ពលរដ្ឋអ៊ុយក្រែនអាចមានឧស្ម័នប្រើនារដូវរងានេះ ។ បន្ទាប់ពីការចរចាគ្នាយ៉ាងស្វិតស្វាញរយៈពេល២ថ្ងៃមក រុស្ស៊ី អ៊ុយក្រែន និងសហភាពអឺរ៉ុបសម្រេចបានកិច្ចព្រមព្រៀងមួយកាលពីថ្ងៃទី៣០ តុលា នៅទីក្រុងព្រុចសែល ស្តីពីបណ្តាលក្ខខណ្ឌនៃការផ្គត់ផ្គង់ឧស្ម័នរុស្ស៊ីឡើងវិញដល់អ៊ុយក្រែន ។
កិច្ចព្រមព្រៀងនេះផ្តោតជាពិសេសលើការសងបំណុលឧស្ម័នរបស់អ៊ុយក្រែនដល់រុស្ស៊ី រួចការផ្គត់ផ្គង់ឧស្ម័នឡើងវិញនេះអាចមានជាធរមានរហូតដល់ខែមីនា ឆ្នាំ២០១៥ ដែលអាចចៀសវាងគ្រោះថ្នាក់ដល់ប្រជាជនអ៊ុយក្រែនដែលរងគ្រោះដោយសង្គ្រាមនៅភាគខាងកើតប្រទេស ហើយកំពុងជួបការលំបាកខ្លាំងខាងសេដ្ឋកិច្ច។ កិច្ចព្រមព្រៀងនេះ ក៏អាចឱ្យពួកអឺរ៉ុបធានាសន្តិសុខនៃការផ្គត់ផ្គង់ឧស្ម័នរបស់ពួកគេ ខណៈ១៥% នៃឧស្ម័នដែលពួកគេប្រើប្រាស់បញ្ជូនមកតាមបណ្តាបំពង់ឧស្ម័នកាត់ប្រទេសអ៊ុយក្រែនដែរ ។
អ៊ុយក្រែនពុំបានបង់ប្រាក់ថ្លៃទិញឧស្ម័នរុស្ស៊ីពីខែកញ្ញា ឆ្នាំ២០១៣ មក ។ រុស្ស៊ីបានកាត់ផ្តាច់ការផ្តល់ឧស្ម័នឱ្យប្រទេសនេះកាលពីខែមិថុនាកន្លងមក ។ យោងតាមកិច្ចព្រមព្រៀងនោះ អ៊ុយក្រែនត្រូវសងបំណុលនៃប្រាក់ជំពាក់ថ្លៃឧស្ម័នដែលមានសរុប៣,១ពាន់លានដុល្លារ ។ ការបង់ប្រាក់ជំពាក់នេះត្រូវធ្វើជា២ដំណាក់កាល ដោយដំណាក់កាលដំបូងមុនដំណាច់ខែវិច្ឆិកា ត្រូវសង១,៤៥ពាន់លានដុល្លារ ហើយដំណាក់កាលទី២ បង់១,៦៥ពាន់លានដុល្លារ ត្រូវបង់ឱ្យបានមុនដាច់ខែធ្នូ ។
រុស្ស៊ីដែលវាយតម្លៃពីបំណុលថ្លៃឧស្ម័នរបស់អ៊ុយក្រែនថា មានសរុបដល់ទៅ៥,៣ពាន់លានដុល្លារនោះនិយាយថា ខ្លួនបានធ្វើសម្បទានធំមួយ ។ អ៊ុយក្រែន និងរុស្ស៊ីរង់ចាំការកាត់ក្តីរបស់តុលាការអាជ្ញាកណ្តាលក្រុងស្កុកខូល ដែលត្រូវបញ្ជាក់លើតម្លៃឧស្ម័នដែលរុស្ស៊ីកំណត់សម្រាប់លក់ឱ្យក្រុងគៀវ ។ ប្រសិនបើតុលាការនេះកាត់ក្តីគាំទ្ររុស្ស៊ីនោះអ៊ុយក្រែនត្រូវសងបំណុលថែមទៀត ៕
ចែករំលែកព័តមាននេះ