អង្គការអូតង់ប្រកាសកាលពីថ្ងៃទី២៩ តុលា ថា បានធ្វើអន្តរាគមន៍តាមអាកាសជាច្រើនលើករយៈពេលប៉ុន្មានថ្ងៃចុងក្រោយនេះ បន្ទាប់ពីកត់សម្គាល់ឃើញការបង្កើនសកម្មភាពរបស់កងយន្តហោះយោធារុស្ស៊ី ក្នុងដែនអាកាសអឺរ៉ុប ។ក្នុងសេចក្តីប្រកាសមួយ អូតង់បញ្ជាក់ថា យន្តហោះរបស់បណ្តាប្រទេសជាសមាជិកអូតង់ បានហោះឡើងនៅកន្លែង៤ផ្សេងគ្នា ដើម្បីបំពេញបេសកកម្មស្ទាក់ប្រឆាំងយន្តហោះយោធារុស្ស៊ី៣ក្រុម ដែលហោះហើរក្នុងដែនអាកាសនៃសមុទ្របាល់ទិក សមុទ្រខាងជើងនិងសមុទ្រខ្មៅ ។
អូតង់រៀបរាប់ពីសកម្មភាពទ្រង់ទ្រាយធំ និងខុសប្រក្រតីមួយ ។ អូតង់ពុំបាននិយាយយោងដល់វិបត្តិអ៊ុយក្រែន ដែលនាំឱ្យមានភាពតានតឹងយ៉ាងខ្លាំងរវាងរុស្ស៊ី និងអឺរ៉ុបឡើយ ។ បណ្តាប្រទេសនៅភាគខាងកើតអឺរ៉ុបជាសមាជិកអូតង់ ក៏ដូចជាបណ្តាប្រទេសនៅតំបន់បាល់ទិក ជាអតីតសាធារណរដ្ឋសូវៀតដែរ ព្រមទាំងប្រទេសប៉ូឡូញ បានទទួលការបញ្ជូនបណ្តាយន្តហោះប្រយុទ្ធសម្រាប់ធានាសន្តិសុខរបស់ពួកគេ ។
យោងតាមអូតង់ថា មានការចេញស្ទាក់យន្តហោះយោធារុស្ស៊ីដល់ទៅជាង១០០លើក ក្នុងឆ្នាំ២០១៤នេះ គឺកើនដល់៣ដង បើធៀបនឹងឆ្នាំ២០១៣ ។កាលពីថ្ងៃទី២៩ តុលា មានប្រតិបត្តិការស្ទាក់ធំមួយចូលរួមដោយយន្តហោះចម្បាំងរបស់ប្រទេស៣ ជាសមាជិកអូតង់ ក្រោយពីចាប់ឃើញយន្តហោះយោធារុស្ស៊ីមួយកង មានយន្តហោះដល់ទៅ៨គ្រឿង ក្នុងនោះរួមមានយន្តហោះប្រដេញទម្លាក់គ្រាប់បែក៤គ្រឿង និងយន្តហោះផ្គត់ផ្គង់៤គ្រឿង ដែលហោះហើរពីលើមហាសមុទ្រអាត្លង់ទិក ។ បណ្តាយន្តហោះរបស់កងទ័ពន័រវែស បានហោះទៅស្ទាក់ដើម្បីកំណត់អត្តសញ្ញាណ រួចយន្តហោះរុស្ស៊ី៦គ្រឿងបានហោះបកក្រោយវិញ ប៉ុន្តែ២គ្រឿងទៀតជាយន្តហោះទម្លាក់គ្រាប់បែកធុន Tu-95 បន្តដំណើរទៅមុខទៀត ។ ពេលនោះយន្តហោះចម្បាំងអង់គ្លេសបានហោះឡើងដើម្បីតាមយន្តហោះទាំងនោះ បន្ទាប់មកកងយន្តហោះព័រទុយហ្គាល់បានមកប្តូរវេនម្តង ។
ប្រតិបត្តិការមួយទៀតធ្វើឡើងដោយកងយន្តហោះតួកគី ពីលើសមុទ្រខ្មៅ ដើម្បីត្រួតពិនិត្យយន្តហោះ៤គ្រឿងរបស់រុស្ស៊ី ក្នុងនោះមានយន្តហោះទម្លាក់គ្រាប់បែក Tu-95 ចំនួន២គ្រឿង ។ចំណែកយន្តហោះប្រដេញអាល្លឺម៉ង់កាលពីថ្ងៃទី២៨ តុលា បានហោះចេញត្រួតពិនិត្យយន្តហោះប្រយុទ្ធរុស្ស៊ី៧គ្រឿង ដែលហោះហើរពីលើសមុទ្របាល់ទិក ៕
ចែករំលែកព័តមាននេះ