ខេត្តព្រះសីហនុ ៖ បុរសម្នាក់ត្រូវកំលាំងសមត្ថកិច្ចជំនាញការិយាល័យប្រឆាំងការជួញដូរនៃស្នងការដ្ឋានគរបាលខេត្តព្រះសីហនុឃាត់ខ្លួនបានភ្លាមៗ ខណៈពេលកំពុងចែកចាយគ្រឿងញៀន កាលពីវេលាម៉ោង៥ល្ងាច ថ្ងៃទី៣០ តុលា ២០១៤ ត្រង់ចំណុចផ្ទះជនសង្ស័យស្ថិតក្នុងក្រុមទី១៤ ភូមិ៤ សង្កាត់ទំនប់រលក ស្រុកស្ទឹងហាវ ខេត្តព្រះសីហនុ។
យោងតាមប្រភពពីលោកវរសេនីយ៍ទោ តាក សារិទ្ឋ នាយការិយាល័យប្រឆាំងបទល្មើសនៃស្នងការដ្ឋាននគរបាលខេត្តព្រះសីហនុបានបញ្ជាក់ថា ការចាប់ឃាត់ខ្លួននេះត្រូវបានធ្វើឡើង បន្ទាប់ពីកំលាំងរបស់លោកធ្វើការស៊ើបអង្កេតអស់ជាច្រើនសប្តាហ៍កន្លងមក ។
រហូតដល់ថ្ងៃទី៣០ តុលា ២០១៤ វេលាម៉ោងខាងលើ ខណៈពេលជនសង្ស័យកំពុងធ្វើសកម្មភាពចែកចាយទើបកំលាំងរបស់លោកចុះធ្វើការឃាត់ខ្លួនតែម្តង។ ជនសង្ស័យមានឈ្មោះ ជឿង វាសនា ភេទប្រុស អាយុ៣៤ឆ្នាំ មុខរបរជាអ្នកនេសាទ មានទីលំនៅភូមិអូតាប៉ាង ឃុំអូឧកញ៉ាហេង ស្រុកព្រៃនប់។ ក្រោយឃាត់ខ្លួនជនសង្ស័យ សមត្ថកិច្ចបានដកហួតវត្ថុតាងមួយចំនួនរួមមាន ថ្នាំញៀនប្រភេទមេតាំហ្វេតាមិន ICE ចំនួន២កញ្ចប់តូចស្មើនឹង ០.9ក្រាម។៕
ចែករំលែកព័តមាននេះ