ខេត្តស្វាយរៀង ៖ នៅលើសង្វៀនទីរួមខេត្តស្វាយរៀងថ្ងៃសៅរ៍ ទី១ វិច្ឆិកានេះ ព្រឹត្តិការណ៍ប្រកួតប្រដាល់ជាលក្ខណៈមិត្តភាពអន្តរជាតិដ៏កក្រើកមួយនឹងកើតឡើងដែលមានកីឡាករកម្ពុជា និងបរទេសចូលរួមរហូតដល់ទៅ១០គូ ។ ក្នុងនោះគូដែលគេចាប់អារម្មណ៍ជាងគេ គឺ យ៉េន ឌីណា មកពីសមាគមកីឡាប្រដាល់ក្រសួងកសិកម្ម ប្រកួតជាមួយកីឡាករជប៉ុនឈ្មោះ YU SUKE និងសែន រ៉ាឌី មកពីក្លិបអប្សរាក្បាច់គុនខ្មែរ ប្រកួតជាមួយកីឡាករមកពីប្រទេសឡាវឈ្មោះ THORNG BARNG ។
កីឡាករយ៉េន ឌីណា គឺជាម្ចាស់ខ្សែក្រវាត់ CBF ក្នុងប្រភេទទម្ងន់៥៧គីឡូក្រាម ។ លើកនេះគេត្រូវឡើងប្រកួតការពារខ្សែក្រវាត់ជាមួយអ្នកប្រដាល់ជើងខ្លាំងជបុ៉ន បុ៉ន្តែក្នុងប្រភេទទម្ងន់៦០គីឡូក្រាម ។ យ៉េន ឌីណា បានធ្វើការគ្រប់គ្រងតំណែងជាម្ចាស់ខ្សែក្រវាត់មួយនេះអស់រយៈពេល២ឆ្នាំមកហើយ ។ ចំពោះតំណែងមួយនេះទៀត គឺបានមកពីការប្រកួតឈ្នះ THORNG BARNG តាំងពីឆ្នាំ២០១២ មកម្ល៉េះ ។ បុ៉ន្តែលើកនេះអ្នកដែលត្រូវឡើងមកប្រកួតដណ្តើមមិនមែនជា THORNG BARNG ឡើយ គឺគេបានដាក់ឱ្យ YU SUKE ជាអ្នកប្រកួតដណ្តើមវិញ ។
គេធ្លាប់បានដឹងរួចមកហើយថា អ្នកប្រដាល់ជនជាតិជបុ៉នរូបនេះ គឺជាជើងខ្លាំងមួយរូបនៅប្រទេសថៃ ។ ម្យ៉ាងវិញទៀតនោះ គេថែមទាំងធ្លាប់បានមកប្រកួតនៅស្រុកខ្មែរចំនួន២លើករួចមកហើយ ដែលលើកទី១ នៅសណ្ឋាគារណាហ្គាវើលកាលពីឆ្នាំមុន បើទោះជាប្រកួតចាញ់ពិន្ទុ សែន រ៉ាឌី មែន បុ៉ន្តែគេបានបន្សក់ទុកនូវស្នាមរបួសយ៉ាងធ្ងន់ឱ្យ សែន រ៉ាឌី គឺធ្វើឱ្យថ្គាម សែន រ៉ាឌី ត្រូវបាក់សម្រាកព្យាបាលអស់ជិតកន្លះឆ្នាំឯណោះ ។ ចំណែកការប្រកួតលើកទី២ សែន រ៉ាឌី នៅតែបន្តយកឈ្នះពិន្ទុលើ YU SUKE បានដដែល ។ បានន័យថា ការមកជាន់លើសង្វៀនស្រុកខ្មែរទាំង២លើក ចាញ់ទាំង២លើកជាប់គ្នា ទោះបីយ៉ាងណា សម្រាប់ការមកប៉ះជាមួយ យ៉េន ឌីណា លើកនេះគេនៅតែមានការបារម្ភខ្លាចក្រែងតែ យ៉េន ឌីណា មិនអាចការពារតំណែងជាម្ចាស់ខ្សែក្រវាត់មួយនេះបាន ។
