កីឡាករប្រដាល់អង់គ្លេសអ ាមៀ ខាន់នឹងបង្ហាញឱ្យឃើញនូវភាពខ្លាំងរបស់ខ្លួនជាថ្មីម្តងទៀតលើសង្វៀនក្រុងឡាសវេហ្គាស ទឹកដីសហរដ្ឋអាមេរិក ខណៈនៅថ្ងៃទី១៣ ខែធ្នូ រូបគេនឹងប៉ះជាមួយកីឡាករម្ចាស់ផ្ទះឌីវ៉ុន អាឡិចសាន់ឌ័រ ។ ការប្រកួតដែលរៀបចំនៅសង្វៀន Mandalay Bay Resort & Casino អាមៀ ខាន់ គឺជាអ្នកការពារខ្សែក្រវាត់ស្ថាប័ន WBC និង WBA របស់ខ្លួន ។
ការប្រកួតនេះអាចជាស្ពានមួយចម្លងរូបគេឱ្យទៅជួបជាមួយហ្វ្លយ មេវេដឌ័រ នៅឆ្នាំ២០១៥ ពោលគឺជាការប្រកួតមួយដែលអាមៀ ខាន់ បានសុបិនអស់ពេលជាយូរមកហើយ ។
កីឡាករវ័យ២៧ឆ្នាំរូបនេះធ្លាប់បានធ្វើរួចមកហើយនូវភាពហំហានរបស់ខ្លួនដោយបានដកខ្លួនមិនព្រមជួបប្រកួតជាមួយអាឡិចសាន់ឌ័រ កាលពីខែធ្នូ ឆ្នាំ២០១៣ ។ វាគឺជាការសម្រេចចិត្តដែលរងឥទ្ធិពលនៃជំនឿពីលទ្ធភាពជំនួបជាមួយហ្វ្លយ មេវេដឌ័រ ។ យ៉ាងណាក៏ដោយ ជំនឿចិត្តនាពេលនោះបានរលាយបាត់ ខណៈមេវេដឌ័រជ្រើសរើសយកកីឡាករអាហ្សង់ទីនម៉ាកូស មេដាណា ។ ចំណែក រូបគេវិញត្រូវផ្គូផ្គងឱ្យជួបជាមួយកីឡាករអាមេរិកម្នាក់ទៀត គឺល្វីស កូលឡាហ្សូ ។
ការសម្រេចជួបជាមួយអាឡិចសាន់ឌ័រ លើកនេះ ព្រោះរូបគេយល់ថា កីឡាករស្បែកខ្មៅអាមេរិករូបនេះ គឺជាដៃគូស័ក្តិសមសម្រាប់ការកំដៅសាច់ដុំឈានទៅជួបជាមួយមេវេដឌ័រ។ មួយវិញទៀត បើមើលលើឯតទគ្គកម្មប្រកួត អាឡិចសាន់ឌ័រ ពិតជាមិនអាចមើលស្រាលបានឡើយ ។ នៅក្នុងជ័យជម្នះ២៦លើក គឺគេផ្តួលដៃគូឱ្យសន្លប់បាន១៤លើក ។ គេធ្លាប់ចាញ់តែ២លើកប៉ុណ្ណោះក្រោមកណ្តាប់ដៃកីឡាករខ្លាំងៗចំនួន២រូបក្នុងនោះ គឺ Shawn Porter និង Timothy Bradley ។
សម្រាប់អាមៀ ខាន់ នេះជាលើកទី១ហើយដែលគេប្រកួតការពារខ្សែក្រវាត់របស់ខ្លួនបន្ទាប់ពីទទួលបានកាលពីថ្ងៃទី៣ខែឧសភា ឆ្នាំ២០១៤ក្រោយឈ្នះកីឡាករកូលឡាហ្សូដោយពិន្ទុជាឯកច្ឆ័ន្ទ ។ ពេលនេះ ឯតទគ្គកម្មប្រកួតរបស់គេគឺឈ្នះ២៩លើក ចាញ់៣ និងផ្តួលគូប្រកួតឱ្យសន្លប់ ១៩លើក ៕
ចែករំលែកព័តមាននេះ