រាជធានីភ្នំពេញ ៖ ប្រភពពីប៉ូលិសមូលដ្ឋានបានបង្ហើបឲ្យដឹងនៅរសៀលថ្ងៃទី៣០ តុលា ២០១៤នេះថា ជនរងគ្រោះទី៨ពីការផ្ទុះបំពង់កំាជ្រួចកាលពីយប់ម៉ិញ ត្រូវបានរកឃើញ ប៉ុន្តែមិនទាន់ស្គាល់ឈ្មោះ គ្រាន់តែដឹងថាជាប៉ូលិសសេដ្ឋកិច្ចក្រសួងមហាផ្ទៃ បានរងរបួសស្រាល ។
គិតមកដល់រសៀលនេះ តួលេខអ្នកស្លាប់នៅដដែល តែចំនួនអ្នករបួសធ្ងន់ស្រាលបានកើនឡើង០៨នាក់ បូកទំាងប៉ូលិសសេដ្ឋកិច្ចដែលទើបរកឃើញខាងលើនេះ ។
គួររំលឹកថា យ៉ាងហោចណាស់មនុស្សម្នាក់បានស្លាប់ និង៨នាក់ផ្សេងទៀតបានរងរបួសធ្ងន់ បន្ទាប់ពីមានមានករណីផ្ទុះបំពង់បាញ់កាំជ្រួចដែលជាគ្រាប់ចុងក្រោយ នៅក្នុងព្រះរាជពិធីខួបឆ្នាំទី១០នៃការឡើងគ្រងរាជសម្បតិ្ត របស់ព្រះមហាក្សត្រកម្ពុជា បណ្តាលឱ្យបែកកាណុងខ្ទាតអំបែងមកចំប្រជាពលរដ្ឋដែលកំពុងឈរមើល ។
ហេតុការណ៍នេះ បានបង្កឱ្យមានការភ្ញាក់ផ្អើលនៅម៉ោងជាង៧យប់ ថ្ងៃទី ២៩ តុលា ២០១៤ នៅចំណុចក្បែរក្បាលជ្រោយ ស្ថិតក្នុងសង្កាត់-ខណ្ឌជ្រោយចង្វា ។
បើតាមសមត្ថកិច្ចបានផ្តល់ព័ត៌មានជំហានដំបូងឲ្យដឹងថា ជនរងគ្រោះដែលស្លាប់ឈ្មោះ ណាគ្រី ដារ៉ូ ភេទប្រុស អាយុ២៣ឆ្នាំ រស់នៅក្នុងភូមិចុងខ្សាច់ ឃុំឈើខ្មៅ ស្រុកកោះធំ ខេត្តកណ្តាល ។ ចំណែកអ្នករងរបួសរួមមាន ៖ ឈ្មោះ ស៊េរី ភេទប្រុស អាយុ៤០ឆ្នាំ របួសធ្ងន់ ,ឈ្មោះ ហេង សុភី អាយុ១៧ឆ្នាំ របួសធ្ងន់ ,ឈ្មោះ ស្រូយ គ្រីម ភេទប្រុស អាយុ២៥ឆ្នាំ និងឈ្មោះ ហេង ចាន់នី អាយុ១៤ឆ្នាំ និ០៤នាក់ទៀតមិនទាន់ស្កាល់អត្តសញ្ញាណ របួសស្រាល។
ព័ត៌មានលម្អឹតនឹងមានផ្សាយជូននៅលើសារព័ត៌មានកោះសន្តិភាព ៕
ចែករំលែកព័តមាននេះ