កងទ័ពបានដណ្តើមអំណាចកាលពីយប់ថ្ងៃទី៣០ តុលា នៅប្រទេសបួរគីណាហ្វាសូ ដោយប្រកាសពីការរំលាយសភា និងរដ្ឋាភិបាល ហើយដាក់បម្រាមគោចរ បន្ទាប់ពីទិវានៃការបះបោរប្រឆាំងរបបប្រធានាធិបតីលោក Blaise Compaore ដែលកាន់អំណាចចាប់តាំងពី២៧ឆ្នាំមកហើយ ។
កងទ័ពបានដណ្តើមអំណាចកាលពីយប់ថ្ងៃទី៣០ តុលា នៅប្រទេសបួរគីណាហ្វាសូ ដោយប្រកាសពីការរំលាយសភា និងរដ្ឋាភិបាល ហើយដាក់បម្រាមគោចរ បន្ទាប់ពីទិវានៃការបះបោរប្រឆាំងរបបប្រធានាធិបតីលោក Blaise Compaore ដែលកាន់អំណាចចាប់តាំងពី២៧ឆ្នាំមកហើយ ។
សភាត្រូវដុត ទូរទស្សន៍រដ្ឋត្រូវលុកចូលកាន់កាប់ អំពើហិង្សាក៏កើតមាននៅតាមខេត្តនានាដែរ ដោយអំពាវនាវឱ្យប្រធានាធិបតីលាលែងពីតំណែង ។ ប្រទេសបួរគីណាហ្វាសូ កាលពីថ្ងៃទី៣០ តុលា មានការដុតបំផ្លាញដោយសារការបះបោរ ហើយវិបត្តិបែបនេះពុំធ្លាប់មានក្នុងប្រទេសអាហ្វ្រិកនោះ ញ៉ាំងឱ្យមានអន្តរាគមន៍របស់កងទ័ព ។ លោកប្រធានាធិបតី Blaise Compaore បដិសេធពុំព្រមលាលែង ទោះបីមានការបះបោរបង្ហូរឈាមប្រឆាំងរូបលោកក្តី ។ ការជាប់គាំងខាងនយោបាយនោះនាំឱ្យមានភាពមិនច្បាស់លាស់ក្នុងប្រទេស នាថ្ងៃខាងមុខ ។
យោងតាមសេចក្តីប្រកាសមួយរបស់នាយសេនាធិការកងទ័ព ឧត្តមសេនីយ៍ Nabere Honore Traore អានដោយនាយទាហានម្នាក់ក្នុងសន្និសីទសារព័ត៌មានមួយថា អំណាចប្រតិបត្តិនិងអំណាចនីតិប្បញ្ញត្តិ នឹងត្រូវធានាដោយអង្គការបណ្តោះអាសន្នមួយជាមួយទិសដៅវិលទៅរករបៀបរបបតាមរដ្ឋធម្មនុញ្ញវិញ ក្នុងរយៈពេល១២ខែ ។
បម្រាមគោចរត្រូវបានដាក់ទូទាំងប្រទេស ចាប់ពីម៉ោង១៩ ដល់ម៉ោង៦ព្រឹក ដើម្បីថែរក្សាសន្តិសុខ និងទ្រព្យសម្បត្តិ ។
ពួកប្រឆាំងរបស់ប្រទេសនេះនិយាយថា ភាពចលាចលបណ្តាលឱ្យមនុស្សស្លាប់ប្រមាណជា៣០នាក់ និងជាង១០០នាក់ត្រូវរបួសនៅរដ្ឋធានីអ៊ូអាហ្គាឌូហ្គូ តែមួយគត់ ។ កាលពីយប់ថ្ងៃទី៣០ តុលា ស្នូរកាំភ្លើងលាន់ឮនៅតាមច្រកចូលវិមានប្រធានាធិបតីដែលគេពុំអាចចូលទៅជិតបាន ព្រោះកងឆ្មាំប្រធានាធិបតិហាមឃាត់ ។
ការដណ្តើមអំណាចរបស់កងទ័ពសម្រាប់ពេលនេះ ពុំត្រូវបានពួកបាតុករគាំទ្រទាំងស្រុងឡើយ ។ បាតុករជាច្រើនរយនាក់អំពាវនាវឱ្យធ្វើចលនាតវ៉ាបន្តទៀតក្នុងរដ្ឋធានី ដើម្បីចៀសវាងរដ្ឋប្រហារ ។ បណ្តាអ្នកទទួលខុសត្រូវរបស់ពួកប្រឆាំងសម្រាប់ពេលនេះ AFP នៅពុំអាចទាក់ទងបាននៅឡើយ ។ នាថ្ងៃទី៣០ តុលា របបលោក Blaise Compaore ចង់រម្ងាប់ការតវ៉ាដោយប្រការពីការលុបចោលការបោះឆ្នោតលើគម្រោងកែប្រែរដ្ឋធម្មនុញ្ញដែលគ្រោងធ្វើនាថ្ងៃនោះ ដែលការបោះឆ្នោតនេះហើយ ជាដើមចមនៃការបះបោរ ។
