រាជធានីភ្នំពេញ ៖ បើទោះបីជាមិនបានជាប់ចំណាត់ថ្នាក់ក្នុងការប្រឡងកញ្ញាឯកប្រ៊ីជស្តុនកាលពីឆ្នាំកន្លងទៅក៏ដោយ ប៉ុន្តែកញ្ញា អាត កញ្ញា នៅតែទទួលបានពន្លឺជីវិតថ្មីនៅលើវិថីសិល្បៈ ក្នុងនោះនាងត្រូវបានទទួលការជ្រោមជ្រែងពីអ្នកដឹកនាំរឿង ដើម្បីបានសម្តែងជាឯកស្រីរងជាលើកដំបូងនៅក្នុងរឿង «នេះគឺជីវិត» ដែលកំពុងចាក់ផ្សាយនៅលើកញ្ចក់ទូរទស្សន៍ខ្មែរប៉ុស្តិ៍លេខ៩ ពីថ្ងៃច័ន្ទ ដល់ថ្ងៃពុធ។
ក្នុងបទសម្ភាសន៍ជាមួយកោះសន្តិភាពដោយផ្ទាល់កាលពីពេលកន្លងទៅថ្មីៗនេះ តារាចំណូលថ្មីដែលមានប្រភពមកពីខេត្តកំពតរូបនេះបានអះអាងថា សម្រាប់វត្តមានសម្តែងខ្សែភាពយន្តជាលើកដំបូងនេះ នាងពិតជាមានអារម្មណ៍សប្បាយរីករាយយ៉ាងខ្លាំង ដោយសារនេះជាបំណងប្រាថ្នាលរបស់នាងតាំងពីតូច។ នាងបញ្ជាក់ថា ចំណង់ចំណូលចិត្ត និងការជម្រុញលើកទឹកចិត្តពីក្រុមគ្រួសារ បានធ្វើឲ្យរូបនាងហ៊ានប្រឈមមុខលើវេទិកាប្រឡងប្រជែងជ្រើសរើសញ្ញាឯកប្រ៊ីជស្តុនជាមួយបេក្ខនារីជាច្រើនរូប។ ឆ្លងកាត់វគ្គជម្រុះពីមួយវគ្គទៅមួយវគ្គនាងស្ទើរតែមិនជឿខ្លួនឯងថា រូបនាងអាចឆ្លងកាត់ជាច្រើនដំណាក់កាល រហូតឈានដល់វគ្គពាក់កណ្តាលផ្តាច់ព្រ័តដោយមិននឹកស្មានដល់។
អាត កញ្ញា បន្ថែមថា បើទោះបីជានាងអាចឈានមកដល់វគ្គនេះក៏ដោយ ប៉ុន្តែនាងនៅតែមិនអាចសម្រេចបំណងរបស់ខ្លួនក្នុងការឈានដល់វគ្គផ្តាច់ព័ត្រឡើយ ពោលគឺនាងបានធ្លាក់ការប្រកួតនៅក្នុងវគ្គពាក់កណ្តាលផ្តាច់ព្រ័ត្រនេះតែម្តង។យ៉ាងណាក៏ដោយ បើទោះបីជាមិនបានជាប់ដល់ជុំចុងក្រោយ រូបនាងក៏ត្រូវបានការលើកទឹកចិត្តពីអ្នកដឹកនាំរឿង និងអ្នកគ្រប់គ្រងស្ថានីយទូរទស្សន៍ខ្មែរប៉ុស្តិ៍លេខ៩ ក្នុងការសម្តែងខ្សែភាពយន្តភាគជាលើកដំបូងឲ្យស្ថានីយទូរទស្សន៍នេះផងដែរ។ នាងបញ្ជាក់ថា ដំបូងឡើយនាងមិនសូវជាទុកចិត្តខ្លួនឯងនៅក្នុងការសម្តែងនេះឡើយ ប៉ុន្តែដោយសារតែការជួយបង្ហាត់បង្រៀនពីលោកគ្រូ អ្នកគ្រូមួយចំនួននៅស្ថានីយទូរទស្សន៍ខ្មែរប៉ុស្តិ៍លេខ៩ បូករួមជាមួយចំណង់ចំណូលចិត្តតាំងពីតូចផងនោះ ទើបនាងអាចសម្រេចនូវសម្ធិផលដ៏ល្អជាលើកដំបូងនៅក្នុងការសម្តែងនេះ។
ក្នុងវ័យ១៩ឆ្នាំ អាត កញ្ញា បានរំពឹងទុកថា ក្នុងតំណែងតួរងជាលើកដំបូងនៅក្នុងអាជីពសម្តែងរបស់នាងនាពេលនេះនឹងអាចទទួលបានការគាំទ្រពីសំណាក់ទស្សនិកជនជាក់ជាមិនអាច ហើយរូបនាង និងខិតខំហាត់ពុធលត់ដុំខ្លួនឯងបន្ថែមទៀត ដើម្បីឈានទៅចាប់គោលដៅដែលនាងចង់បាននាពេលអនាគត ។
ចែករំលែកព័តមាននេះ