គូនេះមានប្រវត្តិប្រកួតមិនលើសគ្នាបុ៉ន្មានឡើយ។ យ៉េន ឌីណា ប្រកួតបានចំនួន៥៩ដង ឈ្នះ៥៥ដង ចាញ់តែ៤ដងបុ៉ណ្ណោះ និងបានវាយផ្តួលគូប្រកួតឱ្យចាញ់សន្លប់នៅលើសង្វៀនបានរហូតដល់ទៅ១៧ដង ។ ចំណែក YU SUKE វិញ ធ្លាប់ប្រកួតបានចំនួន៥០ដង ឈ្នះ៣៥ដង ចាញ់១៥ដង និងបានវាយផ្តួលគួប្រកួតឱ្យសន្លប់នៅលើសង្វៀនបានចំនួន៦ដង ។ ចំណែកសែន រ៉ាឌី ធ្លាប់ប្រកួតជាមួយម្ចាស់មេដាយមាសស៊ីហ្គេម THORNG BARNG មកពីឡាវមួយលើករួចមកហើយនៅសង្វៀនខេត្តតាកែវ ។ បុ៉ន្តែកាលណោះគេបានយកឈ្នះអ្នកប្រដាល់មកពីឡាវរូបនោះដោយពិន្ទុទាំងលំបាកបំផុត ។ សែន រ៉ាឌី ធ្លាប់តែធ្វើឱ្យអ្នកមើលភាគច្រើនមានទំនុកចិត្តបំផុត ព្រោះតែគេមានស្នៀតប្រយុទ្ធនៅលើសង្វៀនយ៉ាងសម្បូរបែប។ បុ៉ន្តែសម្រាប់ការមកប៉ះ THORNG BARNG លើកទី១ គឺប្រកួតអន់បំផុត គេស្ទើរតែមិនជឿថា សែន រ៉ាឌី អាចប្រកួតឈ្នះអ្នកប្រដាល់មកពីឡាវរូបនោះទេ ទើបលើកនេះគេរង់ចាំមើលថា តើ THORNG BARNG អាចសងសឹកបានសម្រេចឬអត់ ។
នៅលើសង្វៀននោះដែរ ពេជ្រ សីហា មកពីសមាគមកីឡាប្រដាល់ក្រសួងការពារជាតិ ប្រកួតជាមួយអ្នកប្រដាល់មកពីបារាំងឈ្មោះ MOR KAN ។ សារឿន ថាន់ មកពីក្លិបសម្រែករាជសីហ៍បង្ក្រាបគ្រឿងញៀន ប្រកួតជាមួយកីឡាករឡាវ LAM TAKKHON ។ សែន រ៉ាដេត មកពីក្លិបអប្សរាក្បាច់គុនខ្មែរ ប្រកួតជាមួយកីឡាករជបុ៉ន KA EY YO ។ ម៉ន វីរៈ មកពីក្លិបការិយាល័យទី៥ កងទ័ពជើងគោក ប្រកួតជាមួយកីឡាករជបុ៉ន TO LA ។ បាង កាយ៉ាក មកពីក្លិបវីអាយភីចំការមន ប្រកួតជាមួយកីឡាករថៃ NEV DAM ។ កំពែង ខ្មៅ មកពីក្លិបវីអាយភីចំការមន ប្រកួតជាមួយ ឆន ចន្នី មកពីក្លិបរស្មីភូមិគាបខេត្តបន្ទាយមានជ័យ ។ ទឹម សុផានី មកពីសមាគមកីឡាប្រដាល់ក្រសួងការពារជាតិ ប្រកួតជាមួយ ម៉ន សុវណ្ណ មកពីក្លិបការិយាល័យទី៥ កងទ័ពជើងគោក និងសរ សី មកពីក្លិបគិរីវង់សុខសែនជ័យ ប្រកួតជាមួយ ងួន ម៉ានុត មកពីសមាគមកីឡាប្រដាល់ខេត្តកោះកុង ៕
ចែករំលែកព័តមាននេះ