ប្រឈមមុខនឹងសភាពការណ៍នេះ សហភាពអាហ្វ្រិកសម្តែងពីការព្រួយបារម្ភយ៉ាងខ្លាំង ហើយអំពាវនាវដល់គ្រប់ភាគីទាក់ទិនឱ្យមានការអត់ធ្មត់ខ្លាំងបំផុត ។ ចំណែកសហភាពអឺរ៉ុបអំពាវនាវឱ្យមានការចរចាដោយឆាប់រហ័ស ហើយបញ្ចប់អំពើហិង្សា ។
ប្រទេសបារាំងជាអតីតអាណានិគមលើប្រទេសនេះ ស្នើឱ្យមានភាពស្ងប់ស្ងាត់វិញ រួចសហរដ្ឋអាមេរិកសម្តែងពីការព្រួយបារម្ភជាខ្លាំង ។ អង្គការសហប្រជាជាតិ ក៏ដូចជាសហភាពអាហ្វ្រិកសម្រេចបញ្ជូនបេសកជនមួយរូបទៅកាន់ប្រទេសនេះ ។
នារសៀលថ្ងៃទី៣០ តុលា ឧត្តមសេនីយ៍ចូលនិវត្តន៍ លោក Kouame Lougue ដែលពួកបាតុករជាច្រើនសិបពាន់នាក់ស្នើឱ្យលោកឡើងកាន់អំណាច បានជួបជាមួយនាយសេនាធិការកងទ័ព ព្រមទាំងជាមួយបណ្តានាយទាហានជាន់ខ្ពស់របស់ប្រទេស ។
ជាមនុស្សដែលកងទ័ពនិងប្រជាជនស្រឡាញ់ច្រើន លោក Kouame Lougue អតីតនាយសេនាធិការ និងអតីតរដ្ឋមន្ត្រីការពារប្រទេស រហូតដល់ពេលត្រូវដកតំណែង កាលពីឆ្នាំ២០០៣ និយាយថា កងទ័ពផ្សារភ្ជាប់ជាមួយប្រជាជន ហើយលោកគ្រាន់តែស្នើឱ្យប្រធានាធិបតីលាលែងចេញពីតំណែងប៉ុណ្ណោះ ។
នៅតាមច្រកចូលវិមានប្រធានាធិបតី ភាពតានតឹងនៅតែខ្លាំងក្លា ។ បាតុករជាច្រើនរយនាក់ ប្រឈមមុខនឹងកងទាហានឆ្មាំប្រធានាធិបតី ហើយទាហានមួយចំនួនបានបាញ់ព្រមាន ។
ឡើងកាន់អំណាច២៧ឆ្នាំមកហើយ បន្ទាប់ពីរដ្ឋប្រហារឆ្នាំ១៩៨៧ លោកប្រធានាធិបតី Compaore ត្រូវចប់អាណត្តិចុងក្រោយរបស់លោកនាឆ្នាំខាងមុខនេះ បន្ទាប់ពីការកាន់អំណាចដោយជាប់ឆ្នោតអាណត្តិទី១ មានរយៈពេល១៣ឆ្នាំ (១៩៩២-២០០៥) និងអាណត្តិទី២ មានរយៈពេល១០ឆ្នាំ (២០០៥-២០១៥) ។ លោកបានកែប្រែរដ្ឋធម្មនុញ្ញ២លើករួចមកហើយ គឺកាលពីឆ្នាំ១៩៩៧ បន្ទាប់មកក្នុងឆ្នាំ២០០០ ដើម្បីរក្សាអំណាច ហើយលោកការពារគម្រោងរបស់លោក ដើម្បីឱ្យអាចកាន់អំណាចអាណត្តិទី៣មួយទៀត ។
ពួកប្រឆាំងរយៈពេលប៉ុន្មានថ្ងៃចុងក្រោយនេះ មានបំណងចង់ផ្តួលរំលំរបបប្រធានាធិបតីរូបនេះ ដែលគេចាត់ទុកថាជារបបមានស្ថិរភាពបំផុតមួយនៃតំបន់ ។ កាលពីថ្ងៃទី២៨ តុលា មនុស្សជាច្រើនពាន់នាក់ ហើយបើតាមពួកប្រឆាំងថាមានដល់១លាននាក់ បានលើកគ្នាធ្វើបាតុកម្មនៅរដ្ឋធានីអ៊ូអាឌូហ្គូ ដើម្បីបរិហារពីការធ្វើរដ្ឋប្រហាររដ្ឋធម្មនុញ្ញ ៕
ចែករំលែកព័តមាននេះ