ខេត្តតាកែវ ៖ បន្ទាប់ពីកោះសន្តិភាពបានផ្សាយដោយភាន់ច្រឡំ និងមានពាក្យចចាមអារ៉ាមពីមាត់មួយទៅមាត់ថា លោកតាព្រឹទ្ធាចារ្យភារម្យប្រាជ្ញ ឈួន អ្នកដេញចាប៉ីដងវែងដ៏ល្បីល្បាញបានទទួលមរភាពហើយ ធ្វើឱ្យមានការភ្ញាក់ផ្អើលដល់ប្រជាពលដ្ឋគ្រប់គ្នា។ ដើម្បីឱ្យអស់ចម្ងល់នោះ កោះសន្តិភាពបានចុះទៅដល់គេហដ្ឋានរបស់លោកតែម្តង ហើយឃើញច្បាស់ថា ព័ត៌មានទាំងអស់នេះ មិនពិតនោះឡើយ ដោយស្ថានភាព និងសុខភាពរបស់លោកគឺល្អប្រសើរ និងបាននិយាយលេងសើចសប្បាយថែមទៀតផង។
បើតាមសម្តីភរិយាលោកតាឈ្មោះកែវ ព្រីង អាយុ៦៦ឆ្នាំ បានមានប្រសាសន៍ថា លោកតាព្រឹទ្ធាចារ្យភារម្យ ប្រាជ្ញ ឈួន ក្នុងវ័យប្រមាណ៧៨ឆ្នាំ ហើយពេលនេះគាត់អត់បានស្លាប់ដូចពាក្យចចាមអារ៉ាមឡើយ ហើយសុខភាពរបស់គាត់វិញល្អប្រសើរ សម្រាន្ត និងងើបអង្គុយដោយខ្លួនឯង ចំពោះការហូបបាយវិញក៏ធម្មតាដែរ ចំពោះក្រុមគ្រួសាររបស់លោកព្រឹទ្ធាចារ្យភារម្យ ប្រាជ្ញ ឈួន រស់នៅភូមិស្រម៉ក្រោម ឃុំខ្វាវ ស្រុកទ្រាំង ខេត្តតាកែវ ។
លោកតាព្រឹទ្ធាចារ្យភារម្យប្រាជ្ញ ឈួន បានមានប្រសាសន៍លេងសើចថា ខ្ញុំអត់អីទេ កុំបារម្ភអី សុខភាពល្អ គ្រាន់តែងងឹតភ្នែកមើលមិនសូវឃើញតែប៉ុណ្ណោះ នៅពេលហូបបាយ បើសិនមានម្ហូបត្រូវមាត់នោះបានមួយចានដែរ គ្រាន់តែស្ថានភាពនៅក្រុមគ្រួសារនៅពេលអស់ពីលោកតាទៅ មានជីវភាពខ្វះខាតបន្តិច ។
គួរបញ្ជាក់ថា លោកតាព្រឹទ្ធាចារ្យភារម្យ ប្រាជ្ញ ឈួន មានភរិយា មុនឈ្មោះកែវ យឹម អាយុ៧០ឆ្នាំ បានស្លាប់ និងបន្សល់ទុកកូនប្រុសចំនួន៥នាក់ រួចលោកតាក៏មានភារិយាក្រោយជាប្អូនរបស់ភរិយាមុនមកជួយថែរក្សាលោកតារហូត ថ្វីដ្បិតតែពេលនេះ លោកតាដើរមិនសូវបានភ្នែកមើលមិនសូវឃើញ តែលោកតានៅអាចច្រៀងចាប៉ីបានខ្លះៗដែរ ។
ចែករំលែកព័តមាននេះ