រាជធានីភ្នំពេញ ៖ ការប្រកួតកីឡាតេក្វាន់ដូដណ្តើមពានរង្វាន់ជើងឯកឯកអគ្គរដ្ឋទូតសាធារណរដ្ឋកូរ៉េ (Korean Ambassador’s Cup Tae Kwon Do Competition) ឬ «Best of The Best 2014» ដែលបានចាប់ផ្តើមកាលពីព្រឹកថ្ងៃទី២៩ តុលា នៅក្នុងសាលប្រកួតកីឡាតេក្វាន់ដូនៃពហុកីឡដ្ឋានជាតិនោះបានបញ្ចប់ហើយកាលពីល្ងាចថ្ងៃទី៣០ តុលា ។
រាជធានីភ្នំពេញ ៖ ការប្រកួតកីឡាតេក្វាន់ដូដណ្តើមពានរង្វាន់ជើងឯកឯកអគ្គរដ្ឋទូតសាធារណរដ្ឋកូរ៉េ (Korean Ambassador’s Cup Tae Kwon Do Competition) ឬ «Best of The Best 2014» ដែលបានចាប់ផ្តើមកាលពីព្រឹកថ្ងៃទី២៩ តុលា នៅក្នុងសាលប្រកួតកីឡាតេក្វាន់ដូនៃពហុកីឡដ្ឋានជាតិនោះបានបញ្ចប់ហើយកាលពីល្ងាចថ្ងៃទី៣០ តុលា ។
ពិធីបិទការប្រកួតត្រូវបានគេរៀបចំធ្វើក្រោមអធិបតីភាពលោក Kim Han Soo ឯកអគ្គរដ្ឋទូតកូរ៉េប្រចាំនៅកម្ពុជា និងលោកវ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា ដោយមានការចូលរួមពីមន្ត្រីពាក់ព័ន្ធជាច្រើននាក់ទៀត ។ លោក Choi Yong Sok គ្រូបង្វឹកកីឡាការិនី ស៊ន សៀវមុី ម្ចាស់មេដាយមាសកីឡាអាស៊ី បានថ្លែងឱ្យដឹងថា ការប្រកួតកីឡាតេក្វាន់ដូដណ្តើមពានរង្វាន់ឯកអគ្គរដ្ឋទូតសាធារណរដ្ឋកូរ៉េនេះ គឺមានក្លិប និងសមាគមចំនួន២៨មកពីទូទាំងប្រទេស ដែលមានកីឡាករ-កីឡាការិនីសរុបចំនួន១៤៧នាក់ (ស្រី៥៥នាក់) ចូលរួមប្រកួតលើវិញ្ញាសាចំនួន២ ធំៗ គឺវិញ្ញាសាសម្តែងមេគុន និងវិញ្ញាសាប្រយុទ្ធ ។
ជាលទ្ធផលក្រោយឆ្លងកាត់ការប្រកួតរយៈពេល២ថ្ងៃមកនោះ ចំណាត់ថ្នាក់លេខ១ បានទៅក្លិបហូសាណា ដែលរកបានមេដាយសរុបចំនួន៣១គ្រឿង, លេខ២ បានទៅអង្គការភាពញញឹមនៃកុមារ រកបានមេដាយ២៧គ្រឿង និងចំណាត់ថ្នាក់លេខ៣ បានទៅក្លិបខ្លា «ស» ដែលរកបានមេដាយចំនួន១៧គ្រឿង ។ លោកវ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានមានប្រសាសន៍ថា តេក្វាន់ដូបានក្លាយជាគំរូនៃកីឡាទាំងអស់នៅក្នុងប្រទេសកម្ពុជា និងក្លាយជាកម្លាំងចលករដ៏សំខាន់សម្រាប់ជំរុញការអភិវឌ្ឍវិស័យកីឡាជាតិ ។
យើងពិតជាមានកិត្តិយសខ្លាំងណាស់ដែលឯកអគ្គរដ្ឋទូតសាធារណរដ្ឋកូរ៉េ បានយកចិត្តទុកដាក់ពង្រឹងវិស័យកីឡាតេក្វាន់ដូកម្ពុជាឱ្យកាន់តែរីកចម្រើនបន្ថែមទៀតនោះ ។ ដូច្នេះសូមឱ្យកីឡាករ-កីឡាការិនី និងយុវជនជំនាន់ក្រោយទាំងអស់ត្រូវបន្តខិតខំហ្វឹកហាត់បន្ថែមទៀតដើម្បីត្រៀមចូលរួមប្រកួតកីឡា SEA Games លើកទី២៨ នៅប្រទេសសិង្ហបុរី ដែលនឹងចាប់ផ្តើមនៅឆ្នាំ២០១៥ ខាងមុខនេះ ។ លោក Kim Han Soo ឯកអគ្គរដ្ឋទូតកូរ៉េប្រចាំប្រទេសកម្ពុជា បន្ទាប់ពីទទួលបានជោគជ័យក្នុងការរៀបចំព្រឹត្តិការណ៍ Best of the Best 2014 លោកបានសម្តែងនូវទឹកចិត្តសប្បាយរីករាយនៅពេលទទួលបានការចូលរួមយ៉ាងច្រើនកុះករពីសំណាក់កីឡាករ-កីឡាការិនីកម្ពុជា ជាពិសេសលោកក៏បានចូលរួមអបអរសាទរកីឡាការិនី ស៊ន សៀវមុី ដែលដណ្តើមបានមេដាយមាស១គ្រឿងជូនប្រទេសជាតិកម្ពុជា ក្នុងព្រឹត្តិការណ៍កីឡាអាស៊ី ឬ Asian Games លើកទី១៧ ដែលទើបនឹងបញ្ចប់កាលពីពេលថ្មីៗកន្លងទៅនេះ ។
គួរបញ្ជាក់ផងដែរថា ព្រឹត្តិការណ៍នេះមានការចូលរួមសុទ្ធតែជាកីឡាករ-កីឡាការិនីដែលមានចំណាត់ថ្នាក់ល្អៗគឺលេខ១ ឬលេខ២ ក្នុងការប្រកួតជើងឯកថ្នាក់ជាតិកន្លងមក និងកីឡាករ-កីឡាការិនីដែលមានចំណាត់ថ្នាក់ក្នុងការប្រកួតប្រចាំខែ ដែលសហព័ន្ធបានធ្វើ៧ខែកន្លងមកក្នុងកម្មវិធី Hope Tae Kwon Do 2023 ។ មិនត្រឹមតែបុ៉ណ្ណោះ កម្មវិធី Hope Tae Kwon Do 2023 គឺជាព្រឹត្តិការណ៍ប្រកួតប្រចាំខែមួយដែលសហព័ន្ធបង្កើតឡើងដើម្បីស្វែងរកកីឡាករ-កីឡាការិនីក្មេងៗដើម្បីត្រៀមសម្រាប់ឆ្នាំ២០២៣ ដែលកម្ពុជាធ្វើជាម្ចាស់ផ្ទះ SEA Games ថែមទៀតផង ៕
ចែករំលែកព័តមាននេះ