ទីភ្នាក់ងារអវកាសរុស្ស៊ី ROSCOMOS គូសបញ្ជាក់ថា កាំជ្រួចអវកាស SOYOUZ-2-1A ដែលផ្ទុកយានអវកាសផ្គត់ផ្គង់ PROGRESS M-25M ត្រូវបានបាញ់បង្ហោះកាលពីថ្ងៃទី២៩ តុលា ។កាំជ្រួចនេះត្រូវបានបាញ់បង្ហោះចេញពីមជ្ឈមណ្ឌលអវកាសនៅបៃកូនួរ កាហ្សាក់ស្ថាន នាវេលាម៉ោង១០និង៩នាទី ម៉ោងនៅក្រុងមូស្គូ។ ៦ម៉ោងក្រោយការបាញ់បង្ហោះយានអវកាស PROGRESS M-25M បានហោះហើរក្នុងតារាវិថីឆ្ពោះទៅកាន់ស្ថានីយអវកាសអន្តរជាតិ ISS ហើយទៅភ្ជាប់ជាមួយស្ថានីយនោះ។
នេះជាការបាញ់បង្ហោះលើកដំបូងរបស់កាំជ្រួចធុន SOYOUZ-2-1A ជាកាំជ្រួចដែលជំនួសកាំជ្រួច SOYOUZ-U-PVB ។ ការសាកល្បងដំបូងៗរបស់កាំជ្រួចថ្មីនោះត្រូវបានធ្វើកាលពីខែវិច្ឆិកា ឆ្នាំ២០០៤ ។
យានអវកាសដឹកជញ្ជូនភស្តុភារធុន PROGRESS ដឹករបស់របរទម្ងន់ជាង២,៥តោន ដែលរបស់របរទាំងនេះរួមមាន ប្រេងឥន្ធនៈ ស្បៀង ទឹក និងខ្យល់អុកស៊ីហ្សែន ព្រមទាំងឧបករណ៍វិទ្យាសាស្ត្រ ។មុននេះកាំជ្រួច ANTARES បាញ់បង្ហោះយានអវកាសអាមេរិក បានផ្ទុះឆេះពេលបាញ់ចេញតែបន្តិចនៅរដ្ឋវៀជីនៀ ។ កាំជ្រួច ANTERES ត្រូវបាញ់បញ្ជូនយានអវកាសកាហ្គោ CYGNUS ទៅកាន់ស្ថានីយ ISS ខាងផ្នែកអាមេរិកដើម្បីផ្តល់ភស្តុភារ ។ សម្រាប់ពេលនេះមានមនុស្សប្រចាំការក្នុងស្ថានីយ ISS ៦នាក់គឺ ជនជាតិរុស្ស៊ី៣នាក់ ជនជាតិអាមេរិក២នាក់ និងជនជាតិអាល្លឺម៉ង់ម្នាក់ ៕
ខាន់ សុឃន
SOPHONN20141030_544_24002
រូប Oct30/12 កាំជ្រួច SOYOUZ-2-1A ពេលបាញ់បង្ហោះ
កែ
ចែករំលែកព័តមាននេះ