រាជធានីភ្នំពេញ ៖ ក្រុមអត្តពលិកជម្រើសជាតិ និងប្រតិភូកីឡាចំបាប់កម្ពុជា កាលពីល្ងាចថ្ងៃទី២៨ តុលា បានវិលត្រឡប់មកដល់មាតុប្រទេសវិញហើយ ដោយបានពាំនាំនូវមេដាយចំនួន៤គ្រឿងជូនជាតិពីការចូលរួមព្រឹត្តិការណ៍ប្រកួតចំបាប់ជ្រើសរើសជើងឯកអាស៊ាន-អូស្ត្រាលី (The SEA & Australian Wrestling Championship) នៅប្រទេសសិង្ហបុរី ។
នៅអាកាសយានដ្ឋានអន្តរជាតិភ្នំពេញនាពេលនោះ ក្រុមអត្តពលិកចំបាប់កម្ពុជាទទួលបានការស្វាគមន៍យ៉ាងកក់ក្តៅពីលោកបុ៉ន សុខ នាយកមជ្ឈមណ្ឌលជាតិហ្វឹកហ្វឺនកីឡា និងមន្ត្រីកីឡាពាក់ព័ន្ធមួយចំនួនទៀត ។ លោកធិន វិចិត្រ អគ្គលេខាធិការសហព័ន្ធកីឡាចំបាប់កម្ពុជា និងជាប្រធានប្រតិភូផងនោះ បានឱ្យដឹងថា កម្ពុជាបានបញ្ជូនកីឡាករចំបាប់៦រូប និងកីឡាការិនី៦រូបទៅចូលរួមប្រកួតក្នុងព្រឹត្តិការណ៍ដ៏ធំមួយដែលមានឈ្មោះថា The SEA & Australian Wrestling Championship នៅប្រទេសសិង្ហបុរី ដែលមានប្រទេសចំនួន៧ចូលរួម គឺសិង្ហបុរី, ម៉ាឡេស៊ី, កម្ពុជា, ថៃ, វៀតណាម, ហ្វីលីពីន និងអូស្ត្រាលី ។
លោកបានបញ្ជាក់ថា នៅក្នុងព្រឹត្តិការណ៍នេះ កម្ពុជាដណ្តើមបានមេដាយសរុប៤គ្រឿង ក្នុងនោះមាស១គ្រឿង គឺកីឡាករឌន សៅ ប្រកួតក្នុងប្រភេទទម្ងន់៩៧គីឡូក្រាម ។ មេដាយប្រាក់១គ្រឿង ដណ្តើមបានដោយកីឡាការិនីចូវ សុធារ៉ា ប្រកួតក្នុងប្រភេទទម្ងន់៤៨គីឡូក្រាម លើវិញ្ញាសាចំបាប់សេរី ។ រីឯមេដាយសំរឹទ្ធ២គ្រឿងទៀតនោះ គឺ១គ្រឿងដណ្តើមបានដោយកីឡាករឆាំ ពិស៊ីន ប្រកួតក្នុងប្រភេទទម្ងន់៦៥គីឡូក្រាមលើវិញ្ញាសាចំបាប់ក្រិចកូរ៉ូមុាំង និង១គ្រឿងទៀតដណ្តើមបានដោយកីឡាករចាប លឿន ប្រកួតក្នុងប្រភេទទម្ងន់៨៦គីឡូក្រាមលើវិញ្ញាសាចំបាប់សេរី ។
ចំណែកកីឡាករកាងដែន ពិសិដ្ឋ ប្រកួតចំបាប់សេរីក្នុងប្រភេទទម្ងន់៦១គីឡូក្រាម, កីឡាករជន ធូ ប្រកួតចំបាប់ក្រិចកូរ៉ូម៉ាំងក្នុងប្រភេទទម្ងន់៥៩គីឡូក្រាម កីឡាករងួន មករា ប្រកួតចំបាប់សេរីក្នុងប្រភេទទម្ងន់៦៥គីឡូក្រាម កីឡាការិនី នី សំណាង ប្រកួតចំបាប់សេរីក្នុងប្រភេទទម្ងន់៥៥គីឡូក្រាម និងកីឡាការិនីឌន ស្រីម៉ៅ ប្រកួតចំបាប់សេរីក្នុងប្រភេទទម្ងន់៥៣គីឡូក្រាម ពុំទទួលបានមេដាយឡើយ ។ ក្រោយទទួលបានមេដាយមាស១គ្រឿងពីព្រឹត្តិការណ៍អន្តរជាតិខាងលើ ម្ចាស់មេដាយមាសស៊ីហ្គេមនៅមីយ៉ាន់ម៉ា កីឡាករឌន សៅ បានសម្តែងនូវទឹកចិត្តសប្បាយរីករាយក្រោយពីឈ្នះមេដាយមាសក្នុងការប្រកួតនៅប្រទេសសិង្ហបុរី យកមកជូនជាតិ ។ ចំណែកកីឡាការិនី ចូវ សុធារ៉ា ដែលជាម្ចាស់មេដាយមាសស៊ីហ្គេមនៅមីយ៉ាន់ម៉ាដែរនោះ បានសម្តែងការសោកស្តាយដោយសារនាងដណ្តើមបានត្រឹមតែមេដាយប្រាក់ ដែលមិនមែនជាបំណងប្រាថ្នារបស់នាង ។
ទោះបីជាយ៉ាងណា លទ្ធផលដែលទទួលបាននាពេលនេះបានធ្វើឱ្យកីឡាដ៏មានសក្តានុពលរបស់កម្ពុជាមួយនេះអាចស្តារមុខមាត់ឡើងវិញ ក្រោយពីមិនទទួលបានមេដាយក្នុងព្រឹត្តិការណ៍កីឡាអាស៊ីហ្គេមនៅប្រទេសកូរ៉េខាងត្បូងដែលទើបបញ្ចប់ទៅថ្មីៗនេះ ។ លទ្ធផលដ៏ល្អនេះធ្វើឱ្យក្រុមកីឡាករ-កីឡាការិនីកាន់តែមានជំនឿ និងមានកម្លាំងចិត្តក្នុងការចូលរួមប្រកួតក្នុងព្រឹត្តិការណ៍អន្តរជាតិនានា នាពេលខាងមុខទៀត បើទោះបីជាព្រឹត្តិការណ៍កីឡាស៊ីហ្គេមលើកទី២៨ នៅប្រទេសសិង្ហបុរី ក្រុមកីឡាចំបាប់កម្ពុជាមិនបានចូលរួមក្តី ៕
ចែករំលែកព័តមាននេះ