ខេត្តកំពង់ស្ពឺ ៖ គ្រោះថ្នាក់ចរាចរណ៍បានកើតឡើង រវាងម៉ូតូនិងម៉ូតូ បណ្តាលឱ្យបុរសម្នាក់ស្លាប់ ពេលបញ្ជូនទៅសង្គ្រោះនៅមន្ទីរពេទ្យ ចំណែកបង្ករត់បាត់ ។ ហេតុការណ៍នេះកើតឡើងកាលពីវេលាម៉ោង៧និង៣០នាទីយប់ថ្ងៃទី៣០ តុលា នៅតាមបណ្តោយផ្លូវជាតិលេខ៤ ត្រង់ចំណុចភូមិពង្រធំ ឃុំកាហែង ស្រុកសំរោង ។
ជនរងគ្រោះដែលស្លាប់មានឈ្មោះ សឹង្ហ ចាន់ណា ភេទប្រុស អាយុ៣២ឆ្នាំ មានលំនៅភូមិសំបួរ ឃុំមហាសាំង ស្រុកភ្នំស្រូច មុខរបរជាងដែក ចំណែកអ្នករួមដំណើរម្នាក់ទៀតឈ្មោះ ម៉ៅ ម៉ារី ភេទប្រុស អាយុ៣៨ឆ្នាំ មុខរបរជាងដែកដូចគ្នា មានលំនៅភូមិកើតហេតុ ។
តាមការឱ្យដឹងពីឈ្មោះ ម៉ៅ ម៉ារី បានបញ្ជាក់ថា ពេលកើតហេតុ ជនរងគ្រោះបានមកលេងផ្ទះរបស់គាត់ លុះអង្គុយលេងបានមួយសន្ទុះ អ្នករងគ្រោះបានពឹងគាត់ឱ្យជូនត្រឡប់ទៅផ្ទះវិញ ដោយជិះម៉ូតូសេ១០០កូរ៉េ ពណ៌ក្រហម ពាក់ស្លាកលេខសៀមរាប 1M-1611 ទិសដៅពីត្បូងទៅជើង ។ លុះមកដល់ចំណុចកើតហេតុ ក៏បត់ឆ្វេងទៅទិសខាងលិច ស្រាប់តែមានម៉ូតូមួយគ្រឿងមិនស្គាល់ម៉ាកបានបុកពេញទំហឹង បណ្តាលឱ្យឈ្មោះ សឹង្ហ ចាន់ណា រងរបួសធ្ងន់ និងបានស្លាប់ពាក់កណ្តាលផ្លូវ ពេលបញ្ជូនទៅសង្គ្រោះនៅមន្ទីរពេទ្យ រីឯរូបគេគ្រាន់តែរបួសស្រាល ៕
ចែករំលែកព័តមាននេះ