ខេត្តមណ្ឌលគិរី ៖ ម៉ូតូដឹកឈើឈើប្រណីតប្រភេទធ្នង់ជាច្រើនកំណាត់ ត្រូវបានមន្រ្តីមន្ទីរបរិស្ថានខេត្ត ចាប់បង្ក្រាបបាននៅវេលាម៉ោង៥ និង ៣០នាទីល្ងាចថ្ងៃទី៣០ តុលា ២០១៤ នៅចំណុចភូមិពូត្រុំ សង្កាត់មនោរម្យ ស្រុកសែនមនោរម្យ បន្ទាប់ពីចាប់បានហើយនោះក៏យកប្រគល់ឲ្យមន្រ្តីខណ្ឌរដ្ឋបាលព្រៃឈើជាអ្នកចាត់ការបន្ត។
ឈើប្រណីតដែលមន្រ្តីជំនាញចាប់បង្ក្រាបបានខាងលើមានចំនួន២៤កំណាត់ ដឹកតាមរយៈម៉ូតូកែច្នៃពីរគ្រឿង ខណៈពួកឈ្មួញកំពុងបើកបរតាមផ្លូវចូលទីរួមខេត្ត ។ សេចក្តីរាយការណ៍បាននិយាយថា ឈើទាំងពីរម៉ូតូនោះគឺគេបម្រុងដឹកចូលទៅសិប្បិកម្មកែច្នៃនៅក្រុងសែនមនោរម្យ ។ ប្រភពបន្តថា រយៈកាលកន្លងមកសិប្បកម្មកែច្នៃឈើប្រណីត ក្នុងខេត្តមណ្ឌលគិរីគ្រប់ទីកន្លែង ត្រូវបានរដ្ឋបាលព្រៃឈើថ្នាក់កណ្តាល ចុះអនុវត្តន៍ច្បាប់បិទមិនឲ្យបន្តសកម្មភាព។ តែទោះជាយ៉ាងណានៅក្រុងសែនមនោរម្យ គេនៅតែឃើញក្រុមឈ្មួញរកស៊ីឈើប្រណីត អាចដឹកជញ្ជូនឈើតាមម៉ូតូកែច្នៃរាប់សិបគ្រឿងយ៉ាងរលូនមកទម្លាក់តាមសិប្បកម្មលួចលាក់បើកខុសច្បាប់ក្នុងក្រុង។
ប្រជាពលរដ្ឋបានលើកឡើងថា សកម្មភាពដឹកជញ្ជូនឈើប្រណីតសព្វថ្ងៃនៅក្រុងសែនមនោរម្យ គឺក្រុមឈ្មួញបានដឹកទាំងយប់ទាំងថ្ងៃ កាត់អតីតប្រលានយន្តហោះ កណ្តាលក្រុងសែមនោរម្យ ក៏ប៉ុន្តែគេពុំសូវឃើញមន្រ្តីជំនាញ ចុះចាប់បង្ក្រាបទេ ។ លុះត្រាម៉ូតូណាពុំមានបង់ប្រាក់ទើបគេឃើញចាប់ម្តងម្កាល។សកម្មភាពទាំងនេះត្រូវបានមហាជន និយាយថា បើគ្មានការត្រូវរ៉ូវគ្នាជាមុនពីសំណាក់មន្រ្តីជំនាញនឹងឈ្មួញ ជាមុនទេកុំថាឡើយដឹកពេលថ្ងៃ ទោះជាដឹកនៅពេលយប់ថ្ងៃននោះងងឹតស្លុបក៏គេមើលឃើញនិងចាប់បង្ក្រាបភ្លាមៗ។
ចែករំលែកព័តមាននេះ