រាជធានីភ្នំពេញ ៖ ក្នុងនាមជាកីឡាករជើងចាស់ដែលមានបទពិសោធន៍ច្រើនមិនចាញ់គ្នា ពេលនេះជើងខ្លាំង ផាន់ សុវណ្ណ និងនូវ ស៊ីថា បានប៉ះគ្នាហើយនៅលើរេញទូរទស្សន៍បាយ័នរោងសៀក នាថ្ងៃអាទិត្យ ទី២ វិច្ឆិកានេះ។ ថ្វីដ្បិតតែនេះមិនមែនជាការប្រកួតគួរឱ្យភ្ញាក់ផ្អើលខ្លាំង ប៉ុន្តែក៏មានមនុស្សមិនតិចនាក់ប៉ុន្មានដែរ ដែលចង់ដឹងថារវាងអ្នកទាំងពីរតើអ្នកណាឈ្នះ ។
ការពិតកីឡាករផាន់ សុវណ្ណ ជាជើងខ្លាំងដែលមានឈ្មោះបោះសំឡេងនៅក្នុងពិភពប្រដាល់យូរមកហើយ គឺមុនកីឡាករនូវ ស៊ីថាឆ្ងាយណាស់ ។ ប៉ុន្តែកេរ្តិ៍ឈ្មោះរបស់អ្នកទាំងពីរមានចំណុចស្រុតចុះ និងរំកិលឡើងបន្តិចម្នាក់ ទើបធ្វើឱ្យទីផ្សារ និងការចាប់អារម្មណ៍របស់អ្នកទាំងពីរក្នុងរង្វង់មហាជនប្រែជាមានទម្ងន់ប្រហាក់ប្រហែលគ្នា ។ ធៀបនឹងអំឡុងពេលមុន ផាន់ សុវណ្ណ មិនមែនជាដៃគូរបស់ នូវ ស៊ីថានោះទេ ដោយសារតែលោកគឺជាជើងខ្លាំង និងល្បីយ៉ាងខ្លាំងនៅក្នុងពិភពកីឡាប្រដាល់។ ជើងខ្លាំងប្រចាំក្លិបមិត្តប៉ូលិសរូបនេះ ត្រូវមហាជនទទួលស្គាល់ថ្វីដៃថាមិនធម្មតានោះទេ បើទោះជាពេលចុងក្រោយ លោករាងធ្លាក់ដៃបណ្ដាលឱ្យកេរ្តិ៍ឈ្មោះកីឡាករស្រករក្រោយឈានមកទន្ទឹមនោះក៏ដោយ ។
កីឡាករនូវ ស៊ីថា ក៏មិនអន់ប៉ុន្មានដែរក្នុងចំណោមកីឡាករល្បីៗប្រចាំក្លិបតេជៈរាជសីហ៍បង្ក្រាបគ្រឿងញៀនខេត្តរតនៈគិរី។ ប្រឡូកការប្រដាល់ក្រោយផាន់ សុវណ្ណ បន្តិចមែន ប៉ុន្តែទីផ្សារ និងកេរ្តិ៍ឈ្មោះរបស់លោក បានឡើងក្រឺតៗមិនគួរឱ្យជឿ ។ ថ្វីដ្បិតតែក្នុងរយៈពេលថ្មីៗ លោកបានបណ្ដោយឱ្យភាពខ្លាំងក្លាធ្លាក់ចុះជាងអំឡុងឆ្នាំ២០១៣មែន ក៏កម្រិតនៃភាពខ្លាំងក្លា និងចំណុចល្អរបស់លោកនៅតែខ្លាំង ។ លោកបានក្លាយជាដៃគូយ៉ាងសក្តិសមសម្រាប់ពេលនេះ ជាមួយកីឡាករផាន់ សុវណ្ណ ។ ក្រុមអ្នកគាំទ្រវិស័យកីឡាប្រដាល់ មានការប៉ាន់ស្មានថា នូវ ស៊ីថា ល្អជាងផាន់ សុវណ្ណ បើទោះជាផាន់ សុវណ្ណ ធ្លាប់គ្រប់គ្រងតំណែងជាជើងខ្លាំងមិនធម្មតាកាលពីអតីតកាល។ ការប៉ះគ្នារវាងកីឡាករទាំងពីរនឹងធ្វើឱ្យមានភាពកក្រើកយ៉ាងហោច ក៏មួយជ្រុងតូចនៅក្នុងពិភពប្រដាល់ដែរ ។ ម្នាក់ៗយល់ស្របគ្នាថា អ្នកទាំងពីរពិតជាប្រឹងវាយគ្នាអស់ពីសមត្ថភាព ដោយសារ ផាន់ សុវណ្ណ ដែលចុះខ្សោយបន្តិចក៏ត្រូវការសាងគ្រឹះកេរ្តិ៍ឈ្មោះត្រឡប់មកវិញ ខណៈដែល នូវ ស៊ីថា ឯណោះវិញ ក៏ត្រូវការបង្កើនទីផ្សារ និងភាពខ្លាំងរបស់ខ្លួនបង្អួតសិស្សច្បងដែរ ។
ផាន់ សុវណ្ណ អះអាងថា ក្នុងកាលៈទេសៈការប្រដាល់កំពុងមានការរីកចម្រើន លោកនឹងស្ទុះស្ទាបង្ហាញខ្លួនឱ្យបានញឹកញាប់ត្រឡប់មកប្រមូលថវិកា និងវាតយកកេរ្តិ៍ឈ្មោះឱ្យខ្លាំងដូចដើម។ ជាមួយនឹងការតាំងចិត្តនេះ មានការយល់ស្របជាច្រើនថា លោកពិតជាខំយកឈ្នះ នូវ ស៊ីថា ជាក់ជាមិនខាន ។ មិនខុសគ្នាទេ នូវ ស៊ីថា ឯណោះវិញ ក៏តាំងចិត្តដូចគ្នានោះដែរ ដោយមិនសុខចិត្តចាញ់ ផាន់ សុវណ្ណ ដោយងាយ បើទោះជា ផាន់ សុវណ្ណ ត្រូវគេមើលឃើញថាមានផ្លែដៃល្អជាង ។ នៅលើសង្វៀនដដែលនោះដែរ ក៏មានការប៉ះគ្នារវាងកីឡាករជើងខ្លាំងមួយគូទៀតផងដែរ គឺកីឡាករកែវ វិរៈ មកពីក្លិបគជសារកីឡា ប្រកួតជាមួយកីឡាករ សល់ ប៊ុនហូវ មកពីក្លិបកុសលកីឡា ។ ការប្រកួតរវាងអ្នកទាំងពីរក៏ទទួលបានការចាប់អារម្មណ៍មិនណយនោះដែរ នៅក្នុងពិភពអ្នកតាមដានការប្រកួតកីឡាប្រដាល់ ៕
ចែករំលែកព័តមាននេះ