រាជធានីភ្នំពេញ ៖ នារសៀលថ្ងៃទី៣០ តុលា ឆ្នាំ២០១៤ នៅទីស្នាក់ការរបស់ខ្លួនគណៈកម្មាធិការជាតិអូឡាំពិកកម្ពុជា បានប្រកាសឱ្យដឹងពីការបង្កើតសហព័ន្ធកីឡាថ្មីមួយទៀតនៅកម្ពុជា គឺសហព័ន្ធកីឡាអេឡិចត្រូនិកកម្ពុជា (E-SPORTS) ឬ (E-Sport Federation Cambodia) អាណត្តិទី១ជាផ្លូវការដែលមានរយៈពេល៤ឆ្នាំ ចាប់ពីឆ្នាំ២០១៤ដល់ឆ្នាំ២០១៨ ។
សម្រាប់អាណត្តិទី១ សហព័ន្ធនេះមានសមាជិកគណៈកម្មាធិការប្រតិបត្តិចំនួន៩រូប ដែលមានប្រធានគឺលោក ជី សិលា, លោក ង៉ោ សាង ជាអនុប្រធាន, លោក លន់ សាមឌី ជាអគ្គលេខាធិការ, លោក ជាន ចាន់រា៉ ជាអគ្គលេខាធិការរង និងលោកស្រី ឡុង សមា៉លី អគ្គហិរញ្ញិក រួមជាមួយសមាជិក៤រូបទៀត ។ លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា ដែលបានចូលរួមប្រកាសសហព័ន្ធថ្មីនេះ បានលើកឡើងថា ការបង្កើតឱ្យមានសហព័ន្ធកីឡាអេឡិចត្រូនិកកម្ពុជា ជាការចូលរួមចំណែកក្នុងការអភិវឌ្ឍវិស័យកីឡានៅប្រទេសកម្ពុជា ស្របពេលដែលកីឡានេះកំពុងរីកចម្រើននៅទូទាំងពិភពលោក។ លោកបន្តថា ចំពោះប្រទេសកម្ពុជា គឺចាប់ផ្តើមបង្កើតសហព័ន្ធនេះឡើងក្រោយគេ ខណៈដែលនៅក្នុងអាសា៊នមាន៦ប្រទេសបានចូលជាសមាជិកសហព័ន្ធកីឡាអេឡិចត្រូនិកអន្តរជាតិរួចហើយ គឺវៀតណាម, ថៃ, សិង្ហបុរី, ហ្វ៊ីលីពីន, មា៉ឡេស៊ី និងឥណ្ឌូណេស៊ី និងបានចូលរួមប្រកួតជាលក្ខណៈអន្តរជាតិជារៀងរាល់ឆ្នាំ ។
លោកអគ្គលេខាធិការរូបនេះបានបន្ថែមថា គណៈកម្មាធិការជាតិអូឡាំពិកកម្ពុជាមានមោទនភាពណាស់ដែលបានធ្វើឱ្យវិស័យកីឡាមានភាពសំបូរបែបនៅក្នុងប្រទេសកម្ពុជា ស្របពេលដែលកីឡាជាវិស័យមួយមានចរាចរណ៍ទឹកប្រាក់នៅលើពិភពលោកច្រើនជាងវិស័យសិល្បៈទៅទៀត ។ ម្យា៉ងទៀតយើងបង្កើតសហព័ន្ធកីឡាអេឡិចត្រូនិកនេះ គឺសមស្របតាមសម័យកាលបច្ចេកវិទ្យាទំនើប ហើយកីឡាក៏មានការវិវឌ្ឍឈានទៅរកភាពទំនើបកម្មដ៏សំបូរបែបថែមទៀតផង ។ ប្រធានសហព័ន្ធកីឡាអេឡិចត្រូនិកកម្ពុជា លោក ជី សិលា បានឱ្យដឹងថា ការបង្កើតសហព័ន្ធកីឡាអេឡិចត្រូនិកនេះឡើងគឺបញ្ជាក់ឱ្យឃើញពីភាពរីកចម្រើននៃវិស័យកីឡាក្នុងប្រទេសកម្ពុជា ព្រមទាំងជំរុញលើការអភិវឌ្ឍ និងផ្សព្វផ្សាយកីឡានេះឱ្យស្របតាមគោលនយោបាយកីឡាជាតិ និងគោលការណ៍កីឡា E-SPORTS អន្តរជាតិ ។ លោកបន្តថា កីឡាអេឡិចត្រូនិក នឹងជួយបណ្តុះប្រាជ្ញា ស្មារតី និងភាពឆ្លាតវៃរបស់អត្តពលិក ហើយជំរុញ និងលើកកម្ពស់កីឡាមួយនេះ តាមរយៈតម្លៃមនុស្សជាតិ អប់រំវប្បធម៌ សាមគ្គី និងសន្តិភាព ។ លើសពីនេះសហព័ន្ធនឹងរៀបចំការប្រកួតថ្នាក់ជាតិ និងអន្តរជាតិ ដោយប្រកាន់ខ្ជាប់នូវនិយាមបច្ចេកទេស (Fair Play) ។
គួរបញ្ជាក់ផងដែរថា E-SPORTS ត្រូវបានគេស្គាល់ និងរៀបចំការប្រកួតដំបូងតាំងពីឆ្នាំ១៩៧២ នៅសហរដ្ឋអាមេរិក ។ បន្ទាប់មកសហព័ន្ធកីឡាអេឡិចត្រូនិកអន្តរជាតិ ត្រូវបានបង្កើតឡើងនៅឆ្នាំ២០០៨ ដោយមានសមាគមកីឡាអេឡិចត្រូនិកចំនួន៩ គឺដាណឺម៉ាក កូរ៉េខាងត្បូង អាល្លឺម៉ង់ អូទ្រីស បែលហ្សុិក ហុល្លង់ ស្វីស វៀតណាម និងកោះតៃវ៉ាន់ ។ សហព័ន្ធនេះមានទីស្នាកការកណ្តាលនៅប្រទេសកូរ៉េខាងត្បូងដែលបច្ចុប្បន្នមានសមាជិកចំនួន៤៦ប្រទេស ៕
ចែករំលែកព័តមាននេះ