រាជធានីភ្នំពេញ ៖ រថយន្តក្រុង២៥កៅអីមួយគ្រឿងដឹកភ្ញៀវទៅចូលរួមក្នុងពិធីបុណ្យកឋិនទានមួយកន្លែង ពេលទៅដល់អ្នកបើកបរភ្លេចដកកូនសោរថយន្តចេញ ខណៈនោះក្មេងប្រុសម្នាក់ដែលមានអាយុទើបតែ៥ឆ្នាំបានឡើងទៅកាច់សោបញ្ឆេះបើកបណ្ដាលឲ្យរថយន្តនោះបោលបុកចូលរោងបុណ្យកឋិន និងបុករថយន្តម៉ាកឡិចស៊ីសRX-300 មួយគ្រឿងទៀតដែលចតក្បែរនោះទាំងកំរោលបណ្ដាលឲ្យរងការខូចខាតយ៉ាងដំណំ ចំណែកភ្ញៀវនៅក្នុងរោងបុណ្យនោះបានរត់ជាន់ជើងគ្នាទាំងព្រលឹងចុងសក់ ប៉ុន្តែមិនបានបង្កឲ្យមនុស្សណាម្នាក់រងរបួស ឬស្លាប់ឡើយ។
ហេតុការណ៍នោះបង្កឱ្យមានការភ្ញាក់ផ្អើលកាលពីវេលាម៉ោង៧ និង២៥នាទីយប់ ថ្ងៃទី៣០ តុលា ២០១៤ នៅតាមបណ្ដោយផ្លូវជាតិលេខ៤ ត្រង់ចំណុចភូមិត្រពាំងគល់ សង្កាត់កន្ទោក ខណ្ឌពោធិ៍សេនជ័យ រាជធានីភ្នំពេញ។
រថយន្តក្រុងមួយគ្រឿងនោះពណ៌សឆ្នូតក្រហម និងខៀវ ពាក់ស្លាកលេខ ភ្នំពេញ3C-2762 បើកបរដោយបុរសម្នាក់មិនស្គាល់ឈ្មោះ ចំណែកឯក្មេងប្រុស អាយុ៥ឆ្នាំនោះ ក៍មិនត្រូវបានស្គាល់ឈ្មោះដែរ។ ដោយឡែករថយន្តឡិចស៊ីសRX-300 ដែលទទួលរងការខូចខាតដែរនោះ ពណ៌ស្ករ ពាក់ស្លាកលេខ ភ្នំពេញ2S-1564 ។
ក្រោយពេលកើតហេតុ ភាគីទាំងអស់បានសម្របសម្រួលគ្នា ដោយយល់ព្រមយករយន្តទៅជួសជុលដោយខ្លួនឯងរៀងខ្លួន ចំណែកខាងម្ចាស់រោងបុណ្យក៍មិនបានឲ្យចេញសំណងអ្វីដែរ ព្រោះសុទ្ធតែជាអ្នកធ្វើបុណ្យ ៕
ចែករំលែកព័តមាននេះ