ម្ចាស់ខ្សែក្រវាត់ស្ថាប័ន EBU/ WBC ចច ហ្គ្រូវ នឹងបង្ហាញខ្លួននៅលើសង្វៀនជាថ្មីម្តងទៀតនាខែវិច្ឆិកាខាងមុខ បន្ទាប់ពីទទួលបានជោគជ័យយ៉ាងត្រចះត្រចង់លើកីឡាករ Christopher Rebrasse កាលពីថ្ងៃទី២០ ខែកញ្ញាកន្លងទៅ ។ ការប្រកួតនេះគ្រោងធ្វើនៅសង្វៀន Echo Arena ស្ថិតក្នុងទីក្រុងលីវើភូល ប្រទេសអង់គ្លេស ថ្ងៃទី២២ វិច្ឆិកា ។ គូប្រកួតដែលគេត្រូវជួបនោះ គឺកីឡាករអាមេ
រិក Denis Douglin ។
ការប្រកួតកាលពីថ្ងៃទី២០ ខែកញ្ញា នៅទីក្រុងឡុងដ៍ ហ្គ្រូវធ្វើបានយ៉ាងល្អបំផុតដោយវាយសង្គ្រុបមិនឱ្យកីឡាករ Rebrasse តបតវិញបានពេញ១២ទឹក ទីបំផុតយកឈ្នះបាននូវខ្សែក្រវាត់ស្ថាប័ន EBU និង WBC ជាមួយលទ្ធផលពិន្ទុជាឯកច្ឆ័ន្ទ ។ នោះប្រហែល ជាលទ្ធផលដ៏ល្អបំផុតរបស់កីឡាករអង់គ្លេសរូបនេះហើយបន្ទាប់ពីចាញ់មិត្តរួមជាតិ ខាល ហ្វ្រច់២លើកជាប់ៗគ្នា ។ ពេលនេះ ហ្គ្រូវមានគោលដៅស្តារឡើងវិញនូវមុខមាត់របស់ខ្លួនក្រោយចាញ់ដោយសន្លប់ក្រោមកណ្តាប់ដៃមិត្តរួមជាតិខាល ហ្វ្រច់
កាលពីថ្ងៃទី៣១ ខែឧសភា ។ ការបរាជ័យនាពេលនោះបាននាំឱ្យគេមិនអាចដណ្តើមយកខ្សែក្រវាត់់ស្ថាប័ន IBF/WBA ប្រភេទទម្ងន់ super middleweight បាន ។ គេបានថ្លែងថា ៖ «ពេលនេះខ្ញុំមានសុខភាពពេញបរិបូរ ។ ប្រសិន ខ្ញុំចាញ់ការប្រកួតនេះទៀត ខ្ញុំអាចនឹងបាត់បង់ឱកាសឡើងប្រកួតដណ្តើមខ្សែក្រវាត់ពិភពលោកពីកីឡាករអានតូនី ឌីរែល ។ ជាមួយគ្នានោះ ខ្ញុំក៏ទទួលបានសារអបអរសាទរពីអ្នកគាំទ្រជនរួមជាតិអង់គ្លេសផងដែរ ។
ពួកគេនិយាយថា ការប្រកួតរបស់ខ្ញុំល្អមើលខ្លាំងណាស់ហើយចង់ឱ្យមានការប្រកួតបែបនេះនៅអង់គ្លេសជាថ្មីម្តងទៀត» ។ គេបានបន្តថា ៖ «ថ្ងៃទី២២ ខែវិច្ឆិកា គឺជាកាលបរិច្ឆេទដ៏សំខាន់មួយទៀតសម្រាប់ខ្ញុំ ហើយប្រសិនជាជោគជ័យលើកនេះទៀត ខ្ញុំនឹងរង់ចាំការប្រកួតដ៏ធំមួយនៅឆ្នាំ២០១៥ ខាងមុខ» ។
មើលលើឯតទគ្គកម្មប្រកួតវិញ ២២លើកគឺគេឈ្នះ២០ ចាញ់២ និងផ្តួលគូប្រកួតឱ្យសន្លប់បាន១៥លើក ៕
ចែករំលែកព័តមាននេះ