រាជធានីភ្នំពេញ ៖ បុរសម្នាក់ជិះម៉ូតូឌុបកូនទៅស៊ីឈ្នួលជៀរសាច់គោឱ្យគេ ត្រូវក្រុមជនសង្ស័យមួយក្រុមជិះម៉ូតូបីគ្រឿងមកកៀប និងបានយកកាំភ្លើងភ្ជង់ប្លន់យកម៉ូតូបុរសរូបនោះជិះគេចខ្លួនដោយសុវត្ថិភាព។ ហេតុការណ៍នេះកើតឡើងកាលពីវេលាម៉ោង ៤ទៀបភ្លឺ ឈានចូលថ្ងៃទី ៣១ តុលា ២០១៤ នៅចំណុចផ្លូវម៉ៅសេទុង កែង និង ផ្លូវលេខ១៩៣ ស្ថិតក្នុងសង្កាត់ទួលស្វាយព្រៃទី២ ខណ្ឌចំការមន ។
ជនរងគ្រោះទី១.ឈ្មោះ ស្មាន សេន ភេទប្រុស អាយុ៤០ឆ្នាំ ចំណែកជនរងគ្រោះទី២.ឈ្មោះ សា លី ភេទប្រុស អាយុ១៧ឆ្នាំ ។ ជនរងគ្រោះទាំងពីរនាក់គឺជាឪពុកកូន ហើយរស់នៅក្នុងភូមិព្រែកតាពៅ សង្កាត់ព្រែកប្រា ខណ្ឌច្បារអំពៅ ។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគឺបុរសរងគ្រោះបានជិះម៉ូតូហុងដាឌ្រីមសេ១២៥ ពណ៌ខ្មៅ មួយគ្រឿងពាក់ស្លាកលេខភ្នំពេញ1CJ-5427 ឌុបកូនប្រុសឈ្មោះ សាលី ចេញពីផ្ទះនៅសង្កាត់ព្រែកប្រា ទៅធ្វើការស៊ីឈ្នួលជៀរ សាច់គោឱ្យគេនៅសង្កាត់បឹងសាឡាង ខណៈធ្វើដំណើរមកដល់ចំណុចកើតហេតុក៏មានក្រុមជនសង្ស័យមួយក្រុមជិះម៉ូតូបីគ្រឿង បានជិះម៉ូតូមកកៀបម៉ូតូរបស់ជនរងគ្រោះដោយម៉ូតូជនសង្ស័យពីរគ្រឿងម៉ាក ស៊ុយស៊ូគីនិច និង ម៉ាក វីវ៉ា ជិះមកកៀបសងខាងម៉ូតូជនរងគ្រោះនិងម៉ូតូហុងដាឌ្រីម មួយគ្រឿងទៀតរបស់ក្រុមជនសង្ស័យ ឈប់ស្ទាក់ពីមុខជាប់។ បន្ទាប់មកក្រុមជនសង្ស័យបាន យកកាំភ្លើងគំរាមឱ្យបុរសរងគ្រោះប្រគល់ម៉ូតូឱ្យក្រុមពួកវាតាមសម្រួល តែជនរងគ្រោះមិនព្រម ក្រុមជនសង្ស័យក៏បានដកសោម៉ូតូពីជនរងគ្រោះ និងបានយកកាំភ្លើងមកវាយ ចំថ្ពាល់ខាងឆ្វេង និងកំភួនដៃខាងស្តាំរបស់ជនរងគ្រោះបណ្តាលឱ្យរបួសហូរឈាម ។ បន្ទាប់មកទៀតក្រុមជនសង្ស័យក៏បានដកកាំភ្លើងអាមេ ភ្ជង់គំរាមជនរងគ្រោះឱ្យចុះពីលើម៉ូតូ រូចក្រុមជនសង្ស័យបានឡើងជិះម៉ូតូរបស់ជនរងគ្រោះបើកគេចខ្លួនដោយសុវត្ថិភាព ដោយបន្សល់ទុកនៅជនរងគ្រោះពីរនាក់ ឪពុកនិងកូនឈរសោកស្តាយម៉ូតូនៅកន្លែងកើតហេតុ ។
បន្ទាប់ពីក្រុមជនសង្ស័យប្លន់ម៉ូតូជិះគេចខ្លួនដោយសុវត្ថិភាពហើយនោះគេបានឃើញសមត្ថកិច្ចនៅប៉ុស្តិ៍ទំនប់ ទឹក និង សមត្ដកិច្ចនៅប៉ុស្តិ៍ទួលស្វាយព្រៃពីរបានចុះមកដល់កន្លែងកើតហេតុក៏បានប្រកែកគ្នាមួយប្រាវដោយនិយាយពីទឹកដីកើតហេតុស្ថិតនៅក្នុងសង្កាត់ទំនប់ទឹក ឬ សង្កាត់ទួលស្វាយព្រៃទី២ ព្រោះកន្លែងកើតហេតុគឺស្ថិតនៅចំណុចជាប់គ្នារវាងសង្កាត់ទាំងពីរនេះ។ ពេលនោះសមត្ថកិច្ចបានឱ្យជនរងគ្រោះចង្អុលទៅទីទាំងកើតហេតុ ហើយជនរងគ្រោះក៏បានចង្អុលទៅទីតាំងស្ថិតក្នុងសង្កាត់ទួលស្វាយព្រៃទី២ ។
ក្រោយពីប្រកែករកទីតាំងកើតហេតុច្បាស់លាស់ហើយនោះសមត្ថកិច្ចប៉ុស្តិ៍នគរបាលរដ្ឋបាលទំនប់ទឹក ក៏បានជិះម៉ូតូត្រឡប់ទៅកន្លែងវិញ ចំណែកសមត្ថកិច្ចប៉ុស្តិ៍ទួលស្វាយព្រៃទី២ បានបាននាំជនរងគ្រោះជិះទៅដាក់ណាក្យបណ្តឹងតែម្តង ។
ចែករំលែកព័តមាននេះ