូវបានក្រុមហ៊ុន ជា គង់ អ្នកម៉ៅការដឹកជញ្ជូន មិនមកប្រមូលចាប់តំាងពីថ្ងៃទី០៤ តុលាពេលដែលអាជ្ញាធរចាប់បញ្ជូនគ្រឿងចក្រមកឈូសឆាយនៅទីតំាងសំរាមចាស់ដើម្បីអភិវឌ្ឍន៍មកម្ល៉េះ ដោយសំអាងថា គំនរសំរាមនេះត្រូវបានគេគរខុសទីតំាងដែលចែងក្នុងសៀវភៅបន្ទុក និងតាមការព្រមព្រៀង ។ ដោយសារតែក្រុមហ៊ុនប្រមូលសំរាមមិនដឹកជញ្ជូន ទើបក្រុមហ៊ុន ហេង ដារា ដែលវិនិយោគផ្សារ បានបង្ខំចិត្តចាត់ចែងប្រមូលដឹកជញ្ជូនខ្លួនឯងជាបណ្តើរៗមកទល់ពេលនេះ ។
នៅក្នុងកិច្ចប្រជុំព្រឹកមិញ លោកអភិបាលក្រុងបានលុង អ៊ុន សំអុល បានស្នើឲ្យភាគីខាងវិនិយោគផ្សារអនុវត្តន៍ឲ្យបានត្រឹមត្រូវតាមសៀវភៅបន្ទុកនិងគោលការណ៍ឯកសារដែលមន្ទីរសេដ្ឋកិច្ចផ្តល់សិទ្ឋិវិនិយោគ ។ លោកអភិបាលក្រុងបានលើកឡើងថា នៅក្នុងសៀវភៅបន្ទុកគឺក្រុមហ៊ុន ជា គង់ ដែលម៉ៅការប្រមូលសំរាម តម្រូវឲ្យភាគីផ្សារបង់៣លាន៥សែនរៀលក្នុងមួយខែឲ្យទៅក្រុមហ៊ុន ជា គង់ ប៉ុន្តែភាគីផ្សារបង់តែ៣លានរៀលប៉ុណ្ណោះ ទើបធ្វើឲ្យក្រុមហ៊ុនមានការយឺតយ៉ាវ ។
យ៉ាងណាក៍ដោយ មជ្ឈដ្ឋាននានានៅក្នុងខេត្តបានធ្វើការរិះគន់ថាបញ្ហាសំរាមនេះ បណ្តាលមកពីគម្រោងអភិវឌ្ឍន៍របស់ក្រុង ដែលពុំបានរកដំណោះស្រាយបញ្ហាសំរាមជាមុនសិន ។ ការអភិវឌ្ឍនោះ គឺផ្ទៃដីមុខផ្សារដែលមានទំហំ៥៤ម៉ែត្រគុណ១១០ម៉ែត្រ ត្រូវបានលេចលឺព័ត៌មានល្បីថា អាជ្ញាធរបានប្រគល់ឲ្យក្រុមហ៊ុនមួយវិនិយោគធ្វើជាផ្ទះល្វែងលក់អស់ទៅហើយនោះថែមទៀត ។ មជ្ឈដ្ឋាននានាក៍បានលើកឡើងទៀតថា ប្រសិនបើអាជ្ញាធរប្រគល់ឲ្យក្រុមហ៊ុនវិនិយោគជាផ្ទះល្វែងមែននោះ គឺផ្ទុយទៅនឹងអនុសាសន៍របស់សម្តេចនាយករដ្ឋមន្រ្តី ហ៊ុន សែន ដែលទុកដីមុខផ្សារបានលុងនេះ សម្រាប់ធ្វើជាចំណតយានយន្តភ្ញៀវទេសចរជាតិ និងអន្តរជាតិ ៕
ចែករំលែកព័តមាននេះ