កីឡាករស្វ៊ីសរ៉ូជើ ហ្វេដឺរ័រ កក់បានកន្លែងមួយក្នុងព្រឹត្តិការណ៍ប្រកួតដំណាច់ឆ្នាំ ATP World Tour Finals ឆ្នាំ២០១៤ ក្រោយពីឈ្នះជុំទី២ កម្មវិធី Paris Masters នៅទីក្រុងប៉ារីស ប្រទេសបារាំង កាលពីថ្ងៃពុធទី២៩ តុលា ។ ហ្វេដឺរ័រ បានយកឈ្នះកីឡាករម្ចាស់ផ្ទះបារាំង Jeremy Chardy ក្នុងលទ្ធផល៧-៦, ៦-៤ និង៦-៤ ឈានចូលជុំទី៣ដោយក្តីរីករាយ។ នៅជុំនេះ រូបគេនឹងប៉ះជាមួយជើងខ្លាំងម្ចាស់ផ្ទះម្នាក់ទៀតគឺ Lucas Pouille ដែលបានបំបាក់កីឡាករអុីតាលី Fabio Fognini ។
សម្រាប់ហ្វេដឺរ័រ ក្នុងនាមជាកីឡាករលំដាប់ទី៣ ពិភពលោក វាគឺជាលើកទី១៣ ហើយដែលរូបគេទទួលបានឱកាសចូលរួមក្នុងព្រឹត្តិការណ៍ ATP World Tour Finals ។ គេបានថ្លែងថា ៖ «នេះជាឆ្នាំដែលមិនសូវកាក់កប ដូច្នេះជ័យជម្នះលើកនេះអាចជារឿងមួយល្អដែរ» ។
សូមបញ្ជាក់ថា កីឡាករវ័យ៣៣ឆ្នាំរូបនេះធ្លាប់លើកពានជើងឯក ATP World Tour Finals ចំនួន៦លើករួចមកហើយ គឺនៅឆ្នាំ២០០៣ ២០០៤, ២០០៦, ២០០៧, ២០១០ និងឆ្នាំ២០១១ ។ លទ្ធផលនៃការប្រកួតគូផ្សេងទៀតមានដូចជា អ៊ែនឌី មូរ៉េ មកពីអង់គ្លេសបំបាក់កីឡាករម្ចាស់ផ្ទះ Julien Benneteau ក្នុងលទ្ធផល៦-៣ និង៦-៤ ខណៈ Feliciano Lopez បំបាក់កីឡាករអាមេរិក Sam Querrey ក្នុងលទ្ធផល ៦-៤ និង៦-៤ ។ ចំណែកកីឡាករកាណាដា Milos Raonic បានប្រើពេលមួយសន្ទុះធំក្នុងការយកឈ្នះកីឡាករអាមេរិក Jack Sock ក្នុងលទ្ធផល៦-៣, ៥-៧ និង៧-៦ ស្របពេលដែលកីឡាករស្វ៊ីស Stanislas Wawrinka យកឈ្នះកីឡាករអូទ្រីស Dominic Thiem ក្នុងលទ្ធផល៦-៤ និង៧-៦។
ឯកីឡាករអេស្ប៉ាញ David Ferrer ផ្តួលកីឡាករបែលហ្ស៊ិក David Goffin ក្នុងលទ្ធផល៦-៣, ២-៦ និង៦-៣ ខណៈ Richard Gasquet ជាកីឡាករក្តីសង្ឃឹមរបស់ម្ចាស់ផ្ទះចាញ់ក្រោមថ្វីដៃកីឡាករអេស្ប៉ាញ Roberto Bautista-Agut ក្នុងលទ្ធផល៦-៤ និង៦-២ ៕
ចែករំលែកព័តមាននេះ